Dentro do Plan de actividades da Escola Galega de Administración Pública para 2000 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse, en colaboración co Centro de Estudios Jurídicos Superiores e Editorial Montecorvo, unhas Xornadas sobre a Lei 53/1999, de modificación da Lei de contratos das administracións públicas, convocatoria que se desenvolverá conforme as seguintes bases:
1. Obxectivos:
Que a contratación administrativa é un tema importante, non ten dúbida ningunha. Non só polas implicacións económicas que ten en canto ó volume de negocio que xera, senón tamén pola variedade e complexidade dos diferentes modos de contratación existentes, e a dos mecanismos de control, calidade e garantías que converten a este tipo de relacións nun campo repleto de pequenos obstáculos reservado a verdadeiros expertos na materia.
Estas xornadas están configuradas co obxectivo de aclara-los aspectos máis importantes da reforma recentemente producida que vén mellorar, segundo a intención do lexislador, os procedementos de contratación establecidos na primitiva lei e que, malia non estar lonxe a súa promulgación, precisan dunha posta ó día a fin de palia-los problemas que xeraba a súa aplicación.
Serán obxecto de estudio non só as novidades producidas, senón tamén a relación existente entre o anteriormente lexislado e as actuais modificacións, coa finalidade de dar cumprida resposta ás dúbidas que a aplicación desta nova normativa de contratación administrativa poida producir en todos aqueles que están, dalgunha ou doutra maneira, inmersos no seu campo de acción.
2. Contido:
Trataranse estes temas:
-Novidades en materia de contratación administrativa: a súa repercusión na Comunidade Autónoma galega.
-Ámbito de aplicación da LGAP. Contratos administrativos, contratos privados. Os órganos de contratación.
-Requisitos para contratos coa Administración. Capacidade e solvencia das empresas. Clasificación e rexistro de empresas. O réxime das garantías na contratación.
-Actuacións administrativas preparatorias dos contratos. Os pregos. Procedemento e forma de adxudicación. Perfección e formalización do contrato.
-Execución dos contratos administrativos. Prerrogativas da Administración. Desenvolvemento na execución do contrato: principio de risco e ventura; o prazo (especial referencia ó novo réxime de penalidades), abonos ó contratista; réxime de responsabilidades fronte a terceiros; modificación e suspensión do contrato.
-Extinción do contrato. Cumprimento, declaración de invalidez; causas de resolución do contrato. Novidades en materia de cesión e subcontratación.
-Novidades en relación cos contratos en particular: obras, xestión de servicios públicos, subministración e prestación de servicios á Administración.
3. Destinatarios:
Persoal ó servicio da Xunta de Galicia e da Administración local galega e interesados en xeral.
4. Desenvolvemento:
-Horario: mañá e tarde.
-Lugar e datas: as xornadas convocadas desenvolveranse no salón de actos da Escola Galega de Administración Pública (Rúa de Madrid 2-4, polígono das Fontiñas, Santiago de Compostela) os días 10 e 11 de febreiro de 2000.
5. Inscrición:
-Prazo: remata o martes, día 8 de febreiro de 2000.
-Tramitación de solicitudes: as solicitudes irán dirixidas ó director da Escola Galega de Administración Pública, polígono das Fontiñas, Rúa de Madrid, 2-4, 15707, Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP, ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 37.
-Número de prazas: limitado á capacidade do local.
-Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.
Os peticionarios poderán obter confirmación da súa posible admisión, chamando, o día 9 de febreiro, por teléfono, de 10 a 14.45 horas, ós seguintes números: 981 54 62 39/44 ou 981 54 60 40.
6. Modificacións:
A EGAP reserva para si a facultade de interpretar e de resolve-las incidencias que puidesen xurdir no desenvolvemento das xornadas, así como a de
cancelalas, se o escaso número de solicitudes non xustificase a súa realización.
7. Certificación de asistencia:
Entregaráselles, ó remate destas xornadas, a aquelas persoas inscritas que concorresen asiduamente a elas, cando a súa asistencia sexa igual ou superior ó 85% das horas lectivas programadas, e expresa
rase, neste documento, a natureza da actividade e as datas da súa realización.
Santiago de Compostela, 26 de xaneiro de 2000.
Domingo Bello Janeiro
Director da Escola Galega de Administración
Pública