O Estatuto de autonomía de Galicia, no seu artigo 31, establece como competencia plena da Comunidade Autónoma de Galicia a regulación e administración do ensino en toda a súa extensión, niveis e graos, modalidades e especialidades, no ámbito das súas competencias.
O Real decreto 1754/1987, do 18 de decembro (BOE nº 16, do 19 de xaneiro de 1988) transferiulle á Comunidade Autónoma competencias en materia de universidades. Estas competencias foron asumidas pola Comunidade Autónoma e asignadas á Consellería de Educación e Ordenación Universitaria no Decreto 62/1988, do 17 de marzo (DOG nº 66, do 6 de abril).
A Lei 11/1989, do 20 de xullo (DOG nº 156, do 16 de agosto), de ordenación do sistema universitario de Galicia, determina a constitución do sistema universitario de Galicia con tres universidades: Universidade da Coruña, de Santiago de Compostela e de Vigo.
A Consellería de Educación e Ordenación Universitaria, a través da Dirección Xeral de Universidades, está a levar a cabo diversas accións de apoio económico ós estudiantes de ensino universitario, coas que se pretende favorece-la calidade, a competencia, a igualdade de oportunidades e a excelencia no rendemento académico.
Neste sentido, a Consellería de Educación e Ordenación Universitaria vén de asinar un convenio de colaboración o día 28 de xullo de 1999 (DOG nº 175, do 9 de setembro) coas entidades financeiras: Banco Pastor, Caixa de Aforros de Galicia, Caixa de Aforros de Vigo, Caixa de Aforros de Pontevedra, Caixa de Aforros de Ourense, Banco Gallego, Banco Simeón e Banco Etcheverría, para facilitarlles ós estudiantes galegos, descendentes de galegos ou residentes en Galicia créditos a baixos xuros para o financiamento dos seus estudios universitarios.
En virtude de todo o anterior, esta consellería
DISPÓN:
Artigo 1º.-Obxecto.
a) Convócanse axudas para os estudiantes universitarios galegos, descendentes de galegos ou residentes en Galicia que reúnan os requisitos e condicións establecidas na presente orde interesados en solicita-los créditos ós que se refire o dito convenio para financia-los seus estudios universitarios de terceiro ciclo correspondentes ó curso 2000/2001.
b) Convocánse axudas para os estudiantes universitarios galegos, descendentes de galegos ou residentes en Galicia interesados en solicita-la prórroga para o financiamento dos xuros do préstamo concedido por Orde do 22 de novembro de 1999 (DOG nº 236, do 9 de decembro).
Artigo 2º.-Orzamento.
A Consellería de Educación e Ordenación Universitaria financiará a parte correspondente dos créditos ou prórrogas destes con cargo á partida orzamentaria 07.05.322C.483.0 dos orzamentos xerais da Comunidade Autónoma de Galicia para o ano 2000, cunha contía máxima de 9.366.600 ptas., acadando unha contía global de 699 millóns de pesetas en axudas, de acordo co estipulado no convenio coas entidades bancarias.
Artigo 3º.-Beneficiarios.
Poderán ser beneficiarios do préstamo subsidiado ou da prórroga os estudiantes galegos, descendentes de galegos ou residentes en Galicia que cumpran as condicións establecidas na presente convocatoria.
Artigo 4º.-Requisitos.
A) Os créditos poderán ser solicitados polos estudiantes universitarios que cumpran os seguintes requisitos:
a) Estar en posesión da nacionalidade española ou dun Estado membro da Unión Europea.
b) Estar matriculado no curso 2000/2001 ou reuni-los requisitos necesarios para matricularse en estudios de terceiro ciclo co fin de realiza-los cursos, seminarios e traballos de investigación tutelados do programa de doutoramento correspondente nalgunha das universidades.
B) As prórrogas poderán ser solicitadas polos estudiantes universitarios que cumpran os seguintes requisitos:
-Estar matriculado no curso 2000/2001 no programa de doutoramento para o que se lle concede o crédito no curso 1999/2000.
Artigo 5º.-Características do préstamo.
Os préstamos serán concedidos pola entidade bancaria de acordo cos termos do convenio e a presente orde.
A contía será como máximo de 500.000 ptas. por cada petición.
Artigo 6º.-Financiamento dos xuros.
Os xuros serán financiados da seguinte forma:
a) A Consellería de Educación e Ordenación Universitaria contribuirá ó pagamento da terceira parte dos xuros do primeiro ano de duración do préstamo (1,34%), sen prexuízo da posibilidade da concesión dunha prórroga de ata un máximo de tres anos, de acordo co disposto en cada convocatoria, se as necesidades orzamentarias da consellería así o permitisen. A subvención será aboada á entidade financeira con carácter anual, facéndose as dilixencias
administrativas para o seu aboamento antes do primeiro vencemento anual.
b) A entidade financeira pola que opte o alumno, farase cargo doutro tercio dos xuros (1,33%), sempre e cando permaneza vixente a axuda relacionada na alínea a) anterior.
