Dentro do plan de actividades da Escola Galega de Administración Pública para o ano 2000 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócase unha Xornada de estudio sobre colexios profesionais e xornalistas, convocatoria que se desenvolverá conforme as seguintes bases:
1. Obxectivos.
A aprobación da Lei 2/1999, do 24 de febreiro, de creación do Colexio Profesional de Xornalistas de Galicia constitúe unha novidade de grande interese para este colectivo. Co único antecedente no noso país da Comunidade Autónoma de Cataluña, Galicia é pioneira na regulación da colexiación profesional neste eido. Esta radical novidade contribúe a suscitar unha serie de importantes interrogantes verbo da nova lei. Perséguese con esta xornada pór sobre a mesa algunhas, alomenos, desas interrogantes, entre as cales cómpre salienta-la propia eficacia da colexiación profesional como método de defensa dos dereitos dos traballadores e dos funcionarios dos medios de comunicación social. Preténdese que esta xornada se converta nun foro no que membros de gabinetes de comunicación social e de medios informativos da Administración pública galega, xornalistas e interesados nesta temática contrasten as súas ideas sobre este particular.
2. Contido.
Trataranse estes temas:
-A distribución de competencias entre o Estado e as comunidades autónomas, en materia de colexios profesionais.
-Profesións tituladas e colexios profesionais.
-A Lei catalá do Colexio Profesional de Xornalistas.
-A Lei galega do Colexio Profesional de Xornalistas.
3. Destinatarios.
Preferentemente, membros de gabinetes de comunicación social e medios informativos da Xunta de Galicia e da Administración local galega e xornalistas, e interesados en xeral.
4. Desenvolvemento.
-Horario: mañá e tarde.
-Lugar e data: a xornada convocada desenvolverase no salón de actos da Escola Galega de Administración Pública (rúa de Madrid 2-4, polígono das Fontiñas, Santiago de Compostela) o día 17 de febreiro de 2000.
5. Inscrición.
-Prazo: remata o mércores, día 16 de febreiro de 2000.
-Tramitación de solicitudes: as solicitudes irán dirixidas ó director da Escola Galega de Administración Pública, polígono das Fontiñas, rúa de Madrid, 2-4-15707 Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP, ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 37.
-Número de prazas: limitado á capacidade do local.
-Inscrición fóra de prazo: só se admitirán, de quedaren prazas libres, coa condición de que se cumpran os requisitos xerais antes indicados.
Os peticionarios poderán obter confirmación da súa posible admisión chamando, o día 16 de febreiro, por teléfono, das 10 ás 14.45 horas, ós seguintes números: 981 54 62 39/44 ou 981 54 60 40.
6. Modificacións.
A EGAP reserva para si a facultade de interpretar e de resolve-las incidencias que puidesen xurdir no desenvolvemento da xornada, así como a de cancelala, se o escaso número de solicitudes non xustificase a súa realización.
7. Certificación de asistencia.
Entregaráselles, ó remate desta xornada, a aquelas persoas inscritas que concorresen asiduamente a ela, cando a súa asistencia sexa igual ou superior ó 85% das horas lectivas programadas, e expresarase, neste documento, a natureza da actividade e a data da súa realización.
Santiago de Compostela, 31 de xaneiro de 2000.
Domingo Bello Janeiro
Director da Escola Galega de Administración
Pública
