Dentro do plan para a reforma e modernización administrativa é obxectivo prioritario o achegamento da Administración ós administrados co fin de facer efectivos os dereitos que se lles recoñecen ós cidadáns nas súas relacións coas administracións públicas. Para ese fin o devandito plan prevé a creación de oficinas cunha serie de funcións que exercerán baixo a dependencia orgánica e funcional da Consellería da Presidencia e Administración Pública.
A creación das devanditas oficinas supón recoller unha das contribucións máis transcendentais e positivas da Lei 30/1992, do 26 de novembro, de réxime xurídico das administracións públicas e do procedemento administrativo común, modificada pola Lei 4/1999, do 13 de xaneiro. A vontade e o compromiso desta Administración, reflectida no plan para a reforma e a modernización administrativa, convértese nunha obriga que vai coadxuvar, en definitiva, á efectividade dos dereitos dos cidadáns e facer realidade o servicio a estes, principio que ademais de xustifica-la súa existencia debe presidi-la súa actividade.
Por todo isto,
DISPOÑO:
Artigo 1º
Créase o Centro de Atención ó Cidadán en Santiago de Compostela, rúa doutor Teixeiro, nº 26, entreplanta, que dependerá orgánica e funcionalmente da Consellería da Presidencia e Administración Pública da Xunta de Galicia, e que comezará o exercicio da súa actividade a partir do día catro de outubro de dous mil un.
Artigo 2º
O centro á que fai referencia o artigo anterior exercerá as seguintes funcións:
a) Rexistro xeral de escritos, solicitudes e comunicacións dirixidas a calquera órgano da Administración autonómica de Galicia, así como a outras administracións públicas nos termos establecidos na lei.
Concluído o trámite de rexistro, daráselles traslado dos escritos, solicitudes e comunicacións ós seus destinatarios sen dilación e directamente.
b) Información xeral da Administración autonómica.
c) Información particular sobre aqueles expedientes tramitados pola Administración autonómica nos que o solicitante sexa interesado e nos termos establecidos na lei.
d) Atención e asistencia ó cidadán.
Artigo 3º
O centro ó que fai referencia o artigo 1º da presente orde contará co cadro de persoal que se estableza regulamentariamente e permitan as dispoñibilidades orzamentarias.
Disposicións derradeiras
Primeira.-O establecido nesta orde non supón incremento de gasto.
Segunda.-A presente orde entrará en vigor o día seguinte ó da súa publicación no Diario Oficial de Galicia.
Santiago de Compostela, 2 de outubro de 2001.
Jaime Pita Varela
Conselleiro da Presidencia e Administración Pública