A Alcaldía Presidencia con data do 25 de xaneiro de 2000 dictou a seguinte resolución:

1. Incoar expediente para a aprobación de bases e estatutos da xunta de compensación que se vai constituír para a execución do sector S-5 (Val Mesoiro) do Plan xeral de ordenación municipal da Coruña.

2. Aprobar inicialmente o proxecto de estatutos e bases presentado por María José Jove Santos en representación da comisión xestora do sector S-5 (Val Mesoiro) do Plan xeral de ordenación municipal da Coruña.

3. Ordena-la citación persoal no expediente a aqueles que aparezan como interesados na súa calidade de titulares de bens e dereitos afectados, así como a publicación no Diario Oficial de Galicia do

anuncio correspondente segundo modelo oficial que se xunta, facultando a comisión xestora e no seu nome a María José Jove Santos para a súa presentación e dilixenciamento ante o órgano correspondente.

O que se fai público de conformidade co disposto no artigo 133.4º en relación co 102, ambos da Lei 1/1997, do 24 de marzo, do solo de Galicia (BOE nº 103, do 30 de abril), advertindo os interesados de que o expediente se encontra á súa disposición nas oficinas de xestión do Servicio de Urbanismo, sitas na Avda. da Mariña 18, entre as 12 e as 14 horas de luns a venres durante o prazo de 20 días a partir da publicación ou notificación do acordo que se traslada, onde poderá consultalo e presentar cantas alegacións teña por conveniente na defensa dos seus dereitos, incluída a petición de incorporación á comisión xestora; neste caso deberá achegar exacta identificación do predio ou predios da súa propiedade así como copia dos títulos xustificativos do seu dominio.

A Coruña, 26 de xaneiro de 2000.

O alcalde

P.D.

Salvador Fernández Moreda

Proxecto de estatutos e bases de actuación

polígono único, sector S-5 Mesoiro-A Coruña

Base 1ª. Ámbito territorial e finalidade.

1. Estas bases de actuación refírense á xunta de compensación do polígono de Mesoiro, previsto polo Plan Parcial de Mesoiro.

2. A finalidade destas bases é regulamenta-la incorporación á xunta de compensación dos propietarios de terreos situados no ámbito da actuación, a avaliación das súas contribucións, a execución da urbanización, a cesión de terreos ó concello, a distribución de cargas e beneficios derivados do planeamento que se executa e o establecemento de criterios para a asignación das parcelas resultantes e restantes cuestións relativas á elaboración do proxecto de compensación.

Base 2ª. Réxime legal e regulamentario aplicable.

1. A compensación no ámbito do polígono rexerase segundo o disposto nestas bases e, no non previsto nelas, segundo os preceptos contidos nos artigos 133 a 138 da Lei do solo de Galicia, e 157 a 185 do Regulamento de xestión urbanística e restantes disposicións de aplicación.

2. A aprobación destas bases polo Concello da Coruña determina a obriga de seren cumpridas por parte dos propietarios e, se é o caso, das empresas urbanizadoras que se incorporen á xunta de compensación.

3. Toda modificación destas bases esixirá que sexa aprobada en asemblea xeral extraordinaria, co voto

favorable de membros que representen, polo menos, o cincuenta por cento (50%) das cotas de participación. Á modificación daráselle o trámite previsto polos artigos 161 e 162 do Regulamento de xestión urbanística.

4. As bases modificadas someteranse á tramitación e aprobación da Administración actuante. Malia isto, cando o acordo de modificación sexa adoptado por unanimidade dos membros da xunta e afecte a pura distribución dos beneficios e cargas entre eles, será válido sen necesidade de tramitación, se ben ámbalas circunstancias terán de se xustificar na notificación que da modificación se efectúe ó concello.

Base 3ª. Avaliación dos predios achegados.

1. Os dereitos e deberes dos propietarios determínanse en proporción ás respectivas cotas de participación deles.

2. Tendo en consideración as características do polígono, a cota de participación dos asociados fíxase en función da superficie dos predios da súa pertenza, sen prexuízo da incorporación de empresas urbanizadoras.

A determinación das superficies efectuarase en harmonía co que resulte dos títulos de propiedade, prevalecendo, en caso de discordancia entre estes e a realidade física, esta sobre aqueles, de conformidade co levantamento topográfico realizado pola xunta.

3. Na hipótese de discrepancia sobre a propiedade dun terreo, parte del ou dos seus lindeiros, a propiedade conceptuarase de litixiosa, asumindo o Concello da Coruña a representación dos dereitos e intereses desas titularidades, para os efectos da tramitación do expediente, ata que sexa dictada resolución definitiva polos tribunais ordinarios.

Base 4ª. Predios que se van expropiar e avaliación deles.

1. A xunta de compensación será beneficiaria das expropiacións realizadas polo Concello da Coruña respecto das propiedades non incorporadas á xunta nos prazos establecidos para tal efecto, ou por incumprimento por parte dos membros incorporados da súas obrigas legais ou estatutarias.

2. As expropiacións tramitaranse, en principio, a través do procedemento de taxación conxunta que regulan os artigos 145 e seguintes da Lei do solo de Galicia e 202 e seguintes do Regulamento de xestión urbanística; e, alternativamente, cando for máis conveniente, axustaranse ó procedemento establecido na lexislación en vigor que resulte de aplicación. En todo caso, os terreos avaliaranse consonte os criterios establecidos pola lexislación urbanística.

Base 5ª. Criterios de avaliación das edificacións, obras, plantacións e instalacións existentes que se declararen incompatibles coa ordenación.

1. As edificacións, obras, plantacións, instalacións e outros elementos existentes sobre os predios ache

gados non se considerarán como valores achegados para os efectos de determina-la cota de participación, pero, na medida en que resultaren incompatibles coa ordenación proposta, serán avaliados, indemnizándose polo seu prezo os propietarios, incluíndose nos gastos de urbanización.

2. As edificacións e instalacións taxaranse tendo en conta a avaliación dos materiais e o seu posible valor arquitectónico, con deducción dunha porcentaxe por estado de vida do inmoble ou por estado de conservación da obra ou construcción; todo isto de conformidade coas regras de avaliación establecidas pola normativa en vigor.

