Unha vez que o Consello da Xunta de Galicia, na súa reunión do día 21 de xullo de 2000, acordou declara-la incidencia supramunicipal do proxecto de planta de transferencia en San Cibrao das Viñas, así como a determinación da Consellería de Medio Ambiente, como órgano competente por razón da materia, para a tramitación do expediente, procede remiti-lo referido proxecto ó trámite de información pública en cumprimento do disposto no artigo 25.3º da Lei 10/1995, do 23 de novembro, de ordenación do territorio de Galicia, e no artigo 13.2º do Decreto 80/2000, do 23 de marzo, polo que se regulan os plans e proxectos sectoriais de incidencia supramunicipal.

Ademais, en cumprimento do disposto no artigo 2º, punto 4, do Decreto 327/1991, do 4 de outubro, de avaliación de efectos ambientais para Galicia (DOG nº 199, do 15 de outubro), o órgano ambiental someterá o estudio de efectos ambientais ó trámite

de información pública mediante anuncio no Diario Oficial de Galicia, polo que:

RESOLVO:

1. Someter a información pública o proxecto de incidencia supramunicial e o estudio de efectos ambientais da planta de transferencia en San Cibrao das Viñas (Ourense), durante o prazo dun mes, contado a partir do día seguinte ó da publicación desta resolución no Diario Oficial de Galicia, para que calquera persoa poida examinalos e presenta-las alegacións que considere oportunas dentro do citado prazo.

2. Un exemplar do referido proxecto de incidencia supramunicipal e do estudio de efectos ambientais da planta de transferencia en San Cibrao das Viñas (Ourense) estarán á disposición dos cidadáns durante o horario de atención ó público, nas seguintes dependencias:

*Dirección Xeral de Calidade e Avaliación Ambiental, rúa dos Feáns, nº7 portal C, de Santiago de Compostela (A Coruña).

*Delegación Provincial da Consellería de Medio Ambiente da provincia de Ourense.

*Concello de San Cibrao das Viñas.

Santiago de Compostela, 19 de setembro de 2000.

Francisco Pan-Montojo González

Director xeral de Calidade e Avaliación Ambiental