Dentro dos programas de actividades que a Academia Galega de Seguridade ten previsto realizar no ano 2001, e conforme as funcións atribuídas pola Lei 4/1992, do 9 de abril, de Creación da Academia Galega de Seguridade, anúnciase a realización dunha xornada sobre o voluntariado de protección civil e a súa colaboración nas emerxencias, que deberá desenvolverse conforme as seguintes bases:

Primeira.-Obxectivos.

Un dos colectivos cunha presencia activa na acción voluntaria desde hai máis de dez anos, é o voluntariado de protección civil; isto, por si só, xustifica e fai necesarios encontros e intercambios que motiven e potencien o seu coñecemento e a súa actividade, facilitando a posta en común de ideas e experiencias. Se, ademais, engadimos que o 2001 foi proclamado o Ano internacional do voluntariado, isto é razón de máis para a convocatoria desta xornada.

Por outra banda, trataranse temas de discusión e análise que poden incidir no presente e futuro do voluntariado de protección civil de Galicia, tanto desde o punto de vista do mesmo colectivo como desde as institucións.

Segunda.-Destinatarios.

A xornada vai dirixida ó voluntariado de protección civil de Galicia en xeral.

Terceira.-Desenvolvemento.

1. Prazas: o número de prazas ofertadas para este encontro será de 300.

2. Duración e data: a xornada desenvolverase durante o día 22 de novembro de 2001, en xornada de mañá e tarde.

O horario será o seguinte: de 9 a 14 horas e de 16.30 a 19.30 horas.

3. Lugar: a xornada terá lugar no salón de actos da Academia Galega de Seguridade, sita na Avenida da Cultura, s/n, no concello da Estrada.

Cuarta.-Solicitudes e prazo de inscrición.

1. A inscrición dos participantes será totalmente gratuíta.

2. O persoal que desexe participar nesta xornada deberá presentar, cuberta a máquina ou con letra moi clara, a instancia que figura no anexo.

3. O prazo para a presentación será de 15 días naturais contados a partir do día seguinte ó da publicación desta resolución no Diario Oficial de Galicia.

4. As instancias deberán enviarse por correo, fax, etc., á sede da Academia Galega de Seguridade: Avenida da Cultura, s/n, 36680 A Estrada, ou ben poden entregarse en calquera dos lugares previstos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.

Quinta.-Contido.

Nel trataranse entre outros os seguintes temas:

a) Normativa sobre protección civil.

b) Agrupación de voluntarios nas grandes cidades.

c) Agrupación de voluntarios nas pequenas vilas.

d) O servicio galego do voluntariado.

e) Os grupos municipais de intervención rápida.

f) A central de emerxencia do 112, a súa operatividade día a día nas emerxencias e a súa colaboración coas AVPC.

g) A protección civil de Galicia e as AVPC.

Sexta.-Relación de admitidos.

A relación de admitidos publicarase o día 19 de novembro no taboleiro de anuncios da Academia Galega de Seguridade, ou ben poden confirma-la súa asistencia chamando ó teléfono 986 59 00 21.

Sétima.-Certificado de asistencia.

Ó remate da xornada entregaráselles un certificado de asistencia a aquelas persoas que acrediten a súa participación continuada.

Oitava.-Modificacións.

A Academia Galega de Seguridade poderá modifica-lo desenvolvemento da xornada para adaptala ás necesidades da Administración e ás continxencias que poidan xurdir.

A Estrada, 18 de outubro de 2001.

Juan José Fariñas-Ferro Rodríguez

Director xeral da Academia Galega de Seguridade