Dentro do Plan de actividades da Escola Galega de Administración Pública para o ano 2000 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócase, en colaboración co Instituto Europeo de Administración Pública-Centro Europeo de Rexións, un Seminario Internacional sobre os Procesos de Descentralización nos Estados Membros da Unión Europea e en América Latina, convocatoria que se desenvolverá conforme as seguintes bases:
1. Obxectivos.
Ante a conxuntura desta fin de século, a miúdo de restriccións orzamentarias, as administracións públicas dos estados europeos e tamén dos latinoamericanos enfróntanse ante a situación de arbitrar novos camiños que democraticen os procesos, que racionalicen os criterios de actuación pública e que, en último extremo, fagan posible tanto a maior participación como a mellor información á cidadanía, en aplicación dun real e práctico principio de subsidiariedade.
Dentro do respecto á diversa realidade político-administrativa dos estados, tanto en Europa como nas repúblicas latinoamericanas, os procesos de descentralización dentro dun país deben considerarse como esforzos positivos desde o centro cara á periferia e cara ás rexións, ou destas cara ós municipios, para unha mellor prestación dos servicios públicos. Coñece-las experiencias desenvolvidas nesta materia en ámbalas dúas beiras do Atlántico por personalidades que tiveron responsabilidades na concepción, dirección e aplicación, se é o caso, desta temática preséntasenos como unha verdadeira e única oportunidade para coñecer estes desenvolvementos e elaborar, desde a perspectiva da realidade da Comunidade Autónoma de Galicia, pensamentos e conclusións.
O obxectivo deste seminario é, en resumo, iniciar un debate en profundidade, debate no que, tendo presente a dispar realidade existente dos ámbitos territoriais sobre os que se centra a materia que serve de eixe a esta actividade, se compartan experiencias comúns, e se analicen os puntos fortes e febles dos casos que se someten a estudio neste foro.
2. Contido.
Trataranse estes temas:
-Os procesos de descentralización político-administrativa en Europa.
-Os procesos de descentralización económico-fiscal en Europa.
-Visión xeral da descentralización en América Latina.
3. Destinatarios.
Persoal ó servicio da Xunta de Galicia e da Administración local galega e interesados en xeral.
4. Desenvolvemento.
-Horario: mañá e tarde.
-Lugar e datas: o seminario convocado desenvolverase no salón de actos da EGAP (polígono das Fontiñas, rúa de Madrid, 2-4, Santiago de Compostela) os días 25 e 26 de setembro de 2000.
5. Inscrición.
-Prazo: remata o xoves, día 21 de setembro de 2000.
-Tramitación de solicitudes: as solicitudes irán dirixidas ó director da Escola Galega de Administración Pública, polígono das Fontiñas, rúa de Madrid, 2-4, 15707, Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP, ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 30.
-Número de prazas: limitado á capacidade do local.
-Inscrición fóra de prazo: só se admitirán de quedaren prazas baleiras, coa condición de que se cumpran os requisitos xerais antes indicados.
Os peticionarios poderán obter confirmación da súa posible admisión chamando, o día 22 de setembro, por teléfono, das 10 ás 14.45 horas, ós seguintes números: 981 54 62 39/44 ou 981 54 60 40.
6. Modificacións.
A EGAP reserva para si a facultade de interpretar e de resolve-las incidencias que puidesen xurdir no desenvolvemento do seminario, así como a de cancelalo, se o escaso número de solicitudes non xustificase a súa realización.
7. Certificación de asistencia.
Entregaráselles, ó remate deste seminario, a aquelas persoas inscritas que concorresen asiduamente a el, cando a súa asistencia sexa igual ou superior ó 85% das horas lectivas programadas, e expresarase, neste documento, a natureza da actividade e as datas da súa realización.
8. Retransmisión por Internet.
As persoas interesadas en segui-lo desenvolvemento destas xornadas por Internet poden facelo a través do seguinte enderezo: www.egap.xunta.es.
Santiago de Compostela, 13 de xullo de 2000.
Domingo Bello Janeiro
Director da Escola Galega de Administración
Pública