Por orde da Consellería de Medio Ambiente do 3 de abril de 2001 (Diario Oficial de Galicia nº 76, do 19 de abril ) pola que se establecen as normas para a concesión de axudas a investimentos no ámbito da acuicultura en augas continentais, estableceuse no seu artigo 11, que o prazo de presentación de solicitudes e documentación sería dun mes, contado a partir do día seguinte a aquel no que tivera lugar a publicación da orde no DOG.

Tendo en conta a adaptación das instalacións existentes á normativa de pesca fluvial e de protección do medio ambiente actualmente vixentes require, en moitos casos, da elaboración e redacción de proxectos técnicos complexos e da tramitación de expedientes de autorización perante outros organismos.

Estas circunstancias particulares que concorren nos investimentos subvencionables, e coa finalidade de facilita-la presentación daqueles proxectos nos

que a súa complexidade técnica non posibilitou o comprimento dos prazos anteriormente establecidos, esta consellería considera oportuno abrir un novo prazo de presentación de solicitudes.

En consecuencia, en uso das atribucións que me confire a Lei 1/1983, do 22 de febreiro, reguladora da Xunta e do seu presidente, e do Decreto 482/1997, do 26 de decembro, polo que se establece a estructura orgánica da Consellería de Medio Ambiente,

DISPOÑO:

Artigo único.

1. Ábrese un novo prazo de presentación de solicitudes na concesión de axudas a investimentos no ámbito da acuicultura en augas continentais convocadas pola orde da Consellería de Medio Ambiente do 3 de abril de 2001, sen prexuízo da validez das presentadas con anterioridade ó abeiro da dita orde.

2. O prazo de presentación terá unha duración de vinte (20) días hábiles, e comezará a partir do día seguinte ó da publicación da presente orde no Diario Oficial de Galicia.

Santiago de Compostela, 11 de xullo de 2001.

Carlos del Álamo Jiménez

Conselleiro de Medio Ambiente