Dentro dos programas de actividades que a Academia Galega de Seguridade ten previsto realizar no ano 2000, e conforme as funcións atribuídas pola Lei 4/1992, do 9 de abril, de creación da Academia Galega de Seguridade, anúnciase a celebración dunhas xornadas sobre a seguridade da poboación
diante de situacións de risco: as respostas desde a experiencia e a investigación, que deberán desenvolverse conforme as seguintes bases:
Obxectivos.
As xornadas teñen por obxectivos afondar máis na análise daquelas situacións que entrañan máis risco e perigo para a seguridade colectiva da poboación, así como ter en conta as solucións e propostas que desde o campo da investigación científica, fundamentalmente desde as chamadas ciencias do perigo, e á vez desde a experiencia dos técnicos implicados nesta temática, se poden achegar para unha mellor garantía da seguridade.
Destinatarios.
As xornadas van dirixidas a persoal con responsabilidade en temas de protección civil, membros das forzas e corpos de Seguridade, bombeiros e colectivos interesados en xeral.
Inscrición.
A inscrición dos participantes será totalmente gratuíta.
Prazas.
O número de prazas que se ofertarán será de 125.
Solicitudes.
1. O persoal que desexe participar nestas xornadas deberá presentar, cuberta a máquina ou con letra moi clara, a instancia que figura no anexo.
2. O prazo para a presentación de instancias rematará o día 24 de outubro, ás 14 horas.
3. As instancias deberán enviarse á sede da Academia Galega de Seguridade: Avenida da Cultura, s/n, 36680 A Estrada, ou ben poden entregarse en calquera dos lugares previstos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.
Duración e datas.
As xornadas desenvolveranse durante os días 26 e 27 de outubro de 2000, en xornadas de mañá e tarde.
O horario será o seguinte:
Día 26: de 9.30 a 13.30 horas e de 16.15 a 20 horas.
Día 27: de 10 a 14 horas.
Relación de admitidos.
A relación de admitidos publicarase o día 25 de outubro no taboleiro de anuncios da Academia Galega de Seguridade, ou ben poden confirma-la súa asistencia chamando ó teléfono 986 59 00 21.
Lugar.
As xornadas celebraranse no salón de actos nº 2 da Consellería da Presidencia e Administración Pública, sito no edificio administrativo San Caetano en Santiago de Compostela.
Certificado de asistencia.
Ó remate das xornadas entregaráselle un certificado de asistencia a aquelas persoas que acrediten a súa participación continuada a elas.
Modificacións.
A Academia Galega de Seguridade poderá modifica-lo desenvolvemento normal das xornadas para adaptalas ás necesidades da Administración e ás continxencias que poidan xurdir.
A Estrada, 19 de setembro de 2000.
Juan José Fariñas-Ferro Rodríguez
Director xeral da Escola Galega de Seguridade