Base 6ª. Tratamento dos predios onde existan edificacións que se consideren compatibles coa ordenación resultante.

As edificacións preexistentes, que se declararen compatibles co planeamento, serán adxudicadas no proxecto de compensación ó propietario orixinal, producíndose a regularización da parcela de acordo cos criterios resultantes destas bases e a determinación das compensacións económicas que procedan.

Base 7ª. Extinción ou transformación de dereitos e cargas.

1. Cando non teña lugar a subrogación real, o acordo aprobatorio do proxecto de compensación producirá a extinción dos dereitos reais e cargas constituídas sobre o predio achegado, correndo por conta do propietario que o achegou a indemnización correspondente; o seu importe será fixado no mencionado acordo.

2. Nos supostos de subrogación real, se existisen dereitos reais ou cargas que se xulguen incompatibles co planeamento, o acordo aprobatorio do proxecto de compensación declarará a súa extinción e fixará a indemnización correspondente por conta do propietario respectivo.

3. Existindo subrogación real e compatibilidade co planeamento urbanístico, se a situación e características do novo predio fosen incompatibles coa subsistencia dos dereitos reais ou cargas que deberían corresponderlles, as persoas a que estes dereitos favorecesen poderán obte-la súa transformación nun dereito de crédito con garantía hipotecaria sobre o novo predio na contía en que a carga fose avaliada. O rexistrador da propiedade que aprecie tal incompatibilidade así o fará constar no asento respectivo.

4. En defecto de acordo entre as partes interesadas, calquera delas poderá recorrer ó xulgado competente da orde civil para obter unha resolución declarativa de compatibilidade ou incompatibilidade e, neste último caso, para fixa-la avaliación da carga e a constitución da mencionada garantía hipotecaria.

5. Malia o disposto nos números 1 e 2, as indemnizacións pola extinción de serventías prediais ou

dereitos de arrendamento incompatibles co planeamento ou a súa execución del consideraranse gastos de urbanización, correspondéndolles ós propietarios en proporción ás súas respectivas cotas.

Base 8ª. Criterios de avaliación de contribucións de empresas urbanizadoras.

1. A avaliación da contribución de empresas urbanizadoras efectuarase tendo en conta o custo do proxecto de urbanización, ou das partidas del que vaia financiar e/ou executar en relación co valor do solo da área.

2. Esta avaliación inicial revisarase en función das certificacións de obra, quedando pendente a valoración final da liquidación definitiva que se produza.

3. A participación da empresa diminuirá a dos membros propietarios na medida en que así resulte da cota de participación asignada á empresa.

Base 9ª. Contratación das obras de urbanización.

1. A execución das obras de urbanización poderá realizarse, en todo ou en parte, por empresas incorporadas á xunta de compensación.

2. A execución será realizada pola empresa que determine o consello rector, seguindo o criterio establecido pola asemblea para a elección de contratista. Este procedemento de selección estará presidido, en todo caso, polos principios de transparencia e publicidade.

Base 10ª. Expropiación por incumprimento de obrigas.

1. Con independencia das expropiacións referidas ós propietarios de terreos que resolvan non incorporarse á xunta de compensación, procederá tamén a expropiación na hipótese de incumprimento, por parte dos membros incorporados, das súas obrigas legais e estatutarias.

2. Relativamente ó procedemento expropiatorio, haberá que se ater ó disposto pola normativa en vigor.

Base 11ª. Alleamento de terreos pola xunta.

1. A xunta poderá reservarse parcelas no proxecto de compensación para allealas directamente, co obxecto de sufraga-los gastos previstos de urbanización.

2. Co mesmo obxecto, a xunta poderá concertar créditos con garantía hipotecaria dos predios pertencentes ós propietarios membros. Se se emitisen títulos, cumprirase o disposto nos artigos 154 e concordantes da Lei hipotecaria para a constitución da hipoteca en garantía dos transmisibles por endoso ou ó portador.

3. A realización dos actos sinalados nos números anteriores será competencia da asemblea xeral.

4. Na hipótese de venda de parcelas as obrigas do adquirente respecto dos gastos de urbanización determinaranse de forma expresa no documento de compravenda.

Base 12ª. Responsabilidade da xunta de compensación.

1. A xunta de compensación será directamente responsable diante do concello da execución do planeamento no polígono.

2. Para determina-lo contido das obrigas dos membros da xunta teranse en conta as esixencias legais de carácter xeral e as determinacións derivadas do planeamento aplicable.

3. A xunta será tamén responsable diante de cada un dos seus membros polo dano patrimonial que puideren experimentar pola actuación daquela.

Base 13ª. Afección dos terreos.

1. Os terreos incorporados á xunta fican afectos ó cumprimento das obrigas inherentes ó sistema, o que se fará constar no Rexistro da Propiedade.

2. Os predios resultantes ficarán afectos, con carga de carácter real, ó pagamento dos custos de execución da actuación, na proporción que corresponda. Esta afectación quedará cancelada cando a instancia do titular se lle xunte certificación municipal expresiva de ter recibido a obra de urbanización e certificación da xunta acreditativa de se cumpriren as obrigas correspondentes.

3. Esta afección poderá ser substituída, de acordo co establecido no artigo 19.3º do Real decreto 1093/1997, do 4 de xullo, polo que se aproban as normas complementarias ó regulamento para a execución da Lei hipotecaria sobre inscrición no Rexistro da Propiedade de actos de natureza urbanística, pola previsión no proxecto de compensación de que a obriga de urbanizar se garantiu mediante outro tipo de garantías admitidas pola lexislación urbanística aplicable.

Base 14ª. Avaliación das parcelas resultantes.

1. Toda a superficie que, de acordo co planeamento, sexa susceptible de propiedade privada, aínda que non sexa edificable, deberá ser obxecto de adxudicación ós propietarios incorporados á xunta no proxecto de compensación.

2. Os predios resultantes avaliaranse exclusivamente de acordo coa edificabilidade en metros cadrados que lles corresponda, tendo en consideración os coeficientes de ponderación que establece o plan parcial.

Base 15ª. Regras para a adxudicación dos predios resultantes.

