O Pleno da corporación provincial, na súa sesión ordinaria do día 23 de febreiro do ano 2001, adoptou, entre outros este acordo:
Bases do Premio Otero Pedrayo.
De conformidade co dictame favorable da Comisión Informativa de Cultura e coa proposta in voce da Presidencia, o Pleno acorda por unanimidade aproba-las bases do Premio Otero Pedrayo, que son do seguinte teor:
Premio Otero Pedrayo 2001.
Segundo o teor do regulamento e correspondendo a esta deputación, convócase o Premio Otero Pedrayo 2001 de acordo coas seguintes:
Bases:
1. Convocatoria.
1.1. Convócase o Premio Otero Pedrayo 2001, dotado con cinco millóns (5.000.000) de pesetas (30.050,61 euros), atendendo ás disposicións do regulamento correspondente.
1.2. A presente convocatoria corresponde ó ano 2001, de acordo co disposto no regulamento, no que se establece o seu ámbito rexional e o seu carácter anual, convocándoo cada ano unha das deputacións provinciais da Coruña, Lugo, Ourense e Pontevedra, por esta mesma orde.
1.3. Atendendo ás razóns expostas, a tramitación e concesión do premio nesta edición atribúeselle á Deputación Provincial de Pontevedra, que consignará no seu orzamento de gastos o importe do premio (5.000.000 de pesetas-30.050,61 euros), e mailos gastos correspondentes á súa organización, e no de ingresos as sumas que deberá achegar cada unha das demais deputacións de Galicia, cotitulares do premio, na contía de 600.000 pesetas, e na de 2.600.000 pesetas a Xunta de Galicia.
2. Obxecto do premio.
O Premio Otero Pedrayo ten por obxecto:
2.1. Perpetuar e honra-la memoria do egrexio home das letras.
2.2. Premiar un labor que constitúa unha contribución eminente á cultura galega.
2.3. Promociona-los valores propios de Galicia e as obras que leven ó esclarecemento e á mellora dos seus homes e institucións.
3. Candidatos.
3.1. Poderán optar ó premio:
* As persoas naturais nadas en Galicia ou con residencia en calquera das súas catro provincias, durante un tempo dabondo para determinar, a xuízo do xurado, unha cumprida raizame nelas.
* Os grupos de traballo constituídos para este fin establecidos en Galicia.
* As personalidades ou institucións que se teñan caracterizado pola difusión e mantemento da cultura galega.
3.2. A opción ó premio determinarase por unha candidatura que poderá ser feita:
* Por calquera persoa física ou xurídica das sinaladas no número 3.1, respecto de si mesmas.
* Polas entidades académicas e culturais establecidas en Galicia, respecto dos seus membros.
* Por calquera dos presidentes das deputacións provinciais de Galicia, por proposta das respectivas comisións de Cultura.
* Pola Xunta de Galicia, oída a consellería correspondente.
* Polo mesmo xurado, xa constituído.
4. Tramitación.
4.1. A presentación de candidatos/as ó premio será formulada nun escrito dirixido ó presidente da Deputación Provincial de Pontevedra, achegando os seguintes documentos:
* Nota biográfica da persoa que aspira ó premio.
* Documentos e antecedentes que se consideren de interese para o coñecemento da súa dimensión literaria ou científica.
* Cinco exemplares, mecanografados a dobre espacio, do traballo co que se opta ó premio, no caso de que a proposta estea baseada nunha obra ou producción singular concreta.
* No caso de personalidades e institucións, un exemplar do regulamento ou estatutos polos que se rexan e unha relación das tarefas levadas a cabo en relación co obxecto do premio.
4.2. A presentación de candidatos/as realizarase no prazo de tres meses a partir do día seguinte ó da publicación desta convocatoria no BOP de Pontevedra.
Tal publicación realizarase tamén nos boletíns oficiais das provincias da Coruña, Lugo e Ourense, no DOG e nos xornais de máis difusión da Comunidade Autónoma.
4.3. A presentación do/da candidato/a determina a aceptación íntegra das condicións desta convocatoria e das contidas no regulamento do premio.
4.4. Rematado o prazo ó que se refire o número 4.2., a Secretaría da Deputación de Pontevedra expedirá unha certificación das propostas presentadas que, xunto con elas e coa documentación correspondente, pasarán ó xurado do premio.
4.5. A cada solicitude ou proposta xuntaránselle cantos documentos sexan considerados de interese para o mellor coñecemento do/da candidato/a.
5. Xurado e actuacións.
5.1. Para adxudica-lo premio ó que se refire esta convocatoria constituirase un xurado integrado da maneira seguinte:
* Presidente: o da Xunta de Galicia.
* Vicepresidente: o presidente da deputación que convoca o premio, que este ano lle corresponde á Deputación de Pontevedra.
* Vocais:
* Os presidentes das tres deputacións restantes ou persoas nas que deleguen.
* O presidente da Comisión de Cultura da deputación convocante.
* O conselleiro de Cultura da Xunta de Galicia.
* Un representante de cada un dos seguintes organismos:
a) Universidade de Santiago de Compostela.
b) Universidade de Vigo.
c) Universidade da Coruña.
d) Real Academia Galega.
e) Instituto Padre Sarmiento de Estudios Galegos.
* Cinco persoas de recoñecida autoridade científica e literaria designadas pola Xunta de Galicia e por cada unha das deputacións.
* Secretario, con voz e sen voto, o da Deputación de Pontevedra.
5.2. O xurado constituído emitirá o seu dictame no mes seguinte ó día en que remate o prazo de presentación de candidatos/as, e a súa actuación suxeitarase ó determinado nos artigos 4.2º a 4.6º do regulamento do premio.
5.3. Da actuación do xurado e da adxudicación do premio será redactada acta detallada que, asinada polos membros e coa totalidade das documentacións presentadas, pasará a coñecemento do Pleno da deputación convocante na primeira sesión que teña lugar.
5.4. Unha copia da acta e dos demais antecedentes que cumpran, para o coñecemento da tramitación do premio remitiráselles ás deputacións da Coruña, Lugo e Ourense.
6. Entrega do premio.
A entrega do premio realizarase no lugar e a data que determine o presidente da Deputación de Pontevedra, nun acto solemne e coa asistencia dos membros da corporación provincial e do xurado, así como de personalidades das artes, letras e ciencias da Comunidade Autónoma.
Xunto co premio, o/a galardoado/a recibirá unha copia da acta da reunión do xurado.
7. Normas supletorias.
No que non estea previsto expresamente nestas bases, o xurado e a deputación convocante terán en conta as normas contidas no regulamento do premio e nos xerais do funcionamento da corporación provincial.
O que lle comunico a vde. para o seu coñecemento e efectos, coa excepción que establece o artigo 206 do ROF.
Pontevedra, 16 de marzo de 2001.
O secretario
Rubricado
Secretario xeral da Consellería da Presidencia e Administración Pública.