De conformidade co previsto na base 3.3 do acordo do 5 de abril de 2001 (Diario Oficial de Galicia nº 77, do 20 de abril), da Dirección da Fundación Pública Escola Galega de Administración Sanitaria (FEGAS), polo que se anuncia a convocatoria do proceso selectivo para a cobertura por persoal laboral fixo de 11 prazas de persoal de servicios xerais (PSX), anúnciase que a segunda proba eliminatoria do dito proceso se realizará o vindeiro día 7 de novembro de 2001 ás 18 horas no Hospital Psiquiátrico de Conxo, sito na Praza Martín Herrera nº 2 de Santiago de Compostela.
Os aspirantes que superaron a primeira proba eliminatoria do dito proceso selectivo haberán de acudir provistos do documento nacional de identidade e de bolígrafo azul ou negro. O chamamento é único polo que quedarán excluídos do proceso os aspirantes que non comparezan.
A proba será idéntica para tódolos aspirantes, e consistirá nun exercicio tipo-test de carácter teórico-práctico sobre un cuestionario de 20 preguntas con catro respostas alternativas que se atopará nun dos arquivos informáticos que se lles facilitará e conforme as instruccións que nese momento comunique a comisión de selección.
Os contidos do exercicio serán os que se estableceron no acordo de 4 de setembro de 2001 (Diario Oficial de Galicia nº 175, do 10 de setembro).
A proba será cualificada de 0 a 45 puntos, e o tempo máximo de que dispoñen os aspirantes para a súa execución será limitado e comunicado ó comezo da proba pola comisión de selección. As contestacións erróneas serán valoradas negativamente a razón dun quinto da puntuación asignada ás respostas correctas. Todos aqueles aspirantes que non acaden a puntuación mínima que estableza a comisión de selección para supera-la proba, serán cualificados directamente como non apto.
Santiago de Compostela, 15 de outubro de 2001.
Javier Bouzada Romero
Presidente da comisión de selección