Visto o expediente tramitado por instancia da Fundación Preescolar na Casa para a súa declaración de interese galego e a conseguinte inscrición no Rexistro de Fundacións da Xunta de Galicia.

Resultando que a Consellería da Presidencia e Administración Pública, pola súa Orde do 21 de setembro de 2001 (Diario Oficial de Galicia do 10 de outubro), clasificou como de interese social a citada fundación e a adscribiu á Consellería de Educación e Ordenación Universitaria.

Vista a Lei 7/1983, do 22 de xuño, de réxime das fundacións de interese galego, modificada pola Lei 11/1991, do 8 de novembro, de reforma da Lei 7/1983; así como o Regulamento de organización e funcionamento do protectorado das fundacións de interese galego, aprobado por Decreto 248/1992, do 18 de xuño, e as demais disposicións de xeral e pertinente aplicación, e máis concretamente as normas básicas contidas na Lei 30/1994, do 24 de novembro, de fundacións e de incentivos fiscais á participación privada en actividades de interese xeral.

Considerando que a correspondente escritura fundacional e de aprobación dos estatutos son conformes co establecido nos artigos 5, 6 e 7 da Lei 7/1983,

do 22 de xuño (Diario Oficial de Galicia nº 89, do 20 de xullo), e coas demais disposicións aplicables.

Considerando que os fins e demais elementos organizativos da Fundación Preescolar na Casa cumpren cos requisitos e condicións sinalados nos artigos 1 e 13 da mencionada Lei 11/1991 (Diario Oficial de Galicia nº 219, do 12 de novembro), para a súa declaración de interese galego, así como coas condicións básicas determinadas na devandita Lei 30/1994.

Considerando que este expediente o promoveron persoas lexitimadas para iso, e que na súa tramitación se cumpriron os requisitos legais e regulamentarios esixidos, tanto pola lexislación autonómica en materia de fundacións de interese galego como polas normas básicas establecidas na Lei 30/1994.

Esta consellería, consonte o disposto no artigo 32.3º do devandito regulamento, logo do informe da asesoría xurídica deste departamento,

RESOLVE:

Primeiro.-Declarar de interese galego a Fundación Preescolar na Casa coa conseguinte aprobación dos seus estatutos e dos demais aspectos recollidos na orde de clasificación publicada no DOG do 10 de outubro de 2001.

Segundo.-Ordena-la súa inscrición no Rexistro Auxiliar de Fundacións deste protectorado, logo da publicación desta orde no Diario Oficial de Galicia; tendo esta publicación e inscrición o carácter constitutivo que determinan os artigos 33.3º do Decreto 248/1992 e o 8 da Lei 7/1983, así como o artigo 3 da referida Lei 30/1994.

Terceiro.-Esta disposición pon fin á vía administrativa, consonte co establecido no artigo 109.c) da Lei 30/1992, de réxime xurídico das administracións públicas e do procedemento administrativo común.

Santiago de Compostela, 15 de outubro de 2001.

Celso Currás Fernández

Conselleiro de Educación e Ordenación Universitaria