En cumprimento da Lei 6/1997, do 31 de xullo, do Plan galego de estatística 1998-2001 e para a execución da operación estatística denominada Formación en procedementos estatísticos, subscribiuse un convenio de colaboración entre o Instituto Galego de Estatística e a Escola Galega de Administración Pública, para a xestión do programa de formación en materia estatística, polo que se convocan cursos, que deberán desenvolverse conforme as seguintes bases:
Primeira.-Denominación.
Curso de utilización das fontes estatísticas para profesores de ensino secundario obrigatorio e de bacharelato.
Segunda.-Obxectivos.
Proporcionarlles formación práctica na área de estatística ós profesores de ESO e de bacharelato que presten servicios na Comunidade Autónoma de Galicia e dar a coñece-las estatísticas elaboradas polo IGE.
Terceira.-Destinatarios.
Profesores de ESO e de bacharelato con destino na Comunidade Autónoma de Galicia.
Cuarta.-Solicitudes.
O persoal que desexe participar no curso deberá solicitalo coa presentación da instancia que, como modelo oficial, se recolle no anexo I desta resolución, á que se deberá achegar unha copia compulsada do documento acreditativo da condición de profesor.
As solicitudes irán dirixidas ó director da EGAP e presentaranse no rexistro da Escola Galega de Administración Pública, rúa de Madrid 2-4, 15707 Santiago de Compostela, ou nas dependencias que se sinalan no artigo 38.4º da Lei 30/1992, do 26 de novembro, de réxime xurídico das administra
cións públicas e do procedemento administrativo común.
O prazo de presentación de solicitudes rematará 20 días naturais antes da data de comezo dos cursos.
Quinta.-Selección.
A selección farase por rigorosa orde de presentación de solicitudes.
A relación de seleccionados para participar nos cursos exporase nos taboleiros do IGE e da EGAP.
Sexta.-Desenvolvemento.
Duración: 30 horas.
Lugar: Instituto Galego de Estatística, complexo administrativo San Lázaro, rúa San Lázaro s/n, 15703 Santiago de Compostela.
Datas: os cursos desenvolveranse en dúas quendas:
18, 24, 25 e 31 de maio e 7, 8, 14, 15, 21 e 22 de xuño.
5, 6, 7, 12, 13, 14, 20, 21, 27 e 28 de setembro.
Horario: de 16.30 a 19.30 horas.
Prazas: máximo de 20.
Sétima.-Modificacións.
Os órganos convocantes reservan para si a facultade de interpretar e de resolve-las incidencias que puidesen xurdir no desenvolvemento do curso, así como a de cancelalo se o escaso número de solicitudes non xustificase a súa realización.
Oitava.-Certificados de asistencia.
Outorgaráselles certificado de asistencia ós alumnos que participen con regularidade no curso.
Calquera inasistencia deberá ser xustificada. A falta de asistencia inxustificada ó 15% das horas lectivas programadas imposibilitará a expedición do certificado.
A falta de asistencia, aínda que sexa xustificada, a máis do 15% das horas lectivas programadas, imposibilitará a expedición do certificado e dará lugar a baixa no curso con perda de tódolos dereitos.
Novena.-Contido.
Organización e fontes estatísticas. Introducción á análise exploratoria de datos. Ferramentas estatísticas utilizables nas estatísticas demográficas, sociais, económicas estructurais e económicas conxuntarais.
O curso inclúe clases de tipo práctico para ilustra-lo contido do programa.
Santiago de Compostela, 7 de febreiro de 2000.
Domingo Bello Janeiro
Director da Escola Galega de Administración
Pública