1. Os propietarios incorporados á xunta de compensación, ó concello, se é o caso, e, se así proceder, ás empresas urbanizadoras, teñen dereito á adxudicación en propiedade dos predios resultantes. O dereito dos socios será o correspondente á súa cota

de participación, tendo en consideración os coeficientes de ponderación sinalados na base anterior.

2. Para estes efectos, procurarase, na medida do posible, a adxudicación de predios independentes a cada propietario. Non obstante, cando a escasa contía dos dereitos dalgúns deles non o permita, seranlles adxudicadas en pro indiviso.

3. Non serán feitas adxudicacións que excedan do quince por cento os dereitos dos propietarios.

4. Se a contía do dereito dalgún propietario non atinxe o quince por cento da parcela mínima edificable, a adxudicación poderá substituírse por unha indemnización en metálico.

5. En todo caso, as diferencias de adxudicación serán obxecto de compensación económica entre os partícipes. Para estes efectos, a xunta de compensación establecerá o valor correspondente ó metro cadrado de edificabilidade.

6. Non poderán adxudicarse como predios independentes superficies inferiores á parcela mínima ou que non reunan a configuración e características adecuadas para seren edificadas conforme o planeamento.

7. Procurarase que os predios adxudicados estean situados en lugar próximo ó das antigas propiedades dos mesmos titulares. Este criterio cohonestarase cos de adxudica-lo máximo número de predios independentes e de agrupa-las adxudicacións que lle correspondan a cada propietario.

8. Os terreos que conforme o plan que se executa deban ser obxecto de cesión gratuíta ó concello, seranlle adxudicados directamente a el no proxecto de compensación.

9. O concello poderalles transmitir ós propietarios de terreos incluídos neste polígono, logo de conformidade destes e polo prezo resultante do seu valor urbanístico, a edificabilidade que lle corresponde nela, no suposto de que entenda que non se adecua ós obxectivos do patrimonio municipal do solo. Neste caso, se o acordo co concello é anterior á aprobación do proxecto de compensación, este será elaborado tendo en conta esta circunstancia.

Base 16ª. Regras para a distribución de lucros e perdas.

A distribución de lucros e perdas resultantes da actuación pola xunta de compensación farase tendo en conta as respectivas cotas de participación dos seus membros.

Base 17ª. Proxecto de compensación.

1. De acordo cos criterios establecidos nestas bases, a xunta formulará un proxecto de compensación que conterá as seguintes determinacións:

a) Memoria xustificativa das solucións que se adoptan.

b) Descrición dos predios de orixe, segundo os títulos achegados, coas correccións procedentes en

función da realidade física dos terreos incorporados. Expresaranse as cargas e gravames, condicións e restantes dereitos que os afecten; o respectivo propietario, a contía do seu dereito no proxecto de compensación e o criterio utilizado para definilo e cuantificalo.

c) Descrición e avaliación das edificacións, plantacións, obras e instalacións existentes, ben sexan compatibles ou incompatibles coa ordenación resultante dos documentos de planeamento, de acordo cos criterios expresados nas bases quinta e sexta.

d) Descrición dos predios resultantes, incluíndo, se é o caso, os que deban ser atribuídos ó concello como adxudicatario do aproveitamento que lle corresponda; titulares ós que lles fosen adxudicados e concepto en que o fosen. Expresarase relativamente a cada predio: a superficie, o uso a que estea destinado, as condicións de edificación, así como as cargas e gravames, condicións, substitucións e restantes dereitos que os afecten, por non seren incompatibles co planeamento, e o aproveitamento urbanístico que a cada predio corresponda.

e) Localización dos terreos dotacionais de cesión obrigatoria.

f) Superficies ou parcelas que a propia xunta se reserve, se é o caso, para as allear directamente, co obxecto de sufraga-los gastos previstos de urbanización.

g) Compensacións en metálico, se fosen procedentes por diferencias de adxudicación.

h) Determinación dos custos de urbanización, con expresión da participación de cada un dos predios adxudicados neles, ós que quedan os predios gravados con carga real.

i) Condicións de incorporación da empresa urbanizadora.

j) Conta de liquidación provisional.

2. O proxecto de compensación someterase, logo de audiencia de tódolos afectados polo prazo dun mes, a aprobación da asemblea xeral, debendo adoptarse o correspondente acordo por maioría dos seus membros que, pola súa vez, deben alcanza-las dúas terceiras partes das cotas de participación. Posteriormente, o proxecto someterase á aprobación definitiva do concello. Para esta tramitación aplicarase, en canto for posible, o procedemento abreviado establecido no artigo 137 da Lei do solo de Galicia.

3. Unha vez aprobado definitivamente o proxecto de compensación, o concello procederá a outorgar escritura pública ou a expedir certificación, coas solemnidades e requisitos legais e co contido esixido polos artigos 6 e 7 do Real decreto 1093/1997, do 4 de xullo, aprobando as normas complementarias ó regulamento para a execución da Lei hipotecaria sobre inscrición no Rexistro da Propiedade de actos de natureza urbanística. A escritura pública ou o documento administrativo será inscrito no Rexistro da Propiedade.

4. Este acordo de aprobación definitiva producirá, se é o caso, a cesión de dereito ó concello, en pleno dominio e libre de cargas, de tódolos terreos que foren de cesión obrigatoria e gratuíta, segundo o plan que se executa.

Base 18ª. Cotas de participación.

1. A participación dos propietarios nos lucros e cargas derivados do planeamento que se executa será proporcional á superficie dos predios achegados, por estimar que o valor unitario destes é igual para todos eles.

2. Inicialmente, a cada un dos socios da xunta atribuiráselle unha cota de participación proporcional á superficie real achegada. Tal cota definirá, ata a aprobación definitiva do proxecto de compensación, o voto porcentual dos socios nos acordos dos órganos de goberno.

3. Posteriormente á aprobación definitiva do proxecto de compensación, procederase a fixa-la cota de adxudicación que se lle atribúe a cada socio en función da edificabilidade realmente asignada e que se define, desde ese momento, e voto porcentual dos socios nos acordos dos órganos de goberno e a participación no proceso de xestión.

4. O valor das edificacións, obras, plantacións e instalacións existentes nos predios achegados non influirá na atribución das cotas de participación ós socios.

