A formación do colectivo de traballadores do sector pesqueiro é unha necesidade cada vez máis urxente nuns momentos en que estes están asumindo unha participación máis directa na xestión dos recursos pesqueiros.

Nesta formación, que atinxe cada vez a máis áreas, tendo que atender aspectos non só técnicos e bio

lóxicos, senón os económicos e de organización, é preciso que participen máis activamente as organizacións do sector, debendo asumir unha iniciativa e protagonismo que nalgúns casos son o único xeito de alcanzar resultados positivos. Neste obxectivo é preciso considerar aqueles aspectos educativos, culturais, sociais ou de recuperación de valores ou tradicións que contribúan á dinamización das comunidades pescadoras.

Dada a necesidade recoñecida de incrementa-lo nivel tecnolóxico e de coñecementos dos nosos pescadores, mariscadores e acuicultores, e tendo en conta que isto se consegue a través dun conxunto de actividades que van desde a organización de cursos, ás visitas e viaxes formativas, parece necesario incentiva-la súa realización por parte das organizacións do sector de cara a lograr este obxectivo. Polo exposto,

DISPOÑO:

Artigo 1º.-Obxecto.

Convocar axudas destinadas á organización de actividades para a formación, promoción sociocultural e divulgación da tecnoloxía no sector pesqueiro conforme as normas contidas na presente orde, garantindo os preceptos legais de igualdade, concorrencia e publicidade.

As axudas, polo importe global de oito millóns duascentas seis mil pesetas (8.206.000 ptas.), concederanse con cargo á partida orzamentaria 12.04.480.0 do programa 612.B do proxecto dos orzamentos xerais da Comunidade Autónoma de Galicia para 2000.

Artigo 2º.-Fins.

As actividades que poderán acollerse a estas axudas serán aquelas que teñan por finalidade:

1. Organización de actividades de formación e promoción sociocultural e profesional ou de divulgación, dirixidas ás comunidades pescadoras.

2. Recuperación patrimonial de embarcacións tradicionais e outros elementos da cultura mariñeira para uso en actividades de promoción sociocultural.

3. Organización de visitas formativas e de viaxes de formación ou intercambio para pescadores, mariscadores e acuicultores.

4. Realización ou adquisición de publicacións, material audiovisual e multimedia de divulgación e calquera outro material didáctico dirixido á formación de pescadores, mariscadores e acuicultores.

Artigo 3º.-Beneficiarios.

Poderán ser beneficiarios das axudas:

1. As entidades do sector pesqueiro recoñecidas e organizacións sindicais.

2. As agrupacións ou asociacións de acuicultores e mariscadores.

3. Outras entidades de carácter sociocultural sen fin de lucro.

Tódolos beneficiarios relacionados anteriormente deberán te-lo seu enderezo social no ámbito territorial da Comunidade Autónoma de Galicia.

Artigo 4º.-Contía e límites da axuda.

As axudas concederanse para as distintas finalidades nas contías e cos límites máximos que se indican:

1. Os gastos de organización, profesorado e conferenciantes de calquera actividade cun límite do 70% do custo e unha contía máxima de 1.000.000 de ptas.

2. Os gastos de recuperación de embarcacións tradicionais ou outros elementos patrimoniais para o uso en actividades de promoción sociocultural, cunha contía máxima de 2.000.000 de ptas.

3. Os gastos de viaxes colectivos ata a cantidade de 10.000 ptas. por persoa e día, en viaxes dentro de España e de 20.000 ptas. por persoa e día, en viaxes ó estranxeiro, cun límite máximo do 80% do custo e unha contía maxíma de 2.000.000 de ptas.

4. O importe da realización ou adquisición de material didáctico cun límite do 80% do custo e unha contía máxima de 600.000 ptas.

Artigo 5º.-Compatibilidade da axuda.

A percepción desta axuda poderá ser compatible con calquera outra que concedan as diversas administracións públicas para a mesma finalidade, sempre que o conxunto delas non supere as limitacións porcentuais establecidas na disposición cuarta desta orde, coa excepción das axudas para recuperación de embarcacións tradicionais e outros bens patrimoniais, que poderán supera-lo límite fixado no artigo 4.3º, sempre que non se supere o custo global de realización do proxecto. As ditas axudas son incompatibles co uso da embarcacións para a pesca e a acuicultura, e con calquera das axudas incluídas no programa comunitario ou autonómico de construcción e modernización de embarcacións pesqueiras.

