Dentro dos programas de actividades que a Academia Galega de Seguridade ten previsto realizar no ano 2001, e conforme as funcións atribuídas pola Lei 4/1992, do 9 de abril, de creación da Academia Galega de Seguridade, anúnciase a celebración dun curso sobre medición de ruídos, que deberá desenvolverse conforme as seguintes bases:

Obxectivos.

O curso ten por obxectivo dota-los policías dunha formación teórico-práctica que lles permita realiza-las súas funcións nos temas de control e medición de ruído en zonas e/ou locais públicos, así como o coñecemento e manexo dos aparellos utilizados nestas funcións.

Destinatarios.

O curso vai dirixido ó persoal de inspección da Consellería de Medio Ambiente, coa que se asinará o oportuno convenio; ós membros da Unidade do C.N.P. adscrita á Comunidade Autónoma de Galicia (ámbolos dous colectivos xa teñen fixado o número de participantes), e ós membros dos corpos das policías locais de Galicia.

Inscrición.

A inscrición dos participantes será totalmente gratuíta.

Prazas.

O número de prazas que se ofertarán para a policía local neste curso será de 29, repartidas do seguinte xeito:

-Concellos da provincia da Coruña: 9.

-Concellos da provincia de Lugo: 4.

-Concellos da provincia de Ourense: 5.

-Concellos da provincia de Pontevedra: 11.

Solicitudes.

1. O persoal que desexe participar neste curso deberá presentar cuberta a máquina ou con letra moi clara a instancia que figura no anexo.

2. O prazo para a presentación de instancias rematará o día 8 de marzo, ás 14 horas.

3. As instancias deberán vir asinadas polo xefe do cadro de persoal ou polo concelleiro de tráfico, e seladas; será isto requisito indispensable para ser admitido no curso; o incumprimento deste requisito significará á non admisión no devandito curso.

4. As instancias deberán enviarse á Academia Galega de Seguridade sita na avenida da Cultura, s/n, no concello da Estrada, ou ben poden entregarse en calquera dos lugares previstos no artigo 38.4º da Lei 30/1992, do 26 de novembro, de réxime xurí

dico das administracións públicas e do procedemento administrativo común.

Contido e duración.

O curso celebrarase en sesións de mañá e tarde, de luns a venres, e nel trataranse, entre outros, os seguintes temas:

a) Conceptos básicos aplicados á Lei e regulamento de Galicia.

b) Orde ministerial 29929 de decembro de 1998 sobre verificación e aprobación de modelo de sonómetros e calibradores acústicos.

c) Manexo do sonómetro 2236.

d) Prácticas de medida.

e) Casos prácticos.

Datas.

O curso celebrarase do 19 ó 23 de marzo, coa seguinte distribución horaria:

Horario: mañás de 9.30 a 13.30 horas, e tardes de 16 a 19 horas.

Día 19: tódalas provincias pola mañá, e pola tarde só os pertencentes á provincia da Coruña.

Día 20: toda a xornada só os pertencentes á provincia da Coruña.

Día 21: toda a xornada só os pertencentes ás provincias de Lugo e Ourense.

Día 22: pola mañá os pertencentes ás provincias de Lugo e Ourense e pola tarde os pertencentes á provincia de Pontevedra.

Día 23: toda a xornada só os pertencentes á provincia de Pontevedra.

Relación de admitidos.

A relación de admitidos publicarase o día 9 de marzo, no taboleiro de anuncios da Academia Galega de Seguridade, ou ben poden confirma-la súa asistencia chamando ó teléfono 986 59 00 21.

Lugar.

O curso desenvolverase na sede da Academia Galega de Seguridade, sita no concello da Estrada.

Certificado de aproveitamento.

Ó remate do curso entregaráselle un certificado de aproveitamento a aquelas persoas que acrediten a súa participación continuada nel e superen as correspondentes probas.

Modificacións.

A Academia Galega de Seguridade poderá modifica-lo desenvolvemento do curso para adaptalo ás necesidades da Administración e ás continxencias que poidan xurdir.

A Estrada, 24 de xaneiro de 2001.

Juan José Fariñas-Ferro Rodríguez

Director xeral da Academia Galega de Seguridade