O Estatuto de autonomía de Galicia, no seu artigo 31, establece como competencia plena da Comunidade Autónoma de Galicia a regulación e administración do ensino en toda a súa extensión, niveis e graos, modalidades e especialidades, no ámbito das súas competencias.

O Real decreto 1754/1987, do 18 de decembro (BOE do 19 de xaneiro, DOG do 17 de febreiro de 1988) transferiulle á Comunidade Autónoma competencias

en materia de universidades. Estas competencias foron asumidas pola Comunidade Autónoma e asignadas á Consellería de Educación e Ordenación Universitaria no Decreto 62/1988, do 17 de marzo (DOG do 8 de abril).

A Lei 11/1989, do 20 de xullo (DOG do 16 de agosto), de ordenación do sistema universitario de Galicia, determina a constitución do Sistema Universitario de Galicia con tres universidades: a Universidade da Coruña, a Universidade de Santiago de Compostela e a Universidade de Vigo.

A Consellería de Educación e Ordenación Universitaria pretende continuar, dentro das súas competencias, coa política iniciada o ano pasado de axudas e subvencións a organismos e institucións que organicen actividades de proxección universitaria.

Polo que antecede, esta consellería

DISPÓN:

Artigo 1º.-Obxecto.

Convócanse subvencións a universidades galegas para a organización de congresos, simposios e xornadas que favorezan a proxección universitaria, tanto no ámbito local como no nacional e internacional.

Artigo 2º.-Orzamento.

Para a concesión das subvencións convocadas na presente orde destinarase a cantidade total de 15.000.000 de ptas., para o que existe crédito adecuado e suficiente na aplicación orzamentaria 07.05.322C.440.2, dos orzamentos xerais da Comunidade Autónoma de Galicia para o ano 2000. A Consellería de Educación e Ordenación Universitaria poderá amplia-lo prazo ou facer pública unha nova convocatoria no suposto de que as adxudicacións acordadas non cubrisen a totalidade do crédito orzado.

Artigo 3º.-Beneficiarios.

1. Poderán optar a estas subvencións, a través das universidades galegas, os seus centros, departamentos, institutos ou órganos, individuais ou colexiados, que realicen actividades que poidan ser obxecto desta subvención na Comunidade Autónoma de Galicia.

2. Quedan excluídos aqueles proxectos que anteriormente recibiran algunha outra subvención, para o mesmo concepto, por parte da Xunta de Galicia. Se a subvención é concedida por outro organismo, non poderá supera-lo custo total do montante da organización.

3. As subvencións concedidas consideraranse individualmente por proxectos presentados, nunca por universidade solicitante, de tal xeito que cada universidade pode recibir máis dunha subvención segundo o número de proxectos aprobados e subvencionados.

Artigo 4º.-Período.

As actividades que se subvencionan nesta convocatoria serán realizadas durante o curso académico 1999-2000.

Artigo 5º.-Solicitudes.

1. As solicitudes, segundo o modelo que se publica como anexo á presente orde e que está á disposición dos interesados nas dependencias da Dirección Xeral de Universidades, presentaranse no rexistro xeral da Consellería de Educación e Ordenación Universitaria ou ben en calquera dos centros previstos no artigo 38.4º da Lei 30/1992, do 26 de novembro, modificada pola Lei 4/1999 (BOE nº 12 de 14 de xaneiro), de réxime xurídico das administracións públicas e do procedemento administrativo común, para a presentación de instancias. Se, no uso deste dereito, a solicitude é remitida por correo, presentarase en sobre aberto, para que sexa datada e selada polo funcionario de correos antes de que proceda á súa certificación.

2. As solicitudes deberán ir acompañadas da seguinte documentación:

-NIF da universidade.

-Memoria explicativa do programa de actividades que se pretenden realizar, indicando o ámbito territorial e social destas, e na que conste a relación prevista de conferenciantes invitados.

-Orzamento de ingresos e gastos da actividade con expresión das axudas solicitadas ou concedidas por parte doutros organismos públicos ou privados.

-Circular ou circulares do congreso.