Toda alteración das condicións tidas en conta para a concesión da subvención e en todo caso a obtención concorrente de subvencións ou axudas outorgadas por outras administracións ou entes públicos ou privados, nacionais ou internacionais agás o establecido no parágrafo anterior, poderá dar lugar á modificación da resolución de concesión.

Artigo 6º.-Presentación das solicitudes.

As solicitudes axustaranse ó modelo que figura como anexo da presente orde, debendo ser presentadas nos rexistros das delegacións territoriais da Consellería de Pesca, Marisqueo e Acuicultura, ou por calquera dos medios establecidos no artigo 38.4º da Lei 30/1992, do 26 de de novembro, de réxime xurídico das administracións públicas e do procedemento administrativo común.

Artigo 7º.-Prazos.

O prazo para a presentación de solicitudes será de 30 días naturais contados a partir do seguinte ó da publicación desta orde no Diario Oficial de Galicia.

Artigo 8º.-Documentación.

Xunto coa solicitude deberá presentarse a seguinte documentación por duplicado (orixinal e fotocopia):

1. Fotocopia compulsada do DNI do solicitante.

2. Ademais:

a) Fotocopia compulsada dos estatutos da persoa xurídica ou sociedade.

b) Certificación do órgano competente na que se especifique o acordo polo que se concede autorización para face-la solicitude ó asinante dela. Se actuase en virtude de atribucións fixadas nos estatutos, indicarase así na solicitude, citando a disposición que recolle a competencia.

c) Certificación do órgano competente na que se acredite o desempeño actual do cargo.

3. Fotocopia da tarxeta de identificación fiscal, ou NIF, segundo se trate de persoas xurídicas ou físicas.

4. Fotocopia compulsada do documento que acredite a inscrición no rexistro de asociacións, se é o caso.

5. Certificación bancaria na que conste o titular, o número de conta e as claves do banco e da sucursal, así como o enderezo desta, para efectos do pagamento da axuda.

6. Memoria que conteña unha descrición detallada do programa de actividades, do calendario, do persoal, dos medios necesarios, do material educativo e calquera outro aspecto que se considere de interese.

7. Plan económico indicando a parte que corresponde a recursos propios da entidade solicitante e cál a axudas percibidas ou solicitadas para o mesmo fin procedentes de calquera Administración estatal, autonómica, local ou institucional.

Artigo 9º.-Tramitación e resolución.

Unha vez recibidas as instancias e a documentación, estas serán examinadas polas seccións de Formación Pesqueira e Investigación das delegacións territoriais da Consellería de Pesca, Marisqueo e Acuicultura, as cales se observan algunha deficiencia concederán ó solicitante un prazo de 10 días para emendalas consonte o artigo 71 da Lei 30/1992 modificada pola Lei 4/1999. Transcorrido este prazo sen que se producise a emenda ó expediente terase por desistido da súa petición, logo de resolución.

Efectuadas as comprobacións e estudios pertinentes, formularase a correspondente proposta de resolución que conterá unha relación dos solicitantes para os que se propón a concesión de subvencións e a contía, así como daqueles para os que se propón a denegación da subvención solicitada.

A dita proposta elevarase ó conselleiro de Pesca, Marisqueo e Acuicultura, quen dictará a pertinente resolución da axuda, tendo en conta as prioridades e limitacións establecidas nesta orde, no prazo máximo de catro meses contados desde o inicio do prazo para a presentación de solicitudes. Transcorrido o dito prazo sen que se dictase resolución expresa, as solicitudes quedáran desestimadas. Contra a dita resolución que pon fin á vía administrativa, os interesados poderán interpoñer recurso potestativo de revisión perante o conselleiro de Pesca, Marisqueo e Acuicultura, no prazo dun mes a partir do día seguinte ó da súa notificación e segundo o disposto nos artigos 116 e 117 da Lei 4/1999, de modificación da Lei 30/1992, do 26 de novembro, ou recurso contencioso-administrativo diante do órgano xurisdiccional contencioso-administrativo competente no prazo de dous meses, con

tados a partir do día seguinte ó da notificación da resolución, de conformidade co disposto na Lei 29/1998, do 13 de xullo, reguladora da xurisdicción contencioso-administrativa.