A terceira parte dos xuros restantes (1,33%), serán a cargo do alumno prestatario, sempre e cando se manteñan as axudas anteriores. Polo tanto, o alumno liquidará o préstamo ó tipo de xuro neto do 1,33% nominal anual. No caso de que o alumno non acredite a prórroga da axuda da consellería, citada na alínea a) anterior, o préstamo pasará automaticamente a liquidarse ó tipo de xuro do 4% nominal anual.
Artigo 7º.-Solicitudes.
As solicitudes, segundo modelo anexo I desta orde, presentaranse no rexistro xeral da Consellería de Educación e Ordenación Universitaria, dirixidas á Dirección Xeral de Universidades (edificio administrativo San Caetano, s/n, 15704 Santiago de Compostela) ou ben en calquera dos centros previstos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común modificada pola Lei 4/1999, (BOE do 14 de xaneiro) para a presentación de instancias.
Se no uso deste dereito a solicitude é remitida por correo, presentarase en sobre aberto, para que sexa datada e selada polo funcionario de correos antes de que proceda á súa certificación.
As solicitudes para o préstamo deberán ir acompañadas da seguinte documentación:
a) Fotocopia do documento nacional de identidade.
b) Certificación académica orixinal completa ou copia compulsada dos estudios realizados polo solicitante, na que conste a súa duración en anos académicos, materias cursadas e cualificacións obtidas. No caso de validación deberá presenta-la certificación da institución de orixe.
c) Xustificante da matrícula correspondente ó curso do doutoramento ou solicitude desta.
d) Declaración xurada de familia numerosa, en caso de selo.
e) Copia compulsada da declaración da renda correspondente ó exercicio de 1999 ou documento acreditativo da Axencia Tributaria de non estar suxeito á declaración ante a Facenda.
f) Declaración do conxunto de tódalas solicitudes efectuadas ou concedidas, para o mesmo proxecto, das distintas administracións públicas competentes.
g) De se-lo caso, documento acreditativo da súa condición de galego ou ascendencia galega (copia do libro de familia, partida de nacemento,...).
h) Naqueles casos en que o solicitante non sexa galego, nin teña ascendencia galega, pero sexa residente en Galicia, presentará a certificación de resi
dencia, expedida polo concello correspondente, na que conste o tempo de residencia nel.
As solicitudes de prórroga deberán ir acompañadas da seguinte documentación:
a) Fotocopia do documento nacional de identidade.
b) Certificación académica dos estudios realizados no curso 1999/2000.
c) Xustificante da matrícula correspondente ó curso 2000/2001 ou certificación do director do departamento na que conste que continuará realizando o programa de doutoramento durante o mencionado curso.
d) Declaración do conxunto de tódalas solicitudes efectuadas ou concedidas, para o mesmo proxecto, das distintas administracións públicas competentes.
O prazo de presentación de solicitudes rematará o 15 de setembro de 2000.
Artigo 8º.-Tramitación.
Unha vez comprobado que tódalas solicitudes reúnen os requisitos establecidos na presente orde de convocatoria, exporanse as listas provisionais das solicitudes admitidas e excluídas nos taboleiros de anuncios da Consellería de Educación e Ordenación Universitaria, das súas delegacións provinciais, e dos vicerrectorados de estudiantes das tres universidades galegas, sinalando se é o caso, as causas de exclusión.
Así mesmo, estas listas tamén poderán ser consultadas na páxina web da Xunta de Galicia-Consellería de Educación e Ordenación Universitaria (http: www.xunta.es).
As listas provisionais estarán expostas desde o día 9 ata o día 21 de outubro de 2000. Os interesados poderán, durante ese mesmo prazo, formula-las reclamacións para emendar erros e faltas de documentos ante a Dirección Xeral de Universidades, presentando, se é o caso, a documentación necesaria.
Transcorrido este prazo sen que se emenden as causas de exclusión, arquivarase o expediente sen máis trámites.
Artigo 9º.-Criterios de selección.
Para os efectos de selección terase en conta a nota media do expediente académico que se calculará de acordo co seguinte baremo:
Matrícula de honra: 4 puntos.
Sobresaliente: 3 puntos.
Notable: 2 puntos.
Aprobado: 1 punto.
