Instruído expediente de descualificación da sociedade cooperativa, Cooperativa del Mar Nosa Cantiga, con enderezo na rúa Antonio Garelly, 24, Cangas do Morrazo (Pontevedra), ó abeiro do disposto no artigo 141 da Lei 5/1998, do 18 de decembro, de cooperativas de Galicia, e dado que no trámite de audiencia non compareceu, como tal, o órgano de administración da cooperativa nin os socios en número non inferior a tres, procédese a realiza-la publicación prevista no epígrafe b) do número 2 do devandito artigo.

En consecuencia, de acordo co establecido no artigo 84 da Lei 30/1992, de réxime xurídico das administracións públicas e do procedemento administrativo común, e no artigo 141.2º.b) citado, antes de redacta-la proposta de resolución, ponse á disposición da entidade Cooperativa del Mar Nosa Cantiga o expediente de descualificación instruído, para que, no prazo de quince días a partir do día seguinte ó da publicación da presente no Diario Oficial de Galicia, faga as alegacións e presente os documentos e xustificantes que estime pertinentes. Neste trámite de audiencia e durante o prazo indicado comparecerá o órgano de administración da sociedade cooperativa ou, no seu defecto, os socios, en número non inferior a tres, nas dependencias da Dirección Xeral de Relacións Laborais, sitas en Santiago de Compostela, nos edificios administrativos de San Caetano, bloque 5-3º andar, en horario de 9 a 14 horas de luns a venres.

Transcorrido o devandito prazo considerarase cumprido o trámite de audiencia, aínda que non se producise a comparecencia da cooperativa.

Santiago de Compostela, 9 de agosto de 2001.

José Vázquez Portomeñe

Director xeral de Relacións Laborais