Dentro do plan de actividades da Escola Galega de Administración Pública para o 2000 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse unhas Xornadas sobre xustiza penal internacional, convocatoria que se desenvolverá conforme as seguintes bases:

1. Obxectivos.

Desde que se creou a Organización das Nacións Unidas insistiuse na necesidade de persegui-los crimes máis noxentos contra a humanidade, como o xenocidio e outros actos de semellante gravidade. A Carta das Nacións Unidas xa recollía, como un dos seus primeiros obxectivos, o de asegura-lo respecto universal dos dereitos humanos e das liberdades fundamentais no mundo enteiro (Preámbulo artículos 1.3º e 55 c). A caída do muro de Berlín en 1989 e a desaparición dunha comunidade internacional bipolarizada facilitaron o camiño para acadar ese obxectivo. Un factor que o favoreceu tamén foi a posibilidade de alcanzar un maior consenso entre os estados sobre os valores sociais predominantes na nova comunidade internacional. Por isto, a creación dunha Corte Penal Internacional de carácter permanente constitúe un grande avance dentro desta nova estructura, e o seu estatuto, aprobado

o 17 de xullo de 1998 en Roma pola Conferencia Diplomática de Plenipotenciarios das Nacións Unidas para o seu establecemento, representa un tratado aberto desde agora á manifestación de vontade por parte dos estados. A finalidade deste tribunal é a investigación, o axuizamento e, se é o caso, o castigo das infraccións máis graves que protexen bens xurídicos de alcance universal, os delictos de xenocidio e de lesa humanidade, os crimes de guerra e o delicto de agresión (art. 5.1º).

Preténdese, en suma, con estas xornadas, ilustra-los asistentes sobre os instrumentos e os medios habilitados pola comunidade internacional sobre os aspectos abordados con anterioridade.

2. Contido.

Trataranse estes temas:

-Entre Nüremberg e o caso Pinochet.

-O principio de complementariedade: as relacións entre as xurisdiccións nacionais e a Corte.

-A extradición horizontal e a extradición vertical.

-Os crimes do dereito internacional.

-A teoría xeral do delicto na Corte Penal Internacional (CPI).

-Os principios xerais do dereito penal en relación cos crimes internacionais.

-A xurisdicción penal universal.

-Do proxecto á realidade: o proceso de creación do Tribunal Penal Internacional (TPI).

3. Destinatarios.

Persoal ó servicio da Xunta de Galicia e da Administración local galega e interesados en xeral.

4. Desenvolvemento.

-Horario: mañá e tarde.

-Lugar e datas: as xornadas convocadas desenvolveranse no salón de actos da EGAP os días 18 e 19 de maio de 2000.

5. Inscrición.

-Prazo: remata o luns, día 15 de maio de 2000.

-Tramitación de solicitudes: as solicitudes irán dirixidas ó director da Escola Galega de Administración Pública, Polígono das Fontiñas, rúa de Madrid, 2-4-15707, Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemen

to administrativo común. Admitiranse tamén inscricións por telefax: 981 54 63 30.

-Número de prazas: limitado á capacidade do local.

-Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.

Os peticionarios poderán obte-la confirmación da súa posible admisión, chamando, o día 16 de maio, por teléfono, de 10 a 14.45 horas, ós seguintes números: 981 54 62 39/44 ou 981 54 60 40.

6. Modificacións.

A EGAP reserva para si a facultade de interpretar e de resolve-las incidencias que puidesen xurdir

no desenvolvemento das xornadas, así como a de cancelalas, se o escaso número de solicitudes non xustificase a súa realización.

7. Certificación de asistencia.

Entregaráselles, ó remate destas xornadas, a aquelas persoas inscritas que concorresen asiduamente a elas, cando a súa asistencia sexa igual ou superior ó 85% das horas lectivas programadas, e expresarase, neste documento, a natureza da actividade e as datas da súa realización.

Santiago de Compostela, 17 de abril de 2000.

Domingo Bello Janeiro

Director da Escola Galega de Administración Pública