-Documento facilitado pola entidade bancaria na que conste o código da conta do cliente comprensivo dos códigos que identifican o banco, a oficina, o díxito de control e o número de conta.

3. O prazo de presentación de solicitudes permanecerá aberto desde o día seguinte ó da publicación da presente orde de convocatoria no DOG, ata o 30 de abril de 2000.

Artigo 6º.-Comisión de avaliación.

A selección dos candidatos será realizada por unha comisión de avaliación integrada por:

-Presidente:

O director xeral de Universidades ou, por delegación, o subdirector xeral de Universidades.

-Vocais:

Un representante por cada unha das universidades da Comunidade Autónoma.

Un representante do Servicio de Coordinación do Sistema Universitario.

-Secretario:

Un representante da Dirección Xeral de Universidades, que actuará con voz e voto.

En caso de empate, decidirá o voto de calidade do presidente.

Artigo 7º.-Tramitación e resolución.

1. Os servicios da Dirección Xeral de Universidades comprobarán que tódalas solicitudes reúnen os requisitos establecidos nesta orde e exporase a lista de solicitudes admitidas e excluídas, sinalando, se é caso, as causas de exclusión, nos taboleiros da Consellería de Educación e Ordenación Universitaria e nos das súas delegacións provinciais, no centro de información administrativa da Consellería da Presidencia e Administración Pública e nos das súas delegacións provinciais, nos dos vicerrectorados de profesorado das universidades de Galicia, nos dos vicerrectorados dos campus de Ferrol, Ourense, Lugo e Pontevedra e en Internet no enderezo http://www.xunta.es/conselle/ceoug/dxu/index.htm.

Esta lista estará exposta desde o 20 ó 30 de maio de 2000, podendo os interesados, durante ese mesmo prazo, formular reclamación para emendar erros e falta de documentos, ante a Dirección Xeral de Universidades, achegando, se é o caso, a documentación necesaria. Transcorrido este prazo sen que se emenden as causas de exclusión, considerarase que o interesado desiste da súa petición logo de resolución, nos termos establecidos no artigo 71 da Lei 30/1992, do 26 de novembro, modificada pola Lei 4/1999, de réxime xurídico das administracións públicas e do procedemento administrativo común.

2. A comisión avaliadora elaborará a relación beneficiarios, segundo os criterios de valoración que se detallan a seguir:

a) Importancia e interese científico e universitario das actividades propostas no proxecto presentado, con

especial valoración dos proxectos que contribúan á proxección universitaria.

b) Ámbito territorial do proxecto.

3. Efectuada a selección pola comisión, esta elevará, a través da Dirección Xeral de Universidades, un informe-proposta ó conselleiro de Educación e Ordenación Universitaria, quen emitirá resolución na que constará unha lista de reserva. Contra esta resolución, que esgota a vía administrativa, os interesados poderán interpoñer recurso potestativo de reposición perante o conselleiro de Educación e Ordenación Universitaria no prazo dun mes a partir do día seguinte ó da publicación da resolución no DOG, segundo o disposto nos artigos 116 e 117 da Lei 4/1999 (BOE nº 12 do 14 de xaneiro) de modificación da Lei 30/1992, de réxime xurídico das administracións públicas e do procedemento administrativo común, ou ben directamente recurso contencioso-administrativo no prazo de dous meses perante o Tribunal Superior de Xustiza de Galicia.

Artigo 8º.-Pagamento.

Unha vez concedida a subvención librarase a cantidade adxudicada de acordo co disposto no artigo 37 da Lei 7/1999, do 20 de decembro (DOG nº 252, do 31 de decembro), de orzamentos xerais da Comunidade Autónoma para o ano 2000:

1. Se a subvención concedida non supera o importe de 1.000.000 de ptas. poderá acordarse un primeiro pagamento do 80% no momento da concesión e un segundo pagamento do 20% restante, no momento da completa xustificación por parte do beneficiario do cumprimento da finalidade e condicións establecidas na presente orde.

