A Administración educativa de Galicia garante que os alumnos, conforme van acabando cada un dos ciclos nos que o ensino do galego é obrigatorio, vaian acadando un dominio oral e escrito similar dos idiomas galego e castelán, tal e como determina o artigo 14º.3 da Lei 3/1983, de normalización lingüística.
Para poder conseguir iso, esta mesma lei encoméndalle á Xunta de Galicia a regulamentación no ensino do uso desas dúas linguas oficiais en Galicia. Esa regulamentación está establecida nos decretos 247/1995 e 66/1997.
Como órgano impulsor e dinamizador das medidas necesarias para levar a cabo o que dispoñen eses decretos e, consecuentemente, para conseguir que os alumnos acaden o dominio do galego que establece a Lei de normalización lingüística, cada centro individualmente ten que constituír un equipo de normalización lingüística. Este equipo é o que recollen os decretos 324/1996, do 26 de xullo (DOG do 9 de agosto) e 374/1996, do 17 de outubro (DOG do
21 de outubro), polos que se aproban os regulamentos orgánicos dos institutos de educación secundaria e das escolas de educación infantil e dos colexios de educación primaria, respectivamente, decretos que foron desenvolvidos, tamén respectivamente, polas ordes do 22 de xullo e do 1 de agosto de 1997 (publicadas no DOG do 2 de setembro).
Por todo isto, para asegura-los principios de publicidade, concorrencia e obxectividade e para axudar a que eses equipos poidan levar a cabo aqueles proxectos que incidan na promoción do galego, a Consellería de Educación e Ordenación Universitaria
DISPÓN:
Artigo 1º
1. A presente orde ten por obxecto convocar axudas económicas en réxime de concorrencia competitiva destinadas a contribuír ó financiamento daqueles proxectos que incidan directamente na promoción do galego nas aulas, que realicen no curso académico 2000/2001 os equipos de normalización lingüística dos centros privados (concertados e non concertados) de educación infantil, especial, de adultos, primaria, secundaria, bacharelato e formación profesional de Galicia. Estes equipos son os constituídos de acordo co establecido nos decretos 324/1996 e 374/1996.
2. Os proxectos e os traballos para os que se solicite axuda serán os contidos na programación anual de
actividades elaboradas e aprobadas por cada centro para acada-los obxectivos recollidos nos plans específico e xeral para o uso do idioma galego (artigos 83 e 64 dos decretos 324/1996 e 374/1996, respectivamente) e os obxectivos previstos nos decretos 247/1995 e 66/1997.
Artigo 2º
As axudas destinaranse preferentemente a:
1. A adquisición de material didáctico, bibliográfico, fonográfico, videográfico e informático en galego, imprescindible para a realización dos proxectos.
2. Os gastos de material necesario para:
a) A elaboración e/ou a disposición dos materiais pedagóxicos precisos para a realización de proxectos que incidan na promoción do galego nas diferentes etapas educativas. Ten especial interese a realización de accións e proxectos innovadores de promoción do uso do galego nas aulas e na comunidade educativa.
b) A organización de programas e actividades en galego, que teñan como finalidade o fomento do uso da lingua propia de Galicia entre os distintos compoñentes da comunidade educativa do centro.
Artigo 3º
As axudas financiaranse con cargo á partida orzamentaria 07.06.353E.471.0, dos orzamentos xerais da Comunidade Autónoma de Galicia para o ano 2001, por unha contía máxima total de 8.400.000 pesetas (oito millóns catrocentas mil pesetas).
Artigo 4º
1. Para acceder a estas axudas será necesario que o equipo de normalización lingüística estea formalmente constituído segundo o disposto nos artigos 82 do Decreto 324/1996 e 63 do Decreto 374/1996, e que o seu programa de actividades fose aprobado polo centro e enviado canda a programación xeral anual á inspección educativa.
