Visto o texto da acta redactada pola comisión xeral de negociación do convenio colectivo para o persoal laboral ó servicio do Concello de Xinzo de Limia de Ourense (código convenio 3200842, publicado no Diario Oficial de Galicia nº 163, do 24-8-1999), pactando a elaboración do catálogo de persoal (artigo 7) e as táboas salariais do ano 2000 (artigo 21 e cláusula adicional segunda do citado convenio), con entrada nesta delegación provincial o día 10-3-2000, subscrita pola parte económica, representantes do concello, e, da parte social, comité de empresa, o día 9-3-2000, e, de conformidade co disposto no artigo 90.2º e 3º, do Real decreto lexislativo 1/1995, do 24 de marzo, polo que se aproba o texto refundido da Lei do Estatuto dos traballadores, Real decreto 1040/1981, do 22 de maio, sobre rexistro e depósito de convenios colectivos de traballo e Real decreto 2412/1982, do 24 de xullo, sobre traspaso de funcións e servicios da Administración do Estado á Comunidade Autónoma de Galicia

en materia de traballo.

Esta delegación provincial

ACORDA:

Primeiro.-Ordena-la súa inscrición no libro rexistro de convenios colectivos de traballo, que consta nesta delegación provincial, e notificación ás representacións económica e social da comisión negociadora.

Segundo.-Ordena-lo seu depósito no Servicio de Relacións Laborais, Unidade de Mediación, Arbitraxe e Conciliación desta delegación.

Terceiro.-Dispoñe-la súa publicación no Diario Oficial de Galicia.

Ourense, 22 de marzo de 2000.

José Lage Lage

Delegado provincial de Ourense

Acta da comisión xeral de negociación do convenio colectivo para o persoal laboral ó servicio do Concello de Xinzo de Limia

O día 9 de marzo de 2000, reúnese nos locais do Concello de Xinzo de Limia a comisión xeral de negociación do convenio colectivo, logo da reunión da comisión de control e convocatoria de tódalas partes interesadas.

Orde do día:

a) Elaboración do catálogo de persoal (artigo nº 7 do convenio colectivo).

b) Elaboración das táboas salariais correspondentes ó ano 2000 (artigo 21 e cláusula adicional segunda do convenio colectivo).

Asistentes:

Polo Concello de Xinzo de Limia:

Gonzalo Iglesias Sueiro (alcalde-presidente).

María Manuela Fiz Cajete.

Manuel Rodríguez Cerredelo.

José Antonio Feijóo Alonso.

Polos traballadores/as:

Juan García Moro (presidente do comité de empresa).

Jesús Casasola Martínez (secretario do comité de empresa).

Jesús Fariñas Diz (CC.OO.).

Anxo Santana Álvarez (CIG).

Anxo López Alonso (CIG).

Polos sindicatos:

M. Anxo García Torres (pola CIG).

ACORDOS:

Primeiro.-Establécese o catálogo de postos de traballo estructurais e por servicios, segundo a táboa

salarial individualizada correspondente á homologación para o ano 2000, establecéndose así mesmo o grupo e nivel funcionarial ó que se homologan.

Segundo.-Regularízanse os salarios de todo o persoal laboral consolidados no ano 1999 na porcentaxe fixada como IPC polo goberno para os funcionarios públicos.

Terceiro.-O concello habilita nos orzamentos do ano 2000 a cifra de 6.609.999 ptas. para atende-la reducción da diferencia salarial, entre o persoal funcionario e o persoal laboral do Concello de Xinzo de Limia, consonte a táboa anexa.

Cuarto.-O salario base do persoal laboral configúrase como a suma do salario base e o complemento específico do persoal funcionario; quedando homologado ó 100% no ano 2000, excepto as seguintes traballadoras: Rosa María Diz Coello, Xosefa Martínez González, María Olga Díaz Dacal e Preciosa Trigo Dafonte; quen, ó non poder chegar á homologación total deste concepto no ano 2000, continuarán co proceso de aproximación previsto no convenio colectivo. Todo isto con independencia dos incrementos do IPC previstos no convenio colectivo.

Quinto.-A antigüidade dos traballadores/as, determínase mediante a consolidación de trienios, conforme o establecido no artigo 20 do convenio colectivo, procedendo a homologación total deste concepto no ano 2000.

Sexto.-O complemento do convenio do persoal laboral configúrase polas cantidades establecidas na táboa anexa para cada traballador/a e categoría profesional. A homologación deste concepto seguirá o sistema de aproximación retributivo establecido no convenio colectivo. Para o ano 2000 a porcentaxe de minoración da diferencia é a resultante de imputa-la cantidade pactada no punto terceiro ós distintos conceptos, tendo en conta que o salario base e a antigüidade acadan o 100% da homologación.

E non tendo máis asuntos que tratar, levántase a sesión, sendo as 10 horas, dispondo enviar este acordo coas táboas salariais á delegación provincial da Consellería de Xustiza, Interior e Relacións Laborais, para o seu rexistro, depósito e publicación no BOP e Diario Oficial de Galicia.

Táboas salariais

Ano 2000