5. No suposto de incorporación á xunta de empresas urbanizadoras, procederase ó reaxuste das participacións porcentuais dos socios propietarios, asignándose a cota correspondente á súa contribución á empresa urbanizadora.

6. O pagamento deberá facerse en metálico, pero, mediante acordo da asemblea xeral, poderá facerse, en todo ou en parte, mediante a transmisión á xunta da propiedade de terreos incorporados ó sistema de compensación.

7. O pagamento realizarase nos prazos e contías que determine o consello rector, en aplicación das previsións establecidas pola asemblea xeral no acto de aprobación dos orzamentos.

8. A transmisión en pleno dominio de terreos á xunta implica a correspondente diminución, para o transmitente, da súa cota de participación na xunta.

Base 19ª. Posibilidade de edificación dos predios.

1. Será posible o comezo da edificación do predio resultante antes da conclusión das obras de urbanización, sempre que obteñan licencia municipal e sexa dado cumprimento ás esixencias referidas polos artigos 41 e 42 do Regulamento de xestión.

2. Cando as obras de edificación poidan afectar a servicios públicos e instalacións de titularidade pública, a xunta de compensación poderá solicitar do concello que se esixa a prestación dos avais necesarios para garanti-la reposición correspondente.

Base 20ª. Conservación da urbanización.

1. A xunta de compensación efectuará a conservación das obras de urbanización ata o momento da súa recepción definitiva por parte do Concello da Coruña, repercutindo o seu custo entre os propietarios incorporados en función da súa cota de participación, excepto os servicios que poidan ser medidos por contador ou avaliación que o serán en proporción ó consumo e gasto habido.

2. Malia isto, o concello poderá recibir provisionalmente a urbanización, na súa totalidade ou en parte, e impor ós particulares que realicen obras de construcción de inmobles as cautelas necesarias ou os avais precisos para garanti-la conservación ou reposición das obras realizadas.

3. O non-pagamento das cotas de conservación daralle dereito á xunta de compensación a solicitar do concello a cobranza delas en vía de constrinximento administrativo.

4. As obras de urbanización serán recibidas definitivamente polo Concello da Coruña despois do transcurso do prazo dun ano, contado a partir da data da recepción provisional delas por parte da xunta. Se é o caso, antes de finaliza-lo citado prazo, o concello poderá realiza-las observacións pertinentes respecto das obras.

Estatutos

Capítulo I

Disposicións xerais

Artigo 1º.-Denominación, natureza e réxime.

1. Coa denominación de Xunta de Compensación do Polígono de Mesoiro, previsto polo Plan Parcial de Mesoiro, constitúese unha entidade urbanística colaboradora, de natureza administrativa, á que se lle recoñecerá personalidade xurídica propia e plena capacidade de obrar para o cumprimento dos seus obxectivos, desde a súa inscrición no Rexistro de Entidades Urbanísticas Colaboradoras.

2. A xunta de compensación estará constituída polos propietarios de terreos afectados que acepten o sistema, polas entidades públicas titulares de bens demaniais ou patrimoniais incluídos no seu ámbito e, se é o caso, polas empresas urbanizadoras que se incorporen a ela.

3. A xunta réxese polos presentes estatutos e polas bases de actuación que os complementan e, no disposto nestas normas, polo establecido na lexislación urbanística que for de aplicación.

Artigo 2º.-Duración.

A xunta de compensación estará habilitada para comeza-las súas funcións desde a súa inscrición no Rexistro de Entidades Urbanísticas Colaboradoras e desenvolverá a súa actividade ata o total cumprimento do seu obxecto, salvo que se produza a súa disolución nos termos establecidos nestes estatutos.

Artigo 3º.-Domicilio social.

A xunta ten o seu domicilio social no edificio Fadesa, situado na Av. de Alfonso Molina s/n. Este domicilio poderá ser modificado por acordo do consello rector, que deberá ser notificado ó concello para a súa posterior anotación no rexistro correspondente.

Artigo 4º.-Ámbito territorial, obxecto e fins.

1. O ámbito territorial de actuación da xunta é o correspondente ó polígono definido polo Plan Parcial de Mesoiro.

2. É obxecto primordial da xunta o cumprimento dos deberes de urbanización do polígono, cesión ó concello dos terreos que correspondan e equidistribución entre os propietarios integrados nela dos lucros e cargas derivados do planeamento que se executa.

3. Para a consecución do obxectivo primordial, asígnaselle á xunta o cumprimento dos seguintes fins:

a) Agrupación dos propietarios de terreos afectados que acepten o sistema das entidades públicas titulares de bens incluídos no ámbito e das empresas urbanizadoras incorporadas a aquela, coa finalidade de que, mantendo a titularidade dos seus bens e dereitos, realicen unha actuación conxunta para executa-lo planeamento urbanístico e distribuír equitativamente as súas cargas e beneficios.

b) Redacción e tramitación diante da Administración municipal de toda clase de instrumentos de desenvolvemento do planeamento, de proxectos de Urbanización e de compensación, así como a contratación e execución das obras necesarias para os levar a termo.

c) Tramitación das actuacións que cumpran para a inscrición da xunta no Rexistro de Entidades Urbanísticas Colaboradoras; para a expropiación forzosa, en beneficio da xunta, tanto relativamente ós propietarios que non se incorporen a ela en tempo oportuno, como relativamente ós incorporados que incumpran as súas obrigas; e para a cobranza en vía de constrinximento administrativo das cantidades debidas á xunta polos asociados.

d) Adquisición, posesión, venda, gravame de toda clase de bens, mobles ou inmobles, por calquera título, mesmo por expropiación forzosa, actuando neste caso como beneficiaria da expropiación.

e) Cesión ó concello dos terreos que correspondan.

f) Adxudicación das parcelas resultantes da xestión ós membros incorporados á xunta, na forma que se determine no proxecto de compensación.

g) Formalización de operacións de crédito, mesmo con garantía hipotecaria dos terreos achegados e con emisión de títulos, nas condicións establecidas no artigo 154 da Lei hipotecaria.

h) Inscrición no Rexistro da Propiedade do proxecto de compensación.

i) Xestión e defensa dos intereses comúns dos membros da xunta, diante de calquera persoa, autoridade e organismo das administracións actuantes, así como diante dos órganos da Administración de xustiza.

j) A disposición con carácter unicamente fiduciario dos terreos do polígono para os efectos do cumprimento das obrigas urbanísticas.

k) A solicitude e xestión dos beneficios fiscais establecidos, ou que poidan establecerse, en relación coa actividade que se desenvolva.

l) O exercicio de cantos dereitos e actividades caiban consonte a lexislación en vigor.