2. Non se lles poderá conceder axuda económica ningunha a aqueles centros que non xustificasen debidamente as axudas que lles fosen concedidas para o ano académico 1999/2000 ó abeiro da Orde do 13 de decembro de 1999 (DOG nº 11, do 18 de xaneiro de 2000), ou que non cumpran o sinalado no artigo 5º.4 desta orde.
En canto ó disposto nos puntos 1 e 2 deste artigo, será a inspección educativa a que lle presente á correspondente comisión avaliativa citada no artigo 6º desta orde o informe relativo a cada centro.
Artigo 5º
1. O prazo de presentación das solicitudes será o dos 20 días hábiles, contados a partir do día seguinte ó da publicación desta orde no DOG.
2. As solicitudes realizaranse utilizando o formulario que figura como anexo a esta orde. Irán asinadas polo coordinador do equipo de normalización lingüística, co visto e prace do director do centro, e
mandaranse á delegación provincial da Consellería de Educación e Ordenación Universitaria correspondente, sendo de aplicación o previsto no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.
3. Canda a solicitude presentarase un proxecto, asinado polo coordinador do equipo de normalización lingüística, co visto e prace do director do centro, no que se especifiquen, englobándoas no punto correspondente do artigo 2º, as actividades previstas para acada-los obxectivos que figuran nos plans específico e xeral para o uso do galego. Con cada unha das accións terá que figura-la súa cuantificación económica. No caso das actividades de prensa escolar, considerarase como mérito preferente o feito de que esas actividades se levasen a cabo tamén en anos anteriores. Se se dá esa circunstancia, deberase achegar canda a solicitude un exemplar de cada un dos números editados.
4. Tanto o proxecto coma as actividades que se realicen para levalo á práctica faranse necesariamente segundo o establecido na Lei 3/1983, do 15 de xuño, de normalización lingüística (disposición adicional) e no Decreto 173/1982, do 17 de novembro, sobre normativización da lingua galega.
5. No caso de que o centro fixese outras solicitudes diante de administracións públicas competentes ou outros entes públicos para o mesmo proxecto ou actividade, xuntará á solicitude unha declaración do conxunto de tódalas peticións efectuadas.
6. Se se observase algunha falta na documentación, antes de realiza-la proposta de resolución, poráselles de manifesto ós solicitantes para que, no prazo de dez días, poidan alegar e presenta-los documentos e xustificacións que estimen pertinentes.
Artigo 6º
Para o exame e a avaliación das solicitudes constituirase en cada delegación provincial da Consellería de Educación e Ordenación Universitaria unha comisión integrada por:
-O delegado provincial, que a presidirá.
-Un representante do Servicio de Plans e Programas do Ensino da Lingua Galega, da Dirección Xeral de Política Lingüística.
-Un inspector ou inspectora de Educación.
-O xefe do Gabinete de Normalización Lingüística.
-Un funcionario ou funcionaria da delegación provincial, que actuará de secretario.
Unha vez examinadas e avaliadas as solicitudes, as comisións presentaranlle as propostas de concesión ó conselleiro de Educación e Ordenación Universitaria, o cal resolverá. Contra esta resolución, os interesados poderán interpoñer recurso potestativo de reposición diante do conselleiro de Educación e Ordenación Universitaria, no prazo dun mes, contado a partir do día seguinte ó da súa notificación,
segundo o disposto nos artigos 116 e 117 da Lei 30/1992, do réxime xurídico das administracións públicas e do procedemento administrativo común, modificada pola Lei 4/1999, ou ben, directamente, o recurso contencioso-administrativo, no prazo de dous meses diante do Tribunal Superior de Xustiza de Galicia.
As solicitudes entenderanse desestimadas de non recaer resolución expresa no prazo de seis meses, contados a partir da publicación desta convocatoria no DOG.
Artigo 7º
As comisións de selección terán en conta os seguintes criterios para a concesión de axudas:
1. Ten especial interese a realización de accións e proxectos innovadores de promoción do uso do galego.
2. Así mesmo, valorarase a organización de programas e actividades en galego, que teñan como finalidade o fomento do uso da lingua propia de Galicia entre os distintos compoñentes da comunidade educativa do centro.