Consonte o establecido no artigo 78.3º da Lei de réxime financeiro e orzamentario, texto refundido aprobado por Decreto lexislativo 1/1999, do 7 de outubro, segundo modificación realizada polo artigo 6 da Lei 8/1999, de medidas fiscais e orzamentarias e de función pública e actuación administrativa, delégase no delegado territorial correspondente a resolución destas axudas.

Artigo 10º.-Criterios obxectivos de prioridade.

1. Para a resolución dos expedientes de adxudicación das axudas darase prioridade tendo en conta os seguintes criterios:

a) Terán prioridade, en orde de maior a menor, as solicitudes que teñan como fin a realización de cursos e/ou outras actividades de formación, a recuperación de embarcacións tradicionais e outros bens patrimoniais e a edición de publicacións de divulgación ou a adquisición de libros ou outro material didáctico ou audiovisual.

b) Terase e conta, en caso de coincidencia nos demais criterios, o seguinte:

-Número de permisos de explotación ou asociados da entidade solicitante.

-As confrarías de pescadores e organizacións de productores pesqueiros terán preferencia sobre outros solicitantes.

c) No caso de igualdade de condicións valorarase o interese para a zona onde se vaia realizar.

2. O conselleiro de Pesca, Marisqueo e Acuicultura establecerá os criterios xerais de asignación de axudas, e distribuirá a contía global existente no concepto orzamentario correspondente entre as delegacións territoriais.

Artigo 11º.-Prazo de realización.

O prazo no que debe ser realizada a actividade obxecto da axuda será fixado na resolución de concesión de axuda, sen que en ningún caso poida exceder do 31 de decembro do ano 2000. Cando o beneficiario considere que non pode remata-lo proxecto dentro do prazo sinalado, antes de rematar este poderá solicitar unha prórroga, expoñendo as razóns polas que non pode cumprir co devandito prazo, e presentando unha pequena memoria na que se especifique o grao de realización da actividade subvencionada.

O delegado territorial dictará resolución pola que se aprobe ou denegue a prórroga solicitada; no caso de que sexa aprobada non poderá exceder de dous meses a partir do remate do prazo establecido na resolución de concesión da axuda.

O incumprimento do prazo de execución dará lugar á revogación da concesión da axuda.

Artigo 12º.-Control das actividades obxecto da axuda.

Os beneficiarios das axudas quedarán suxeitos, tanto ás actuacións de comprobación que acorde a Consellería de Pesca, Marisqueo e Acuicultura, como ás de control financeiro que lle correspondan á Inter

vención Xeral da Comunidade Autónoma e ás previstas na lexislación do Consello de Contas e do Tribunal de Contas. É obriga do beneficiario facilitar toda a información que se lle requira por estes organismos para as súas funcións de fiscalización e control do destino das axudas.

A Consellería de Pesca, Marisqueo e Acuicultura reserva para si a facultade de realiza-las comprobacións, inspeccións e controis que considere oportunos, verificando o cumprimento da finalidade da axuda. Para tal fin, o beneficiario deberá comunicar por escrito as datas e horas de realización das actividades obxecto da axuda con prazo suficiente para poder efectua-las comprobacións que se consideren oportunas.

Os beneficiarios das axudas quedarán suxeitos ademais de ás actuacións de comprobación que acorde a Consellería de Pesca, Marisqueo e Acuicultura, ás de control financeiro que lle correspondan á Consellería de Economía e Facenda e ás previstas na lexislación do Consello de Contas.

No suposto de que, unha vez notificada a resolución de concesión, houbese algunha variación no calendario, nos prazos de execución da actividade sinalados na memoria de solicitude, ou calquera outra modificación, seralle comunicada á delegación territorial coa antelación suficiente para que poida realiza-las comprobacións que considere necesarias, para efectos de aprobar ou denega-la devandita modificación.

As delegacións territoriais establecerán as medidas necesarias para efectos de face-la comprobación efectiva da realización das finalidades obxecto da axuda.

Artigo 13º.-Pagamento das axudas.