4. No suposto da alínea c) do número anterior, a expropiación forzosa tramitarase pola Administración urbanística actuante, sendo beneficiaria da xunta de compensación.

5. Os terreos expropiados seranlles adxudicados ós membros da xunta de compensación, no proxecto de compensación, proporcionalmente ás cotas que lles corresponderen, excepto que a asemblea xeral resolva a aplicación doutro criterio.

Artigo 5º.-Control administrativo.

1. A xunta de compensación actúa baixo control administrativo do Concello da Coruña.

2. No exercicio desta función de control cábelle ó concello a adopción dos actos e acordos que lle atribúe a lexislación urbanística en vigor, en particular:

a) Dar audiencia dos estatutos e bases de compensación ós propietarios non promotores da xunta, para a formulación de observacións e para a incorporación destas a ela e dar audiencia das alegacións destes ós promotores para súa contestación.

b) Aprobación dos estatutos, das bases de actuación e das modificacións que acorde a xunta.

c) Designación de representante na xunta de compensación.

d) Aprobación da constitución da xunta e remisión do acordo e da escritura de constitución ó Rexistro de Entidades Urbanísticas Colaboradoras, para súa inscrición.

e) Exercicio da expropiación forzosa, en beneficio da xunta de compensación, respecto dos terreos dos propietarios non incorporados a ela ou que incumpran as súas obrigas, cando estes estatutos, as bases ou as disposicións legais prevexan a expropiación por tal incumprimento.

f) Utilización da vía de constrinximento para a cobranza das cantidades debidas por calquera dos membros da xunta.

g) Resolución dos recursos que se interpoñan contra acordos da xunta.

Artigo 6º.-Rexistro de Entidades Urbanísticas Colaboradoras.

1. O acordo aprobatorio da constitución da xunta de compensación inscribirase no Rexistro de Entidades Urbanísticas Colaboradoras.

2. Tamén deberán constar no mesmo rexistro os nomeamentos e cesamentos dos compoñentes do consello rector e a incorporación de empresas urbanizadoras, así como as modificacións que, se é o caso, se produzan nos estatutos.

Capítulo II

Socios e constitución da xunta

Artigo 7º.-Actuacións preparatorias.

Os propietarios interesados en promove-lo proceso de execución, que representen unha superficie superior ó cincuenta por cento da que corresponda ó polígono, presentarán os proxectos de estatutos e bases no concello para seren tramitados.

Artigo 8º.-Incorporación á xunta dos propietarios.

1. A xunta intégrase das persoas físicas ou xurídicas propietarias dos terreos comprendidos na área que, voluntariamente, se incorporaron a ela e que constitúen a totalidade dos afectados.

2. Durante o proceso de tramitación de estatutos e bases, os propietarios interesados poderán dirixirse ó concello solicitando seren incorporados á xunta.

3. Despois da aprobación definitiva dos estatutos e bases, o concello notificarálle-lo acordo correspondente ós propietarios afectados, significando ós que non solicitaran a súa incorporación que poderán facelo, se así o desexasen, no prazo dun mes desde a notificación, coa advertencia da expropiación ou ocupación dos seus terreos, de acordo co previsto no artigo 134 da Lei do solo de Galicia.

4. Os propietarios ou interesados que non concorran ó outorgamento da escritura de constitución poderán consentir seren incorporados mediante escritura de adhesión, que deberá ser outorgada no prazo de quince días hábiles contados a partir da data de outorgamento da anterior.

5. Ós propietarios que non formalizaren a súa incorporación na forma e prazos expresos, seralles aplicable o réxime previsto no artigo 134 da Lei do solo de Galicia.

Artigo 9º.-Constitución.

1. O concello convocará tódolos propietarios para a constitución da entidade, mediante notificación certificada, coa antelación mínima de dez (10) días hábiles á data prevista.

2. A constitución farase mediante escritura pública na que deberá constar:

-A relación de propietarios e, se é o caso, empresas urbanizadoras.

-Relación e descrición dos predios dos que son titulares.

-Acordo de constitución.

-Persoas que se designen para ocuparen cargos do consello rector.

3. Trasladarase ó concello copia autorizada da escritura de constitución e este adoptará, se procede, acordo aprobatorio e elevará o acordo municipal e copia das escrituras ó Rexistro de Entidades Urbanísticas.

Artigo 10º.-Incorporación de empresas urbanizadoras.

1. Poderán incorporarse á xunta empresas urbanizadoras que acheguen, en todo ou en parte, os recursos necesarios para a urbanización.

2. A incorporación poderá tramitarse no momento en que se proceda á adxudicación das obras de urbanización. Será necesario, amais, que as empresas urbanizadoras incorporadas garantan a súa xestión na forma e contía que determine, se é o caso, a asemblea.

3. Para a avaliación das contribucións da empresa urbanizadora haberá que se ater ó indicado nas bases de actuación.

Artigo 11º.-Titularidades especiais.

1. Cando os predios pertenzan a menores ou incapacitados, formarán parte da xunta os seus representantes legais e a disposición de tales predios pola xunta non estará suxeita a limitacións de carácter civil.

2. No caso de existir cotitularidade sobre un predio ou dereito, os cotitulares deberán designar unha persoa para o exercicio das súas facultades como asociado, respondendo solidariamente fronte á entidade de cantas obrigas dimanaren da súa condición. Se non designan representante no prazo que para o efecto sinale a xunta, será nomeado por esta coa aprobación municipal.

3. No caso de que algún predio pertenza en propiedade a unha persoa e calquera outra teña dereito real limitativo do dominio sobre ela, ou, no caso da existencia de arrendamento, a calidade de socio corresponderá ó propietario, sen prexuízo de que ó titular do dereito real ou persoal lle sexan recoñecidos os dereitos que lle correspondan.