3. Calquera tipo de programacións ou actuacións que incidan na normalización do galego e/ou na mellora do seu ensino.
4. De acordo cos apartados anteriores clasificaranse as solicitudes en tres grupos, A, B e C, establecendo unha contía media para cada grupo:
Menos de 8 unidades De 8 a 16 unidades Máis de 16 unidades
A Ata 100.000 ptas. Ata 120.000 ptas. Ata 140.000 ptas.
B Ata 70.000 ptas. Ata 80.000 ptas. Ata 90.000 ptas.
C Ata 40.000 ptas. Ata 50.000 ptas. Ata 60.000 ptas.
5. En cada grupo dos anteriores, atendendo ó número de alumnos por centro, incrementarase ou reducirase a contía de cada proxecto.
6. Excluiranse aquelas solicitudes que non se recibiron dentro do prazo.
7. A percepción doutras axudas para os mesmos proxectos poderá reduci-la contía da subvención que recibiría por esta orde, de xeito que o conxunto de axudas non supere os gastos totais do proxecto.
Artigo 8º
Antes do 15 de novembro de 2001, cada equipo ó que se lle concedese axuda, coa conformidade da dirección do centro, terá que lles remitir ós gabinetes de normalización lingüística das delegacións provinciais da Consellería de Educación e Ordenación Universitaria a seguinte documentación:
1. Unha memoria das actividades realizadas durante o ano 2001 para as que se lle concedeu a axuda.
2. Facturas orixinais, expedidas ó nome do propio centro educativo, correspondentes ós gastos de mate
rial ocasionados pola súa realización por un importe igual, sen IVA, ó da axuda concedida.
3. Certificación expresas de non ter contraído ningunha débeda, por ningún concepto coa Xunta de Galicia, e de estar ó día das obricas coa Axencia Tributaria e coa Seguridade Social.
4. Certificación orixinal na que consten os datos bancarios, selada e asinada pola entidade financeira.
5. Fotocopia do CIF do centro.
Artigo 9º
1. O pagamento das axudas concedidas farao a Consellería de Educación e Ordenación Universitaria a través das súas delegacións provinciais, logo da xustificación dos interesados, tal como se indica no artigo 8º.
2. O importe da axuda non será superior ó 100% dos gastos, sen IVE, que leve consigo a realización do proxecto.
Artigo 10º
O seguimento e a avaliación dos traballos para os que se lles conceden as axudas ós equipos, e a verificación do cumprimento do establecido nos plans específico e xeral para o uso do galego nos centros levaraos a cabo a inspección educativa, consonte o disposto no artigo 11 do Decreto 247/1995.
Artigo 11º
1. A non entrega das memorias e dos xustificantes de gasto, ós que fai referencia o artigo 8º, no prazo sinalado poderá ser causa de revogación da axuda concedida e producirá como efecto a denegación de axuda para o ano seguinte, procedendo o centro ó reintegro da cantidade percibida, sen prexuízo das responsabilidades que se poidan esixir.
2. O incumprimento total ou parcial dos proxectos poderá anular ou modifica-la contía da subvención concedida.
3. Toda alteración das condicións tidas en conta para a concesión da subvención, e en todo caso a obtención concorrente de subvención ou axudas outorgadas por outras administracións ou entes públicos ou privados, poderá dar lugar á modificación da resolución de concesión.
Disposicións derradeiras
Primeira.-Facúltase o director xeral de Política Lingüística para dictar, no ámbito das súas competencias, as resolucións precisas para o desenvolvemento desta orde.
Segunda.-Esta orde entrará en vigor o día seguinte ó da súa publicación no Diario Oficial de Galicia.
Santiago de Compostela, 2 de febreiro de 2001.
Celso Currás Fernández
Conselleiro de Educación e Ordenación Universitaria