A Orde do 29 de decembro de 1999 (DOG do 31 de xaneiro), pola que se aproban as bases que rexerán as convocatorias de axudas e bolsas correspondentes á promoción xeral da investigación e pola que se procede á súa convocatoria, prevé, no seu anexo IV, a concesión de bolsas para a realización da tese de doutoramento (nova adxudicación, primeira e segunda prórroga).

En relación coas bolsas de predoutoramento de nova adxudicación, de acordo co establecido no punto 5 do anexo IV da citada orde, desde o 15 ata o 25 de maio de 2000 expuxéronse as listas de solicitudes admitidas e excluídas tendo en conta a documentación presentada, podendo, durante ese mesmo período, os interesados formular reclamacións para emendar erros e falta de documentos.

Rematado ese prazo e estudiadas as reclamacións presentadas, as solicitudes admitidas foron avaliadas, xunto coas solicitudes de primeira e segunda prórroga de bolsas de predoutoramento, pola Comisión de Selección de Investigación, creada polo Decreto 37/1998, do 30 de xaneiro (DOG do 6 de febreiro), a orde da Consellería da Presidencia e Administración Pública do 21 de abril de 1998 (DOG do 12 maio), e a orde da Consellería da Presidencia e Administración Pública do 26 de abril de 1999 (DOG do 4 de maio).

En consecuencia, atendendo á proposta elaborada pola dita comisión, esta secretaría xeral

RESOLVE:

Primeiro.-Concedérlle-la primeira prórroga da bolsa para a realización da tese de doutoramento, durante o período outubro 2000-setembro 2001 (ambos inclusive) ás persoas que se relacionan no anexo I desta resolución.

Segundo.-Concedérlle-la segunda prórroga da bolsa para a realización da tese de doutoramento, durante o período outubro 2000-marzo 2001 (ámbolos dous inclusive), ás persoas que se relacionan no anexo II desta resolución.

Terceiro.-Concederlles novas bolsas para a realización da tese de doutoramento, durante o período outubro 2000-setembro 2001 (ámbolos dous inclusive), ás persoas que se relacionan no anexo III desta resolución.

Cuarto.-A contía das bolsas será de 115.000 ptas./mes brutas. Sen embargo, esta cantidade poderá ser modificada por resolución da Secretaría Xeral de Investigación e Desenvolvemento, dentro dos límites fixados na propia convocatoria, co fin de consegui-la total homologación destas bolsas coas de formación de persoal investigador que convoque o Ministerio de Educación e Cultura para o ano 2000.

Estas bolsas aboaranse con cargo á aplicación orzamentaria 04.07.432A.480.0 cofinanciada con recursos procedentes do programa operativo do Fondo Social Europeo.

Quinto.-No caso de producirse algunha renuncia ás bolsas ás que se refiren os puntos primeiro, segundo e terceiro desta resolución, a Secretaría Xeral de Investigación e Desenvolvemento procederá, se é o caso, e tendo en conta o remanente de crédito, a adxudicárlle-la dita axuda a outros candidatos de acordo coa lista de suplentes elaborada pola Comisión de Selección de Investigación e que se inclúe no anexo IV desta resolución. A asignación farase pola mesma orde na que se relacionan.

Así mesmo, no caso de existir remanente orzamentario (sempre dentro dos límites fixados na orde da convocatoria) a Secretaría Xeral de Investigación e Desenvolvemento poderá adxudicárlle-la dita axuda a outros candidatos, de acordo coa mencionada lista de suplentes.

Sexto.-A inobservancia por parte dos beneficiarios de calquera das bases establecidas na orde de convocatoria do 18 de xaneiro de 1999, suporá a perda do dereito a percibi-la axuda correspondente.

Sétimo.-As solicitudes que non figuran relacionadas nos anexos I, II, III ou IV desta resolución e que foron admitidas para participar nesta convocatoria, enténdese que quedan denegadas.

Oitavo.-Contra esta resolución poderase interpoñer potestativamente recurso de reposición ante o mesmo órgano no prazo dun mes contado a partir do día seguinte ó da publicación desta resolución no Diario Oficial de Galicia. De non estima-la interposición deste recurso, poderase interpoñer recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia, no prazo de dous meses contado a partir do día seguinte ó da publicación desta resolución no Diario Oficial de Galicia.

Disposición derradeira

Esta resolución entrará en vigor o día seguinte ó da súa publicación no Diario Oficial de Galicia.

Santiago de Compostela, 28 de xullo de 2000.

P.D. (Orde 29-12-2000)

Miguel Ángel Ríos Fernández

Secretario xeral de Investigación e Desenvolvemento

ANEXO I

BOLSAS DE PREDOUTORAMENTO

Relación das primeiras prórrogas concedidas

ANEXO II

BOLSAS DE PREDOUTORAMENTO

Relación das segundas prórrogas concedidas

ANEXO III

BOLSAS DE PREDOUTORAMENTO DE NOVA ADXUDICACIÓN

Relación de beneficiarios

ANEXO IV

BOLSAS DE PREDOUTORAMENTO DE NOVA ADXUDICACIÓN

Relación de suplentes