Artigo 12º.-Transmisión de bens e dereitos.

1. A incorporación dos propietarios á xunta non implica a transmisión a ela da propiedade dos inmobles, actuando aquela como fiduciaria con poder de disposición.

2. Os membros da xunta poderán allea-los seus terreos e a correlativa cota de participación na xunta, coas seguintes condicións e efectos:

a) O transmitente notificará de modo fidedigno á xunta as circunstancias do adquirente e as condicións da transmisión, para os efectos da necesaria constancia.

b) O adquirente, por calquera clase de título, queda subrogado, a partir do momento da transmisión, nos dereitos e obrigas vinculados á participación alleada, mesmo os que estean pendentes de materialización, facendo expresa mención diso no título de transmisión.

c) A condición de socio é inseparable da propiedade dos terreos correspondentes.

Capítulo III

Dereitos e obrigas dos membros da xunta

Artigo 13º.-Dereitos dos socios.

1. Serán dereitos dos socios:

a) Exerce-las facultades dominicais sobre os predios da súa propiedade achegados, coas limitacións derivadas da afección daqueles ó cumprimento das obrigas inherentes ó sistema de compensación e dos actos de disposición ou administración efectuados pola xunta en exercicio das súas facultades fiduciarias.

b) Recibi-los terreos que como resultado da aplicación do sistema lles correspondan e as diferencias de adxudicación en metálico.

c) Participar na distribución de lucros e cargas derivados do planeamento que se executa e no patrimonio resultante da liquidación, en proporción ás súas respectivas cotas.

d) Asistir, por si ou por medio de representante, ás sesións da asemblea xeral, emitindo o seu voto consonte a proporcionalidade derivada da súa cota de participación.

e) Coñece-las actuacións dos órganos de goberno da xunta, mediante os informes e contas rendidas por estes diante da asemblea xeral.

f) Interpo-los recursos que procedan contra os acordos adoptados polos órganos de goberno.

2. Para o exercicio dos seus dereitos, os membros da xunta terán de se acomodar ó indicado nos estatutos e acordos da entidade e poderá serlles esixido que se achen ó corrente no pagamento das cotas, sen prexuízo dos recursos que para o efecto eventualmente interpuxeran.

Artigo 14º.-Obrigas dos socios.

1. Son obrigas dos socios:

a) Pór á disposición dos órganos de goberno da xunta os documentos acreditativos da súa titularidade e, se é o caso, indica-las circunstancias dos titulares de dereitos reais ou persoais, con expresión da natureza e contía das cargas e gravames.

b) Sinalar un domicilio para efecto de notificacións, comunicándolle á xunta as mudanzas del.

c) Cumpri-los acordos adoptados polos órganos de goberno da xunta, sen prexuízo da posibilidade de interpo-los correspondentes recursos.

d) Satisfacer puntualmente as cantidades establecidas polos órganos de goberno, en proporción ó valor da súa participación, e nos prazos establecidos.

e) Notificarlle á xunta as transmisións, ou actos de gravame, dos terreos da súa propiedade.

f) Regulariza-la titularidade e situación rexistral dos terreos achegados, dentro dos prazos indicados polo consello rector.

g) Permiti-la ocupación dos seus predios para a execución das obras de urbanización, depósito de materiais e instalacións complementarias.

2. Os dereitos e obrigas dos socios poderán ser exercidos persoalmente ou a través de representantes designados para o efecto.

Capítulo IV

Órganos de goberno e administración

Artigo 15º.-Enumeración.

1. Os órganos de goberno e administración da xunta de compensación son a asemblea xeral e o consello rector.

2. O presidente e secretario do consello rector serano, tamén, da asemblea xeral.

3. Tódolos socios, incluídos os ausentes e os disidentes, quedan sometidos ós acordos validamente adoptados polos órganos de goberno, dentro das súas respectivas atribucións.

Artigo 16º.-Funcionamento da asemblea xeral.

1. A asemblea xeral é o órgano supremo de decisión da xunta de compensación e dela forman parte tódolos asociados.

2. A primeira reunión terá carácter constituínte e será convocada polos promotores dentro do prazo sinalado polo concello para o outorgamento da escritura de constitución.

3. Reunirase en forma ordinaria, polo menos, dúas veces ó ano; unha, dentro dos tres primeiros meses de cada exercicio (que coincidirá co ano natural), para aproba-la memoria, contas e balance do exercicio anterior; e a outra, nos tres últimos meses de cada exercicio, para aproba-lo orzamento do ano seguinte. Se este non for aprobado, prorrogarase o do exercicio anterior.

4. Toda reunión da asemblea xeral que non sexa unha das referidas no número anterior terá carácter extraordinario.

5. A asemblea xeral extraordinaria reunirase cando o acorde o seu presidente ou o consello rector, por propia iniciativa ou por proposta de socios que representaren, polo menos, trinta por cento (30%) das cotas, debendo indicarse na proposta os asuntos que han de ser tratados. Se o presidente ou o consello non convocan a asemblea dentro dos quince días seguintes ó da petición, os interesados poderán dirixirse ó concello para que sexa este o que a convoque. Entre a convocatoria e a realización da sesión non poderá decorrer máis dun mes.

6. As reunións da asemblea, ordinaria ou extraordinaria, serán convocadas polo presidente mediante carta con aviso de recepción, remitida ós socios da xunta, polo menos, con tres días de antelación á data indicada. A convocatoria indicará o lugar, día e hora da reunión, en primeira e segunda convocatoria, e os asuntos incluídos na orde do día. Entre a primeira e a segunda reunión deberá mediar, polo menos, o prazo de trinta minutos.

Malia o disposto no número anterior, a asemblea xeral entenderase convocada e quedará validamente constituída para tratar de calquera asunto da súa competencia, sempre que se acharen presentes tódolos seus membros e así o acorden por unanimidade, sen que sexa preciso, neste caso, convocatoria previa.

