Dentro dos programas de actividades que a Academia Galega de Seguridade ten previsto realizar no ano 2000 de forma descentralizada, e conforme as funcións atribuídas pola Lei 4/1992, do 9 de abril, de creación da Academia Galega de Seguridade, anúnciase a celebración dun curso sobre estranxeiría, que deberá desenvolverse conforme as seguintes bases:
Obxectivos.
O curso ten por obxectivo principal dá-los coñecementos necesarios en materia de estranxería, situacións conflictivas con estranxeiros, para que os policías poidan atallar e resolve-los posibles problemas que se lles poidan presentar na rúa.
Destinatarios.
O curso vai dirixido ós membros dos corpos das policías locais de Galicia e ós membros da Unidade do C.N.P. adscrita á Comunidade Autónoma de Galicia, e no caso de quedaren prazas vacantes ós membros do Corpo Nacional de Policía e Garda Civil.
Inscrición.
A inscrición dos participantes será totalmente gratuíta.
Prazas.
O número de prazas que se ofertarán neste curso será de 27.
Solicitudes.
1. O persoal que desexe participar neste curso deberá presentar cuberta a máquina ou con letra moi clara a instancia que figura no anexo.
2. O prazo para a presentación de instancias rematará o día 14 de marzo, ás 14 horas
3. As instancias deberán vir asinadas polo xefe do cadro de persoal ou polo concelleiro de tráfico e seladas, será isto requisito indispensable para ser admitido no curso; o incumprimento deste requisito levará consigo á non admisión no devandito curso.
4. As instancias deberán enviarse á sede da Academia Galega de Seguridade: avenida da Cultura, s/n, 36680 A Estrada, ou ben poden entregarse en calquera dos lugares previstos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.
Contido e duración.
O curso celebrarase en sesións de tarde, de luns a venres, e nel trataranse, entre outros, os seguintes temas: a) A Lei de estranxeiría. Dereitos e liberdades dos estranxeiros en España. b) Entrada e situación dos estranxeiros en España. Visados: clases, estadías, residencias, etc. c) Pasaportes ordinarios. Tipos e características. Outros documentos para saír ó estranxeiro. Permisos de traballo e residencia. Réxime xeral e comunitario. O NIE d) Inmigración. Xenofobia. Racismo. Inmigración en Galicia. Colectivos máis significativos e actividades. Polisóns. Inmigración ilegal. Medios utilizados, lugares e formas de entrada, etc.
Datas.
O curso celebrarase en datas do 27 ó 31 de marzo.
O horario será das 16 ás 20 horas do serán.
Relación de admitidos.
A relación de admitidos publicarase o día 21 de marzo, no taboleiro de anuncios da Academia Galega de Seguridade, ou ben poden confirma-la súa asistencia chamando ó teléfono: 986 59 00 21.
Lugar.
O curso desenvolverase na sede da Academia Galega de Seguridade, sita no concello da Estrada.
Certificado de asistencia.
Ó remate do curso entregaráselles un certificado de asistencia, a aquelas persoas que acrediten a súa participación continuada.
Modificacións.
A Academia Galega de Seguridade poderá modifica-lo desenvolvemento do curso para adaptalo ás necesidades da Administración e ás continxencias que poidan xurdir.
A Estrada, 10 de febreiro de 2000.
Juan José Fariñas-Ferro Rodríguez
Director xeral da Academia Galega de Seguridade