O punto 1 da base décima da Resolución do 29 de xaneiro de 2001 (DOG nº 26, do 6 de febreiro), pola que se convoca concurso de traslados para a cobertura de postos de traballo de persoal sanitario funcionario incluído baixo o ámbito de aplicación da Lei 17/1989, do 23 de outubro, pertencentes ás clases de inspectores médicos, inspectores farmacéuticos e subinspectores sanitarios, dispón que unha vez publicada no Diario Oficial de Galicia a resolución definitiva da primeira fase do concurso, a División de Recursos Humanos do Servicio Galego de Saúde dictará resolución mediante a que se dará a oportuna publicidade ós postos vacantes que se ofertarán nesta fase da convocatoria, e citará a tódolos aspirantes que superaron o concurso-oposición convocado por Resolución do 23 de xullo de 1997 (DOG nº 146, do 31 de xullo), modificada pola Resolución do 28 de decembro de 1998 (DOG nº 6, do 12 de xaneiro de 1999), para que en único chamamento e acto elixan obrigatoriamente destino definitivo

pola orde de puntuación final do dito proceso selectivo na clase correspondente, con preferencia a prol dos aspirantes que, de se-lo caso, accedesen pola quenda de promoción interna.

Por todo isto, este centro directivo

ACORDA:

Primeiro.-Aproba-la relación de postos vacantes que se ofertan na segunda fase do concurso de traslados convocado pola Resolución do 29 de xaneiro

de 2001 ós aspirantes seleccionados no citado concurso-oposición para o ingreso nas clases de inspectores médicos, inspectores farmacéuticos e subinspectores sanitarios do Servicio Galego de Saúde, que se inclúen no anexo desta resolución.

Segundo.-Convocar a tódolos aspirantes para que nun único chamamento e acto elixan obrigatoriamente destino definitivo, pola orde de puntuación final do respectivo concurso-oposición, con preferencia a prol dos aspirantes que, de se-lo caso, accedesen polo sistema de promoción interna, que terá lugar o vindeiro día 7 de maio, na sede da División de Recursos Humanos do Sergas, sita en San Lázaro s/n, en Santiago de Compostela, ás once horas para as clases de inspección farmacéutica e subinspección sanitaria, e ás once trinta horas para a clase de inspección médica.

Terceiro.-A solicitude será vinculante e irrenunciable. Os interesados deberán comparecer provistos do documento nacional de identidade ou doutro documento que concrete de modo fidedigno a súa personalidade. Os aspirantes que non comparezan persoalmente poderán ser representados por terceiras persoas provistas de poder suficiente.

Para este efecto terán a consideración de poder suficiente os poderes notariais ou os poderes outorgados con carácter previo ó acto de elección de destino ante a División de Recursos Humanos do Sergas, mediante comparecencia expresa do poderdante e do apoderado.

Non obstante o disposto nos parágrafos anteriores, non estarán obrigados a elixir destino definitivo nesta fase do concurso os funcionarios de novo ingreso que se atopen desempeñando un posto de traballo de libre designación a través da correspondente convocatoria pública, nin os que, sendo tamén de novo ingreso se atopen na situación de excedencia voluntaria prevista no artigo 55.1º da Lei 4/1988, do 26 de maio, da función pública de Galicia, modificado pola Lei 3/1995, do 10 de abril.

Santiago de Compostela, 20 de abril de 2001.

Valeriano Martínez García

Director xeral da División de Recursos Humanos

ANEXO

Vacantes 2ª fase do concurso

A) Inspectores médicos

B) Inspectores farmacéuticos

C) Subinspectores sanitarios