O pagamento tramitarase logo de xustificación da execución do proxecto no prazo sinalado, ou o que resultase como consecuencia da prórroga concedida, para tal efecto o beneficiario deberá presentar na delegación territorial correspondente e dentro do prazo dun mes, a seguinte documentación por duplicado (orixinal e fotocopia):

a) Memoria sinxela de realización da actividade indicando datas de realización, número de asistentes e outros aspectos de interese, á que se xuntará documentación relacionada coa actividade, tal como programas, folletos, notas de prensa e outros.

b) Facturas en duplicado orixinal ou fotocopias compulsadas, dos gastos realizados, xunto cunha relación delas cos importes agrupados polos conceptos que se describiron na memoria de solicitude. No caso de pagamentos de salarios, gratificacións, etc., deberá consta-la retención correspondente polo IRPF e achegarase o xustificante de ingreso na Facenda.

c) Declaración responsable na que se expresen as axudas solicitadas, concedidas ou percibidas para o mesmo fin por calquera organismo estatal, autonómico, local ou institucional.

d) Certificación expedida pola Consellería de Economía e Facenda acreditativa de que o beneficiario non ten pendente de pagamento ningunha débeda, por ningún concepto coa Administración pública da Comunidade Autónoma.

e) Certificación, expedida polo órgano competente, acreditativa de que o beneficiario se encontra ó corren

te das súas obrigas tributarias estatais, autonómicas e da Seguridade Social.

Se a actividade axudada correspondese á fixada no artigo 2.4º, entregarase no lugar do establecido no parágrafo anterior un orixinal do material realizado ou 25 exemplares no caso de que sexa publicado, cunha memoria que indique o seu destino e forma de distribución gratuíta, xustificando a dita distribución.

A Sección de Formación Pesqueira e Investigación de cada delegación territorial certificará a execución completa das actividades obxecto da axuda despois de realiza-las comprobacións oportunas.

Artigo 14º.-Outras condicións.

En toda a documentación pública relacionada coas actividades obxecto da axuda, farase constar que estas se realizan cunha axuda da Consellería de Pesca, Marisqueo e Acuicultura. Nos exemplares de distribución gratuíta farase constar impreso nela a frase «Exemplar gratuíto».

En relación cos orixinais que se realicen segundo o establecido no artigo 2.3º, que non leven consigo directamente a súa publicación ou realización, a Consellería de Pesca, Marisqueo e Acuicultura reserva para si o dereito de publicación ou de realización durante un ano, contando desde a data de entrega do orixinal.

Artigo 15º.-Obriga de reintegro.

O beneficiario que incumpra as condicións de concesión da axuda está obrigado a reintegra-lo importe total ou parcial da axuda percibida, segundo corresponda, consonte o establecido no artigo 78.9º da Lei de réxime financeiro e orzamentario, texto refundido aprobado por Decreto lexislativo 1/1999, do 7 de outubro, segundo modificación realizada polo artigo 6 da Lei 8/1999, de medidas fiscais e orzamentarias, de función pública e actuación administrativa.

Artigo 16º.-Infraccións e sancións.

As actuacións dos beneficiarios en relación coas axudas obxecto desta orde están sometidas ó réxime de infraccións e sancións do artigo 79 da Lei de réxime financeiro e orzamentario, texto refundido aprobado por Decreto lexislativo 1/1999, do 7 de outubro, segundo modificación realizada pola artigo 6 da Lei 8/1999, de medidas fiscais e orzamentarias, de función pública e actuación administrativa.

Disposicións derradeiras

Primeira.-Facúltase a Dirección Xeral de Formación Pesqueira e Investigación para dicta-las resolucións necesarias para o desenvolvemento desta disposición.

Segunda.-Esta orde entrará en vigor o día seguinte ó da súa publicación no Diario Oficial de Galicia.

Santiago de Compostela, 17 de xullo de 2000.

P.D. (Orde 17-12-1997, DOG nº 246,

do 22 de decembro)

Juan José Álvarez Pérez

Secretario xeral da Consellería de Pesca, Marisqueo e Acuicultura

Director xeral de Formación Pesqueira e Investigación.

Delegados territoriais da Consellería de Pesca, Marisqueo e Acuicultura na Coruña, Lugo e Pontevedra.