Dentro do Plan de actividades da Escola Galega de Administración Pública para o 2000 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse unhas Xornadas sobre ordenación do litoral, convocatoria que se desenvolverá conforme as seguintes bases:

1. Obxectivos.

Promove-lo coñecemento do novo modelo de ordenación e xestión do litoral marítimo que se está a poñer en funcionamento pola Comisión Europea, e que xa se está a desenvolver en Francia con gran éxito, así como analiza-la incidencia que ten en sectores estratéxicos como o turismo, as actividades portuarias e a protección ambiental dos recursos costeiros.

2. Contido.

Trataranse estes temas:

-Introducción ó réxime xurídico do litoral.

-O programa de demostración de xestión do litoral da Comisión Europea.

-O modelo de ordenación do litoral francés.

-O reparto de competencias en materia de ordenación do litoral.

-Ordenación do turismo no litoral.

-Ordenación e xestión das praias.

-A protección ambiental do litoral.

-A incidencia da actividade portuaria sobre o litoral.

-A ordenación do litoral na Comunidade Autónoma de Galicia.

3. Destinatarios.

Persoal ó servicio da Xunta de Galicia e da Administración local galega e interesados en xeral.

4. Desenvolvemento.

-Horario: mañá e tarde.

-Lugar e datas: as xornadas convocadas desenvolveranse no salón de actos do Centro de Innovación e Servicios de Galicia (CIS) de Ferrol (A Cabana, s/n, da citada cidade) os días 25 e 26 de abril de 2000.

5. Inscrición.

-Prazo: remata o mércores, día 19 de abril de 2000.

-Tramitación de solicitudes: as solicitudes irán dirixidas ó director da Escola Galega de Adminis

tración Pública, polígono das Fontiñas, rúa de Madrid, 2-4, 15707 Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP, ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 30.

-Número de prazas: limitado á capacidade do local.

-Inscricións fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.

Os peticionarios poderán obter confirmación da súa posible admisión, chamando, o día 24 de abril, por teléfono, de 10 a 14.45 horas, ós seguintes números: 981 54 62 39/44 ou 981 54 60 40.

6. Modificacións.

A EGAP reserva para si a facultade de interpretar e de resolve-las incidencias que puidesen xurdir no desenvolvemento das xornadas, así como a de cancelalas, se o escaso número de solicitudes non xustificase a súa realización.

7. Certificación de asistencia.

Entregaráselles, ó remate destas xornadas, a aquelas persoas inscritas que concorresen asiduamente a elas, cando a súa asistencia sexa igual ou superior ó 85% das horas lectivas programadas, e expresarase, neste documento, a natureza da actividade e as datas da súa realización.

Santiago de Compostela, 30 de marzo de 2000.

Domingo Bello Janeiro

Director da Escola Galega de Administración

Pública