O Consello da Xerencia Municipal de Urbanismo, en sesión do 19 de outubro de 2000, adoptou, entre outros, o seguinte acordo:

Primeiro.-Aprobar definitivamente o proxecto de urbanización que desenvolve a modificación do estu

dio de detalle da U.E.II-08 Coruña (expediente 4210/401), presentado pola entidade Hijos de Ismael Rodríguez, S.L., redactado polo enxeñeiro de camiños, canles e portos Eloy Fernández-Valdés Martínez-Estéllez, con visados do seu colexio profesional de datas 17-3-2000, 25-5-2000 e 17-8-2000.

Segundo.-Antes do inicio das obras e como condición suspensiva dos efectos do presente acordo de aprobación definitiva, a interesada deberá presentar un aval polo 100% do orzamento das obras e que ascende a 42.617.415 pesetas.

Terceiro.-Á vista do informe do xefe de Patrimonio Histórico, do 16 de xuño de 2000, referido nos antecedentes deste acordo, inicie esta administración municipal as actuacións encamiñadas á adquisición amigable do hórreo existente na parcela sinalada co nº 10 da primeira travesía da rúa Coruña, coa advertencia á interesada de que o hórreo ten presuntamente carácter de ben de interese cultural e que calquera opción de desmontaxe ou desprazamento deberá ser previamente autorizada pola Consellería de Cultura da Xunta de Galicia.

Cuarto.-Continúen os servicios de Xestión e Disciplina Urbanística da Xerencia Municipal de Urbanismo as actuacións iniciadas conducentes ó remate da ampliación da primeira travesía da rúa Coruña, co fin de contar cun viario completo nas condicións que prevé o vixente PXOU de Vigo.

Quinto.-Somete-lo acordo de aprobación definitiva do proxecto a publicación no DOG e no BOP, así como con notificación persoal ós interesados.

Contra o devandito acordo, que pon fín a vía administrativa, poderán interpoñerse os seguintes recursos:

a) Potestativo de reposición ante o Consello da Xerencia Municipal de Urbanismo de Vigo no prazo dun mes a partir do día seguinte ó da publicación do presente anuncio.

b) Contencioso-administrativo ante o Tribunal Superior de Xustiza de Galicia no prazo de dous meses contados desde o día seguinte ó da publicación deste anuncio.

De conformidade con artigo 59 da Lei 30/1992, do 26 de novembro, de réxime xurídico das administracións públicas e do procedemento administrativo común, por medio do presente anuncio, notifícase o acordo que nel se contén a tódolos propietarios afectados descoñecidos, de ignorado domicilio respecto dos cales non se puido practica-la notificación intentada.

Vigo, 8 de novembro de 2000.

Lois Pérez Castrillo

Alcalde-presidente da Xerencia Municipal

de Urbanismo