Segundo o plan de estudios que se cursase, a nota media calcularase do modo que segue:
a) Estudios organizados por materias:
Media= suma de notas de cada materia/nº total de convocatorias empregadas.
b) Planos de estudios estructurados por créditos:
Media= (N1.P1+N2.P2+........)/(C1.N1+C2.N2+.......)
Onde:
N1= nº de créditos de cada materia.
P1= puntuación de cada materia.
C1= nº de convocatorias empregadas en cada materia.
A comisión avaliadora poderá tamén ter en conta a declaración da renda correspondente ó exercicio de 1999, e a declaración xurada de familia numerosa.
Artigo 10º.-Comisión avaliadora.
A selección dos candidatos será realizada por unha comisión de avaliación integrada por:
-Presidente:
O director xeral de Universidades ou, por delegación, o subdirector xeral de Universidades.
-Vocais:
Un representante por cada unha das universidades da Comunidade Autónoma.
Un representante da Dirección Xeral de Universidades.
-Secretario:
Un funcionario da Dirección Xeral de Universidades, que actuará con voz e voto.
Artigo 11º.-Obrigas dos beneficiarios.
a) Destina-lo crédito para a finalidade para a que se concede.
b) Asina-lo contrato de préstamo coa entidade bancaria.
c) Amortiza-lo capital obxecto do préstamo e o pagamento dos seus xuros.
d) Así como aquelas condicións específicas que as entidades financeiras de acordo coa súa norma de funcionamento, e o convenio do 28 de xullo de 1999 (DOG do 9 de setembro) determinan.
e) Presentar unha declaración complementaria do conxunto das axudas solicitadas, tanto as aprobadas ou concedidas como as pendentes de resolución, para o mesmo proxecto, das distintas administracións públicas competentes ou calquera dos seus organismos, entes ou sociedades.
O incumprimento destas obrigas por parte do interesado dará lugar ó arquivo do expediente sen máis trámites.
Artigo 12º.-Incompatibilidades.
Estes créditos son incompatibles con outros que poidan ser concedidos para o mesmo fin por outras administracións públicas ou calquera dos seus organismos, entes ou sociedades.
Artigo 13º.-Resolución.
Efectuada a selección pola comisión, esta elevará, a través da Dirección Xeral de Universidades, un
informe proposta motivado ó conselleiro de Educación e Ordenación Universitaria, quen resolverá. Contra esta resolución, que esgota a vía administrativa, os interesados poderán interpoñer recurso potestativo de reposición perante o conselleiro de Educación e Ordenación Universitaria no prazo dun mes a partir do día seguinte ó da publicación da resolución no DOG, segundo o disposto nos artigos 116 e 117 da Lei 4/1999 (BOE do 14 de xaneiro), de modificación da Lei 30/1992, de réxime xurídico das administracións públicas e do procedemento administrativo común, ou ben directamente o recurso contencioso-administrativo no prazo de dous meses perante o Tribunal Superior de Xustiza.
Disposicións adicionais
Primeira.-O incumprimento total ou parcial de calquera das condicións establecidas na presente orde constituirá causa determinante de revogación da axuda e do seu reintegro polo beneficiario ou solicitante, segundo o disposto no artigo 6 da Lei 8/1999, do 30 de decembro, de medidas fiscais e orzamentarias e de función pública e actuación administrativa, que modifica o artigo 78 do texto refundido da Lei de réxime financeiro e orzamentario, aprobado polo Decreto lexislativo 1/1999, do 7 de outubro.
Segunda.-As renuncias que se produzan poderán ser substituídas pola Dirección Xeral de Universidades de acordo coa lista de reserva, se a houbese.
Terceira.-Se por calquera causa, no momento en que a comisión avaliadora teña que examina-las solicitudes, algún dos compoñentes non puidese asistir, será substituído pola persoa que para o efecto se nomee. O dito nomeamento deberá recaer noutra persoa da dirección xeral ou da universidade correspondente en virtude da súa representación.
Cuarta.-Para os efectos establecidos no artigo 42.2º da Lei 30/1992, do 26 de novembro, modificada pola Lei 4/1999 (BOE do 14 de xaneiro), o prazo máximo para resolve-las solicitudes correspondentes ás accións especificadas nesta orde será de seis meses contados a partir da publicación da orde no DOG, producindo efecto desestimatorio a falta de resolución.
Disposicións derradeiras
Primeira.-Facúltase o director xeral de Universidades para dictar, no ámbito das súas competencias, as resolucións precisas para o desenvolvemento desta orde.
Segunda.-A presente orde entrará en vigor ó día seguinte ó da súa publicación no Diario Oficial de Galicia.
Santiago de Compostela, 16 de maio de 2000.
Celso Currás Fernández
Conselleiro de Educación e Ordenación
Universitaria
Director Xeral de Universidades
