O Real decreto 2112/1998, do 2 de outubro, polo que se regulan os concursos de traslados de ámbito nacional para a provisión de prazas correspondentes ós corpos docentes, establece, na disposición adicional décimo cuarta, que dentro do ámbito territorial que as administracións educativas determinen, nos casos en que se produza un cambio de ensinanzas dun centro para outro, os profesores das especialidades afectadas quedarán adscritos ó novo centro, mantendo para tódolos efectos a antigüidade que posuían no centro de orixe.

A progresiva implantación das novas ensinanzas de formación profesional levou a que determinados ciclos formativos se impartan en centros diferentes daqueles en que se impartían as ensinanzas da for

mación profesional en vía de extinción ou mesmo que ciclos formativos autorizados a impartirse nun centro sexan definitivamente implantados noutro.

Coa finalidade de regulariza-la situación do profesorado, e por proposta da Dirección Xeral de Persoal e da Dirección Xeral de Centros e Inspección Educativa, a Consellería de Educación e Ordenación Universitaria

DISPÓN:

Primeiro.-Considéranse traslado de ensinanzas, para os efectos previstos no Real decreto 2112/1998, do 2 de outubro, as que se relacionan no anexo I da presente orde.

Segundo.-Os profesores que se relacionan no anexo II quedan adscritos definitivamente ó centro que se indica, mantendo para tódolos efectos a antigüidade que posuían no centro de orixe.

Terceiro.-En canto non se extingan totalmente as ensinanzas de formación profesional de segundo grao, as delegacións provinciais da Consellería de Educación e Ordenación Universitaria poderá realizar adscricións de profesorado de carácter provisional.

Cuarto.-As delegacións provinciais emitirán dilixencia da toma de posesión no novo destino do profesorado relacionado no anexo II da presente orde, facendo constar expresamente que manteñen para tódolos efectos a antigüidade que posuían no centro de orixe.

Santiago de Compostela, 1 de marzo de 2001.

Celso Currás Fernández

Conselleiro de Educación e Ordenación

Universitaria

ANEXO I

Provincia: A Coruña, localidade A Coruña.

Provincia: Lugo, localidades Ribadeo e Burela.

Provincia: Ourense, localidade Ourense.

Provincia: Pontevedra, localidades Pontevedra e Vigo.

ANEXO II