Por esta resolución, convócase a poxa para o alleamento de madeiras dos lotes que se citan no anexo, e de acordo co disposto no Decreto 244/1998, do 24 de xullo, da Consellería de Medio Ambiente e na orde da Consellería de Medio Ambiente do 8 de setembro de 1998 (DOG do 16 de setembro).
Esta poxa terá lugar no salón de actos da Delegación Provincial da Consellería da Presidencia e Administracións Públicas, sito na rúa Benito Corbal nº 47 de Pontevedra.
Para esta poxa rexerán as ordes antes citadas e mailos pregos de condicións técnico-administrativas xerais e particulares destas que figuran no expediente correspondente no Servicio de Montes e Industrias Forestais de Pontevedra, sito na rúa Benito Corbal, 47-8º desa cidade, onde poderán ser examinados polos interesados a partir do día da publicación no DOG desta resolución.
As ofertas poderanse presentar -durante os vinteseis días naturais seguintes ó da publicación no DOG desta resolución- no rexistro da Delegación Provincial da Consellería de Medio Ambiente de Pontevedra ou en calquera das formas legalmente establecidas.
A apertura das proposicións será realizada pola mesa de contratación, que se reunirá ás once horas do noveno día hábil, que non cadre en sábado, contados a partir do termo do prazo de presentación das ofertas.
Cada licitador presentará dous sobres pechados para cada oferta. O sobre «A» coa documentación administrativa e o sobre «B», coa oferta económica.
O sobre «A», que contén a documentación administrativa, poderá ser único para tódalas poxas que teñen lugar ante a mesa e na mesma sesión.
Deberá conte-la seguinte documentación:
1. Acreditación da personalidade xurídica do empresario e, se é o caso, a súa representación.
2. Os xustificantes acreditativos de que están constituídas as fianzas provisionais, 2% do prezo de taxación, de acordo co disposto no artigo 36 da Lei 53/1999 pola que se modifica a Lei de contratos das administracións públicas.
3. Declaración responsable de non estar incursa en prohibición de contratar, consonte os artigos 15 a 20 da Lei 53/1999, pola que se modifica a Lei de contratos das administracións públicas.
4. Os que acrediten a cualificación empresarial do licitador.
5. Os que acrediten encontrarse ó día no cumprimento das obrigas tributarias e da Seguridade Social impostas nas disposicións vixentes.
No caso de que o licitador estea dado de alta no Rexistro Xeral de Contratistas da Comunidade Autónoma deberá indicar na parte exterior do sobre o seu número e incluír copia da inscrición da empresa no dito rexistro e os xustificantes acreditativos das fianzas provisionais.
O sobre «B» recollerá a proposición económica e presentarase no modelo normalizado que se encontra á disposición dos interesados no Servicio de Montes e Industrias Forestais de Pontevedra. Cada un dos lotes deberá figurar nun sobre «B» individual.
O adxudicatario constituirá a fianza definitiva do 4% do prezo de adxudicación dentro dos vinte días seguintes ó da data na que regulamentariamente se lle comunique que a adxudicación é definitiva.
Dentro dese mesmo prazo deberá aboar:
1. O importe total do remate, ou o importe do primeiro prazo, segundo se indique no prego de condicións particulares de cada poxa.
2. O importe das taxas.
3. Os gastos proporcionais deste anuncio.
4. Os demais que se establezan nos pregos particulares de aproveitamento.
O adxudicatario deberá aboar, ademais das cantidades expresadas no anuncio, a porcentaxe que corresponda, segundo o réxime especial ou xeral que aplique a propiedade do monte, en concepto de IVE.
Santiago de Compostela, 23 de abril de 2001.
P.D. (Orde 12-1-1998)
José Luis Aboal García-Tuñón
Secretario xeral da Consellería de Medio
Ambiente
