Dentro do programa de actividades que a Academia Galega de Seguridade ten previsto realizar no ano 2001, conforme as funcións que ten encomendadas pola Lei 4/1992, do 9 de abril, de creación da Academia Galega de Seguridade, anúnciase a realización de un curso superior de protección civil, que se desenvolverán conforme as seguintes bases:

Obxectivos.

A formación, capacitación e perfeccionamento profesional do persoal técnico en temas de protección civil, tendo en conta as súas funcións de responsabilidade na planificación, coordinación, dirección e toma de decisións en todo tipo de emerxencias.

Destinatarios.

-Persoal técnico de protección civil da Administración autónoma de Galicia.

-Persoal técnico, funcionarios con responsabilidade en protección civil da Administración local (bombeiros, policía local, funcionarios municipais con responsabilidade en protección civil) e da Administración xeral do Estado.

-Xefes ou responsables das agrupacións de voluntarios de protección civil da Comunidade Autónoma de Galicia, que teñan realizado o curso básico e cando menos dous de segundo nivel.

Inscrición.

A inscrición dos participantes será totalmente gratuíta.

Solicitudes.

1. As persoas que desexen participar neste curso presentarán, cuberta á máquina ou con letra moi clara, a instancia que figura no anexo.

2. O prazo para a presentación de instancias será de 15 días naturais a partir do día seguinte ó da publicación desta resolución no Diario Oficial de Galicia.

3. As instancias deberán enviarse á sede da Academia Galega de Seguridade: avenida da Cultura, 36680, A Estrada, ou ben poden entregarse en calquera dos lugares previstos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.

Contido.

O curso consta de doce módulos con clases técnico-prácticas:

Módulo I: normativa legal. Protección civil como servicio público. Agrupacións de voluntariado de protección civil. Responsabilidade civil e penal do servicio do voluntariado de protección civil.

Módulo II: riscos naturais. Temporais, choivas, nevaradas, ventos fortes.

Módulo III: riscos tecnolóxicos. Risco químico, mercadorías perigosas.

Módulo IV: incendios urbanos e forestais.

Módulo V: accidentes marítimos.

Módulo VI: tráfico e seguridade vial.

Módulo VII: cartografía, orientación e localización.

Módulo VIII: asistencia sanitaria en accidentes e catástrofes.

Módulo IX: o apoio psicolóxico en situacións de catástrofes.

Módulo X: planificación e análise de riscos.

Módulo XI: xestións e dirección de emerxencias.

Módulo XII: a información en protección civil: información á poboación a través dos medios de comunicación.

Duración e datas.

O curso dará comezo o día 18 de abril de 2001, e terá unha duración de 120 horas lectivas.

O curso desenvolverase ós mércores todo o día.

O horario será o seguinte:

-Mañás: das 9.30 ás 14 horas.

-Tardes: das 16 ás 19.30.

Prazas.

O número máximo de prazas ofertadas para este curso é de 27.

Relación de admitidos.

Unha vez recibidas as solicitudes presentadas farase unha entrevista persoal que será selectiva.

A relación de admitidos publicarase o día 9 de abril de 2001 no taboleiro de anuncios da Academia Galega de Seguridade, ou ben poden confirma-la súa asistencia chamando ó teléfono 986 59 00 21.

Lugar.

O curso realizarase na sede da Academia Galega de Seguridade no concello da Estrada.

Asistencia.

É obrigatoria a asistencia e puntualidade en tódalas actividades do curso. A falta de asistencia, aínda cando sexa xustificada, a máis dun 10% das horas lectivas programadas, determinará a calificación de «non apto» no curso.

Certificado de aproveitamento.

Ó remate do curso entregaráselles un certificado de asistencia e aproveitamento a aquelas persoas que acrediten a súa asistencia continuada a el e superen as correspondentes probas de coñecementos e a realización dun traballo.

Modificacións.

A Academia Galega de Seguridade poderá modifica-lo desenvolvemento do curso para adaptalo ás necesidades da Administración e ás continxencias que poidan xurdir.

A Estrada, 26 de febreiro de 2001.

Juan José Fariñas-Ferro Rodríguez

Director xeral da Academia Galega de Seguridade