7. A asemblea xeral quedará validamente constituída, en primeira convocatoria, cando concorreren a ela, por si ou representados, socios con cotas de participación que representen, polo menos, o cincuenta por cento do total. En segunda convocatoria será válida a constitución da asemblea calquera que sexa o número de socios que concorran a ela, sempre que estea presente, amais do presidente e o secretario ou as persoas que legalmente os substitúan, un socio.

8. Os acordos adoptaranse por maioría simple de cotas de participación, salvo o de aprobación do proxecto de compensación que requirirá o voto favorable de socios con cotas de participación que representen as dúas terceiras partes do total.

9. Os acordos serán inmediatamente executivos, sen prexuízo dos recursos e accións que se interpoñan contra eles.

Artigo 17º.-Actas.

1. De cada reunión da asemblea xeral o secretario levantará acta, que poderá ser aprobada na mesma reunión ou na seguinte que se realice segundo decisión do presidente, facéndose constar nela os acordos adoptados, o resultado das votacións realizadas e, se é o caso, as intervencións das que se entregue o texto á mesa por escrito.

2. As actas figurarán no libro correspondente, debidamente dilixenciado, e serán asinadas polo presidente e polo secretario.

3. Por requirimento dos membros que estiveren ó corrente das súas obrigas ou dos órganos urbanísticos deberá o secretario, co visto e prace do presidente, expedir certificacións do contido do libro de actas.

Artigo 18º.-Atribucións da asemblea xeral.

Son atribucións da asemblea xeral.

a) A designación e cesamento dos membros do consello rector, a aprobación do orzamento de cada exercicio e das contas del.

b) A modificación dos estatutos, sen prexuízo da necesaria aprobación posterior polo concello.

c) A imposición de contribucións extraordinarias para atende-los gastos non previstos no orzamento anual, ou para atende-las insuficiencias temporais de tesouraría.

d) A realización de toda clase de actos de dominio tales como adquirir, allear e gravar toda clase de bens e dereitos; e constituír, modificar ou cancelar dereitos reais impostos sobre os bens ou dereitos pertencentes á xunta.

e) A aprobación de plans ou proxectos urbanísticos ou constructivos, para os someter á correspondente tramitación administrativa.

f) A formalización de créditos e a emisión de títulos, prestando garantía hipotecaria cos terreos integrados na xunta.

g) A resolución procedente para a incorporación á xunta de empresas urbanizadoras, sinalando a cota ou cotas de participación e a correlativa modificación das asignadas inicialmente ós socios propietarios.

h) A prestación das garantías que sexan esixidas pola Administración urbanística.

i) A disolución e liquidación da xunta de compensación; e

j) En xeral cantas sexan precisas para a xestión común.

Artigo 19º.-Do consello rector.

1. O consello rector é o órgano permanente de goberno e administración da xunta para o exercicio de cantas funcións non estean expresamente reservadas á asemblea polos presentes estatutos ou por acordo expreso dela.

2. Son funcións específicas do consello rector:

a) Executa-los acordos da asemblea xeral.

b) A proposición de acordos á asemblea xeral.

c) Administra-los fondos da xunta, para o cal poderá abrir, manter e cerrar contas correntes, de aforro e de crédito en institucións financeiras, depositando e retirando fondos delas como lle conveña; facer e esixir pagamentos, cobranzas e liquidacións, calquera que sexa a súa causa xurídica e a persoa ou entidade obrigada; librar, endosar, avalar e descontar letras de cambio; e, en xeral, realizar toda clase de actos e contratos en beneficio dos intereses da xunta.

d) Elevar proposta á asemblea xeral das contribucións económicas que han de realiza-los socios da xunta, facéndoas figurar no orzamento anual ordinario, así como das contribucións extraordinarias que sexan necesarias. Unha vez acordadas pola asemblea as contribucións ordinarias ou extraordinarias, o consello establecerá a forma e prazos de pagamento en que han de satisfacerse e procederá contra os socios morosos.

e) Solicitar dos órganos urbanísticos competentes o exercicio das potestades públicas, en beneficio dos intereses da xunta, para proceder á expropiación

dos predios dos que os propietarios non se integren na xunta de compensación, ou estean en descuberto das súas obrigas para con ela, ou para proceder, se é o caso, en vía de constrinximento administrativo contra estes últimos.

f) Adxudicar e contrata-las obras de urbanización derivadas dos proxectos previamente aprobados en asemblea xeral. En todo caso, o procedemento de contratación das obras de urbanización estará caracterizado polos principios de transparencia, publicidade e concorrencia.

g) Exercer cantas facultades lle sexan delegadas pola asemblea xeral de entre as asignadas como atribucións dela. Non serán delegables a designación dos membros do consello rector, aprobación do orzamento, nin a censura de contas.

h) Nomear e releva-lo persoal necesario para a xestión da xunta.

3. O consello rector componse de cinco membros e o secretario:

a) Presidente, vicepresidente e secretario, designados pola asemblea xeral.

b) Tres vocais, un dos cales será o representante do concello e outro dos propietarios minoritarios.

4. As designacións deberán recaer, necesariamente, en persoas físicas. O nomeamento efectuarase por dous anos, podendo procederse á súa reelección por períodos iguais en virtude de acordo expreso da asemblea xeral. En caso de falecemento, renuncia ou acordo de cesamento dun ou máis membros, o propio consello poderá designa-las persoas que deban substituílos ata a súa renovación regulamentaria.

5. O consello rector determinará o seu propio réxime de actuación, sesións, acordos e actas. En calquera caso os acordos do consello rector serán adoptados por maioría do seus membros.

Artigo 20º.-Do presidente, vicepresidente e secretario.

1. O presidente é o representante legal, xudicial e extraxudicial, da xunta de compensación e dos seus órganos de goberno, podendo outorgar poderes para o exercicio de referida representación. Correspóndelle ó presidente:

a) Convocar, presidir, suspender e levanta-las sesións da asemblea xeral e do consello rector.

b) Fixa-la orde do día, dirixi-las deliberacións e decidi-los empates con voto de calidade; executar e facer cumpri-los acordos da asemblea e do consello rector, autoriza-las súas actas, certificados e cantos documentos o requiran.

c) Exercer, na forma que o consello rector determine, calquera actividade bancaria que esixa o funcionamento da xunta.

d) En xeral, exercer cantas funcións sexan inherentes ó seu cargo, ou lle sexan delegadas pola asemblea xeral ou polo consello rector.

