A situación viaria dos accesos ó aeroporto da Lavacolla experimentou unha transformación substancial despois da entrada en servicio da autovía Santiago-A Lavacolla, pertencente á rede de estradas do Estado.

A conexión principal entre a nova autovía e o aeroporto realízase a través dun treito de 1,3 km da estrada AC-250 Sigüeiro-A Lavacolla, pertencente á rede de estradas da Xunta de Galicia.

Esta nova funcionalidade do treito en cuestión comporta a súa integración nun itinerario de interese xeral, de acordo co establecido no artigo 4.3.2) da Lei estatal 25/1988, do 29 de xullo, polo que procede a súa integración na rede de estradas do Estado.

Por tal motivo, logo do mutuo acordo das administracións afectadas, conforme o establecido no artigo 6 d) da Lei 4/1994, do 14 de setembro, de estradas de Galicia por proposta do conselleiro de Política Territorial, Obras Públicas e Vivenda e logo de deliberación do Consello da Xunta de Galicia na súa reunión do día once de febreiro de dous mil,

DISPOÑO:

Artigo único.-Cédeselle ó Ministerio de Fomento, para a súa incorporación á rede de estradas do Estado, o treito de 1,3 km de lonxitude da estrada autonómica AC-250 Sigüeiro-A Lavacolla, que conecta a autovía Santiago-A Lavacolla co Aeroporto Internacional de Santiago de Compostela-A Lavacolla.

Disposición derradeira

A cesión que se aproba mediante este decreto será efectiva a partir da publicación no BOE, do real decreto onde se acorda a incorporación deste treito viario á rede estatal, conforme establece o artigo 4.2º da Lei 25/1988, do 29 de xullo, de estradas.

Santiago de Compostela, once de febreiro de dous mil.

Manuel Fraga Iribarne

Presidente

José Cuíña Crespo

Conselleiro de Política Territorial, Obras Públicas

e Vivenda