Examinado o expediente instruído por instancia do titular do centro privado Hogar de Santa Margarita da Coruña, no que solicita cambio de denominación e autorización definitiva para impartir educación secundaria obrigatoria, bacharelato das modalidades de ciencias da natureza e da saúde e humanidades e ciencias sociais.
Vistos a Lei 1/1990, do 3 de outubro (BOE do 4), de ordenación xeral do sistema educativo, Real decreto 1004/1991, do 14 de xuño (BOE do 26), polo que se establecen os requisitos mínimos dos centros que imparten ensinanzas de réxime xeral non universitarias, Decreto 133/1995, do 10 de maio (DOG do 22), sobre autorización de centros docentes privados para impartir ensinanzas de réxime xeral non universitarias e a Orde do 20 de setembro de 1995 (DOG do 15 de decembro) que o desenvolve.
Tendo en conta os informes da Delegación Provincial da Consellería de Educación e Ordenación Universitaria da Coruña, así como o recollido na disposición transitoria terceira, letra c) do Real decreto 1004/1991, no referente ó bacharelato.
Esta consellería, por proposta da Dirección Xeral de Centros e Inspección Educativa,
DISPÓN:
Primeiro.-Autoriza-lo cambio de denominación do centro privado Hogar de Santa Margarita pasando a denominarse Fogar de Santa Margarida.
Segundo.-Autoriza-lo centro privado Fogar de Santa Margarida da Coruña, para impartir educación secundaria obrigatoria e bacharelato das modalidades de ciencias da natureza e da saúde e humanidades e ciencias sociais, segundo se especifica no anexo desta orde.
Terceiro.-Para as ensinanzas que se autorizan, a Delegación Provincial da Consellería de Educación e Ordenación Universitaria, logo do informe da Inspección Educativa, aprobará expresamente a relación de persoal que imparta docencia no dito centro.
Cuarto.-Queda o centro obrigado ó cumprimento da lexislación vixente e a solicita-la oportuna revisión cando teña que modificarse calquera dos datos que sinala a presente orde.
Quinto.-Contra esta orde, que esgota a vía administrativa, os interesados poderán interpoñer recurso potestativo de reposición perante o conselleiro de
Educación e Ordenación Universitaria, no prazo dun mes, a partir do día siguiente ó da súa publicación no Diario Oficial de Galicia, segundo o disposto nos artigos 116 e 117 da Lei 4/1999 (BOE do 14 de xaneiro), de modificación da Lei 30/1992, de réxime xurídico das administracións públicas e do procedemento administrativo común, ou ben directamente o recurso contencioso-administrativo no prazo do dous meses perante o Tribunal Superior de Xustiza de Galicia.
Santiago de Compostela, 9 de febreiro de 2001.
Celso Currás Fernández
Conselleiro de Educación e Ordenación
Universitaria
ANEXO
Provincia: A Coruña.
Concello: A Coruña.
Localidade: A Coruña.
Enderezo: Valle Inclán 1 e 3.
Código do centro: 15004794.
Denominación anterior: Hogar de Santa Margarita.
Nova denominación: Fogar de Santa Margarida.
Titular: Patronato Hogar Santa Margarita.
Composición resultante:
a) Centro de educación infantil: 9 unidades.
b) Centro de educación primaria: 18 unidades.
c) Centro de educación secundaria:
-12 unidades de educación secundaria obrigatoria.
-6 unidades de bacharelato das modalidades de ciencias da natureza e da saúde e humanidades e ciencias sociais.
d) Centro de formación profesional específica:
-2 ciclos formativos de grao medio de comercio (2 unidades, 30 postos escolares/unidade).