Para dar cumprimento na forma máis adecuada ó disposto no número 17 da Orde do 16 de marzo de 2000 (DOG do 22), pola que se convocan probas selectivas para ingreso no corpo de mestres así como a adquisición de novas especialidades, esta dirección xeral resolveu:

1. Facer pública no anexo I a relación de aspirantes admitidos dos que solicitaron tomar parte no mencionado proceso selectivo.

2. Declarar excluídos, polas causas que se especifican, os aspirantes que figuran no anexo II.

3. Incluír condicionalmente na relación de solicitantes os candidatos que figuran no anexo III.

4. No prazo de dez días a partir da publicación no Diario Oficial de Galicia desta resolución, os interesados poderán interpoñe-las reclamacións previstas no artigo 71 da Lei 30/1992, do 26 de novembro, de réxime xurídico das administracións públicas e do procedemento administrativo común, de acordo co disposto na sección cuarta, número 18, da orde de convocatoria.

Estas reclamacións interpoñeranse na mesma delegación provincial da Consellería de Educación e

Ordenación Universitaria na que o solicitante presentou a súa solicitude de admisión.

5. No prazo de cinco días naturais contados desde o momento do remate do prazo establecido para as reclamacións no número anterior, as delegacións provinciais da Consellería de Educación e Ordenación Universitaria remitirán á Dirección Xeral de Persoal relación detallada das reclamacións presentadas, con indicación da procedencia ou non de acceder a elas.

6. O feito de figurar na relación de solicitantes non prexulga que se dean por válidas as condicións persoais do interesado que o lexitimen para participar no proceso selectivo, cando da documentación que no seu momento achegase non se deduza de maneira inequívoca o seu dereito a participar neste, conforme as esixencias da convocatoria.

Tal condicionamento faise extensivo incluso á titulación alegada polo interesado na súa solicitude, xa que a Administración neste momento non se pronuncia sobre a súa validez, senón que a súa consignación no modelo de instancia ten un simple valor indicativo; a certificación de estudios que se una a esta admítese, exclusivamente, para os efectos da súa valoración pola comisión na fase de valoración de méritos, polo que o interesado actúa neste proceso selectivo baixo a súa responsabilidade estricta e absoluta.

Santiago de Compostela, 3 de maio de 2000.

Jaime García y García

Director xeral de Persoal