Dentro do Plan de Actividades da Escola Galega de Administración Pública para o 2000 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócase, en colaboración coa Secretaría Xeral de Relacións coa Unión Europea e Acción Exterior e a Fundación Galicia-Europa, unha xornada sobre a protección dos dereitos fundamentais no ordenamento xurídico comunitario, convocatoria que se desenvolverá conforme as seguintes bases:
1. Obxectivos.
A salvagarda dos dereitos fundamentais é un dos principios básicos da Unión Europea e unha condición indispensable para a lexitimidade desta. O Tribunal Europeo de Xustiza confirmou e configurou, coa súa xurisprudencia, a obriga da Unión de velar polos dereitos fundamentais. A evolución actual da Unión esixe a redacción dunha carta de dereitos fundamentais que permita poñer de manifesto ante os cidadáns da Unión a importancia sobresaínte dos dereitos fundamentais e o seu alcance.
Na sesión do Consello Europeo, que terá lugar en decembro do ano 2000 en Niza, presentarase un proxecto de carta. A partir dese proxecto, o Consello Europeo proporá a proclamación solemne da Carta dos dereitos fundamentais da Unión Europea. Posteriormente estudiarase se se debe incorpora-la carta ós tratados e, en caso afirmativo, de qué modo debe facerse.
Por todo isto, e co fin de coñece-lo estado actual do debate sobre un tema de tanta actualidade e importancia para tódolos cidadáns europeos, a Escola Galega de Administración Pública (EGAP), en colaboración coa Secretaría Xeral de Relacións coa Unión Europea e Acción Exterior e a Fundación Galicia-Europa, organiza esta xornada.
2. Contido.
Trataranse estes temas:
-Postura da comisión ante a Carta europea de dereitos fundamentais.
-Postura do Parlamento ante a Carta europea de dereitos fundamentais.
-A Carta europea de dereitos fundamentais desde a perspectiva dos estados: a perspectiva española.
-A perspectiva rexional desde Galicia.
3. Destinatarios.
Persoal ó servicio da Xunta de Galicia e da Administración local galega e interesados en xeral.
4. Desenvolvemento.
-Horario: mañá e tarde.
-Lugar e datas: a xornada convocada desenvolverase no salón de actos da EGAP (polígono das Fontiñas, rúa Madrid, 2-4, Santiago de Compostela), o día 15 de setembro de 2000.
5. Inscrición.
-Prazo: remata o mércores, día 13 de setembro de 2000.
-Tramitación de solicitudes: as solicitudes irán dirixidas ó director da Escola Galega de Administración Pública, polígono das Fontiñas, rúa Madrid, 2-4, 15707, Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 30.
-Número de prazas: limitado á capacidade do local.
-Inscricións fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.
Os peticionarios poderán obter confirmación da súa posible admisión, chamando, o día 14 de setembro, por teléfono, das 10 ás 14.45 horas, ós seguintes números: 981 54 62 39/44 ou 981 54 60 40.
6. Modificacións.
A EGAP reserva para si a facultade de interpretar e de resolve-las incidencias que puidesen xurdir no desenvolvemento da xornada, así como a de cancelala, se o escaso número de solicitudes non xustificase a súa realización.
7. Certificación de asistencia.
Entregaráselles, ó remate desta xornada, a aquelas persoas inscritas que concorresen asiduamente a ela, cando a súa asistencia sexa igual ou superior ó 85% das horas lectivas programadas, e expresarase, neste documento, a natureza da actividade e as datas da súa realización.
8. Retransmisión por Internet.
As persoas interesadas en segui-lo desenvolvemento desta xornada por Internet poden facelo a través do seguinte enderezo: www.egap.xunta.es.
Santiago de Compostela, 13 de xullo de 2000.
Domingo Bello Janeiro
Director da Escola Galega de Administración
Pública
