Dentro do programa de actividades que a Academia Galega de Seguridade ten previsto realizar no ano 2001, conforme as funcións que ten encomendadas pola Lei 4/1992, do 9 de abril, de creación da Academia Galega de Seguridade, anúnciase a realización de dous cursos de 2º nivel de busca e salvamento en montaña e zonas illadas de difícil acceso que se desenvolverán conforme as seguintes bases:
Obxectivos.
Dota-lo persoal voluntario de protección civil dos coñecementos teórico-prácticos para desempeñar tarefas de busca e salvamento na montañas e zonas illadas e difícil acceso.
Destinatarios.
Os cursos van dirixidos ós membros das agrupacións de voluntarios de protección civil da Comunidade Autónoma de Galicia que previamente superasen o curso básico de protección civil.
Inscrición.
A inscrición dos participantes será totalmente gratuíta.
Solicitudes.
1. As persoas que desexen participar nestes cursos presentarán, cuberta á máquina ou con letra moi clara, a instancia que figura no anexo.
2. O prazo para a presentación de instancias rematará o día 31 de marzo de 2001, ás 14 horas.
3. As instancias serán enviadas polo presidente da agrupación correspondente, á sede da Academia Galega de Seguridade: Avenida da Cultura, 36680, A Estrada, ou ben poden entregarse en calquera dos lugares previstos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.
Contido.
Xeneralidades. Coordinación do socorro. Protocolos de busca. Distribución de tarefas. Orografía e cartografía. Lectura e interpretación de mapas. Principios básicos de orientación e utilización do compás. Métodos de busca de persoas desaparecidas. Busca en situacións especiais. Técnicas de busca
e salvamento en zonas de difícil acceso. Axentes agresores na montaña. Actuación en situacións de risco vital. Técnicas de inmobilización e traslado con medios convencionais e improvisados. Consellos prácticos para a prevención de accidentes.
Duración e datas.
Os cursos celebraranse ó longo do ano 2001 e terán unha duración de 35 horas lectivas, en xornadas de mañá e tarde.
O primeiro curso realizarase nas datas 2-3-9-10-16-17 de xuño, na provincia de Lugo.
O segundo curso realizarase nas datas 6-7-13-14-20-21 de outubro, na provincia de Ourense.
Prazas.
O número máximo de prazas ofertadas para cada curso é de 30.
Relación de admitidos.
A relación de admitidos publicarase o día 27 de abril de 2001 no taboleiro de anuncios da Academia Galega de Seguridade, ou ben poden confirma-la súa asistencia chamando ó teléfono 986 59 00 21.
Lugar.
Nas provincias de Lugo e Ourense determinarase no seu día o lugar concreto en virtude da climatoloxía existente.
Asistencia.
É obrigatoria a asistencia e puntualidade en tódalas actividades do curso. A falta de asistencia, aínda cando sexa xustificada, a máis dun 10% das horas lectivas programadas, determinará a cualificación de «non apto» no curso.
Certificado de aproveitamento.
Á fin do curso entregaráselles un certificado de asistencia e aproveitamento a aquelas persoas que acrediten a súa asistencia continuada a el e superen as correspondentes probas de coñecementos.
Modificacións.
A Academia Galega de Seguridade poderá modifica-lo desenvolvemento dos cursos para adaptalos ás necesidades da Administración e ás continxencias que poidan xurdir.
A Estrada, 26 de febreiro de 2001.
Juan José Fariñas-Ferro Rodríguez
Director xeral da Academia Galega de Seguridade