O presidente será designado pola asemblea xeral e o seu nomeamento terá a duración prevista no artigo 19º, podendo ser reelecto indefinidamente.

2. O vicepresidente, que será nomeado en igual forma e polo mesmo período có presidente, substituirá o presidente en casos de vacante, ausencia, delegación, doenza ou imposibilidade.

3. O secretario, que será nomeado en igual forma có presidente, é o fedatario da xunta. Son funcións deste:

a) Asistir ás reunións da asemblea xeral e do consello rector.

b) Levantar acta das sesións que realicen a asemblea xeral e o consello rector, transcribíndoas ó libro de actas correspondente.

c) Expedir, por petición de parte, certificados delas, co visto e prace do presidente.

d) Levar un libro-rexistro no que se relacionarán os socios integrantes da xunta de compensación, con expresión das súas circunstancias persoais, domicilio, data de incorporación, predios dos que son titulares e cantos datos complementarios se xulguen procedentes.

e) Notificarlle a tódolos os membros da xunta, cando pola súa natureza ou entidade proceda, os acordos da asemblea xeral e do consello rector e, se é o caso, ós órganos urbanísticos competentes.

O cargo de secretario poderá ser atribuído a unha persoa que no sexa membro da xunta, tendo en tal caso voz pero non dereito de voto nas reunións que se realicen. No caso de vacante, ausencia ou doenza, o cargo será desempeñado por un membro do consello rector designado polo seu presidente.

Capítulo V

Réxime económico e xurídico

Artigo 21º.-Patrimonio.

O patrimonio da xunta estará integrado polos bens e dereitos que, por calquera título, sexan adquiridos por ela.

Artigo 22º.-Ingresos e gastos.

1. Serán ingresos da xunta de compensación:

a) As contribucións iniciais dos socios.

b) As cantidades pagas polos socios, con carácter ordinario ou extraordinario.

c) As subvencións e doazóns que se obteñan.

d) Os productos dos alleamentos de bens de que a xunta sexa titular.

e) As rendas e productos do seu patrimonio.

f) As participacións e ingresos procedentes de convenios con outras entidades e organismos para a realización de fins urbanísticas.

2. Serán gastos da xunta de compensación os de:

a) Xestión da actuación urbanística.

b) Execución das obras de urbanización e, se é o caso, de edificación.

c) Pagamento de honorarios profesionais, administrativos, de garda, vixilancia, etc., que se produzan.

d) Indemnizacións por expropiacións de bens e dereitos, cando a xunta fose beneficiaria da expropiación.

e) Cantos fosen esixidos polo cumprimento do obxecto social da xunta.

Artigo 23º.-Contribucións dos socios.

1. Sinaladas pola asemblea xeral as contribucións que, con carácter ordinario ou extraordinario, deban efectua-los socios, o consello rector definirá a forma e condicións de pagamento delas. A contía de tales contribucións será proporcional ás cotas que sexan atribuídas a cada socio.

2. Agás acordo en contrario, o depósito das cantidades que teñan que paga-los socios realizarase na conta bancaria designada para o efecto, dentro do mes seguinte á data de notificación do acordo do consello rector requirindo o pagamento. Vencido o prazo de pagamento en período voluntario a débeda será recargada nun dez por cento, en resarcimento de danos e perdas, e devengará, desde este momento ata ser paga, xuros ó tipo legal do diñeiro máis dous puntos. Vencido o prazo de pagamento voluntario, o consello rector procederá a lle solicitar ó concello a cobranza da débeda en vía de constrinximento administrativo ou a expropiación dos terreos do socio moroso.

Artigo 24º.-Interpretación dos estatutos.

A interpretación deste estatutos correspóndelles ós órganos de goberno da xunta.

Artigo 25º.-Impugnación de acordos.

1. Os acordos dos órganos da xunta son inmediatamente executivos e non se suspenderán por seren impugnados, salvo se así sexa acordado polo órgano que deba resolve-lo recurso.

2. Os acordos da asemblea poderán ser impugnados diante do Concello da Coruña, mediante a interposición do correspondente recurso, que deberá ser presentado no prazo máximo de quince días, desde a súa notificación ou desestimación presunta por silencio, que se entenderá producido se transcorren tres meses desde a presentación sen que recaera resolución.

No suposto dos acordos adoptados polo consello rector, o prazo computarse desde a data do seu coñecemento polo interesado, ou desde o momento en que se dea conta á asemblea xeral. Os acordos do consello rector poderán ser impugnados, no prazo de quince días desde notificación deles, diante da asemblea xeral, que deberá resolver no prazo de tres meses; transcorrido o cal entenderase desestimada a impugnación.

3. Non estarán lexitimados para a impugnación destes acordos aqueles que votaran a favor, por si ou a través de representantes.

Capítulo VI

Disolución e liquidación

Artigo 26º.-Disolución.

1. A xunta de compensación disolverase polas seguintes causas:

a) Cumprimento dos obxectivos sociais.

b) Acordo da asemblea xeral, adoptado co voto favorable de socios que representen o cincuenta por cento das cotas de adxudicación. Os socios, por subrogación, ficarán obrigados ó cumprimento das obrigas contraídas pola xunta e suxeitos ás responsabilidades subsidiarias a que puidese haber lugar.

2. O acordo de disolución requirirá a aprobación do concello e o cumprimento do disposto para o efecto na normativa urbanística.

Artigo 27º.-Liquidación.

Cando se extinga a personalidade xurídica terá lugar a liquidación da xunta, na forma seguinte:

1. O consello rector procederá á liquidación, con observancia das instruccións dictadas para o efecto pola asemblea xeral.

2. O patrimonio que poda restar en terreos, dereitos ou metálico, distribuirase entre os asociados en proporción ás súas respectivas cotas de adxudicación na entidade.

Capítulo VII

Réxime xurídico

Artigo 28º.-Réxime xurídico.

En todo aquilo non expresamente recollido nestes estatutos, haberá que se ater ó establecido con carácter supletorio pola Lei do solo de Galicia, Regulamento de xestión urbanística e nas restantes disposicións legais de aplicación.