2. Se a subvención concedida supera o importe de 1.000.000 de ptas. poderá acordarse pagamentos parciais a conta da liquidación definitiva, a medida que o beneficiario xustifique os gastos, ata un máximo do 80% da subvención concedida.

Artigo 9º.-Xustificación.

No prazo de vinte días desde o remate da actividade, os solicitantes deberán presentar:

a) A certificación de gastos e ingresos producidos que xustifique a contía do investimento subvencionado, e daqueles pagamentos que se poida ter realizado con anterioridade á publicación desta convocatoria, debendo certifica-lo destino que se lle dá á partida obtida como consecuencia da adxudicación desta resolución.

b) Unha memoria na que xustifiquen o cumprimento da finalidade e condicións para as que foi concedida a subvención.

c) Declaración complementaria do conxunto das axudas solicitadas, tanto as aprobadas ou concedidas como as pendentes de resolución.

Artigo 10º.-Obrigas dos beneficiarios.

1. Os beneficiarios das subvencións quedarán obrigados a destinalas ó obxecto concreto para o que foron concedidas e deben comunicarlle á Dirección Xeral de Universidades o lugar, o día e a hora da actividade subvencionada, así como calquera modificación da actividade. A Dirección Xeral de Universidades poderá comprobar, cando o considere conveniente, a execución dos proxectos.

2. Os beneficiarios da subvención farán constar en toda a publicidade xerada pola actividade subvencionada que recibiron unha subvención da Consellería de Educación e Ordenación Universitaria, Dirección Xeral de Universidades, utilizando a normativa da imaxe corporativa da Xunta de Galicia e cumprindo coa normativa vixente esixida para o depósito legal.

Disposicións adicionais

Primeira.-A concesión de axudas reguladas nesta orde terá como límite global o crédito asignado nos orzamentos para este fin.

Segunda.-O incumprimento total ou parcial de calquera das condicións establecidas na presente orde constituirá causa determinante de revogación da axuda e do seu reintegro polo beneficiario ou solicitante, segundo o disposto no artigo 78.7º e 78.8º do Decreto lexislativo 1/1999, do 7 de outubro, polo que se aproba o texto refundido da Lei de réxime financeiro e orzamentario de Galicia, reformado polo artigo 6 da Lei 8/1999, do 30 de decembro, de medidas fiscais e orzamentarias e de función pública e actuación administrativa.

Toda alteración das condicións tidas en conta para a concesión da subvención, e en todo caso a obtención concorrente de subvencións ou axudas outorgadas por outras administracións ou entes públicos ou privados, nacionais ou internacionais, poderá dar lugar á modificación da resolución de concesión.

Terceira.-As renuncias que se produzan poderán ser substituídas pola Dirección Xeral de Universidades de acordo coa lista de reserva que se estableza na resolución.

Cuarta.-Se por calquera causa, no momento en que a comisión avaliadora teña que examina-las solicitudes, algúns dos compoñentes non puidese asistir, será substituído pola persoa que para o efecto se nomee. O dito nomeamento deberá recaer noutra persoa da Dirección Xeral de Universidades ou da universidade correspondente en virtude da súa representación.

Quinta.-Para os efectos establecidos no artigo 42.2º da Lei 30/1992, do 26 de novembro, modificada pola Lei 4/1999 (BOE nº 12, do 14 de xaneiro), de réxime xurídico das administracións públicas e do procedemento administrativo común, o prazo máximo para resolve-las solicitudes correspondentes ás accións especificadas nesta orde será de catro meses, contados a partir do día seguinte ó do remate do prazo concedido para a presentación de solicitudes, producindo efectos desestimatorios a falta de resolución.

Disposicións derradeiras

Primeira.-Facúltase o director xeral de Universidades para dictar, no ámbito das súas competencias, as resolucións precisas para o desenvolvemento desta orde.

Segunda.-Esta orde entrará en vigor o día seguinte ó da súa publicación no Diario Oficial de Galicia.

Santiago de Compostela, 10 de marzo de 2000.

Celso Currás Fernández

Conselleiro de Educación e Ordenación

Universitaria