Visto o expediente iniciado por instancia de David Rivas Díaz, en representación de Hotel Palacio de Cristal, S.L., con CIF B-27.111.905, no que solicita permiso de actividade para a posta en funcionamento e explotación dun centro regulador de crustáceos como anexo ó establecemento Hotel-Restaurante Palacio de Cristal en Burela (Lugo).
Consideracións legais e técnicas:
-Lei 6/1993, do 11 de maio, de pesca de Galicia.
-Decreto 193/1997, do 5 de xuño, polo que se determinan as condicións para o outorgamento do permiso de actividade para os establecementos de cultivos mariños e auxiliares situados na zona terrestre.
-Decreto 286/1996, do 4 de xullo, polo que se crea a figura do centro regulador de crustáceos como novo tipo de establecemento auxiliar de acuicultura.
-Orde do 16 de outubro de 1996 sobre centros reguladores de crustáceos (DOG nº 216, do 5 de novembro).
-Tendo en conta que o expediente se tramitou conforme a dereito e conta con informe favorable do Servicio Técnico-Xurídico.
-Vista a proposta favorable da Delegación Territorial de Lugo do 31-3-1999.
Por todo o anteriormente exposto, esta consellería
RESOLVE:
Outorgarlle a Hotel Palacio de Cristal, S.L. (CIF B-27.111.905) permiso de actividade para a posta en funcionamento e explotación do seguinte establecemento:
-Establecemento auxiliar de acuicultura: centro regulador de crustáceos.
-Situación: Hotel-Restaurante Palacio de Cristal, Avda. Arcadio Pardiñas, 154, Burela (Lugo).
-Superficies:
Dominio público: non ocupa.
Dominio privado: 8,25 m.
Superficie de estabulación: 2,91 m.
Volume máximo de estabulación: 2.910 litros.
Número de piscinas: 3.
Primeira piscina: 1,20 mx0,80 mx1 m.
Segunda piscina: 1,30 mx0,85 mx1 m.
Terceira piscina: 1,30 mx0,65 mx1 m.
O permiso de actividade outórgase baixo as seguintes condicións:
Primeira.-Terá unha vixencia de dez anos que se contarán a partir do día seguinte ó da publicación desta orde no Diario Oficial de Galicia; poderá ser prorrogado discrecionalmente por petición do interesado por prazos iguais doutros dez anos. Esta petición presentarase nos sesenta (60) días anteriores ó remate da vixencia.
Segunda.-O lugar e as obras da instalación do establecemento axustaranse ós planos e proxectos presentados. O titular do permiso de actividade deberá dar comezo ás obras nun prazo de seis (6) meses, que se contarán a partir do día seguinte ó da publicación no DOG desta orde e quedarán rematadas no prazo dun (1) ano. Rematadas as obras, o titular comunicaralle tal feito á Delegación Territorial da Consellería de Pesca, Marisqueo e Acuicultura en Lugo para os efectos de practica-la inspección destas, das que se emitirá o correspondente informe.
Terceira.-O establecemento cumprirá o disposto na Lei 6/1993, do 11 de maio, no Decreto 286/1996, do 4 de xullo, e na Orde do 16 de outubro de 1996 sobre centros reguladores de crustáceos, así como a demais normativa vixente aplicable a este tipo de establecementos.
Cuarta.-O titular contrae a obriga de manter en bo estado as instalacións; estas non poderán alugarse nin ser destinadas a usos distintos dos propios deste tipo de establecementos. Baixo ningún concepto se poderán modifica-las instalacións sen permiso expreso desta consellería.
Quinta.-O permiso de actividade ó que se refire esta orde extinguirase nos casos previstos no artigo 72 da Lei 6/1993, do 11 de maio, e no artigo 6 do Decreto 193/1997, do 5 de xuño.
Sexta.-O outorgamento do permiso de actividade non exime o seu titular da obtención das licencias, permisos e autorizacións que de acordo coa lexislación vixente sexan procedentes.
Sétima.-O interesado xustificará o aboamento á Facenda pública do imposto que grava as concesións e autorizacións administrativas (transmisións patrimoniais e actos xurídicos documentados) ou acreditará a declaración de non estar suxeito a tal imposto, feita pola delegación de Facenda ou pola oficina liquidadora correspondente.
Contra esta resolución, que esgota a vía administrativa, poderase interpoñer recurso potestativo de reposición no prazo dun mes ante o conselleiro de Pesca, Marisqueo e Acuicultura, ou recurso contencioso-administrativo que se interporá no prazo de dous meses; ámbolos prazos contaranse a partir do día seguinte ó da súa publicación, de conformidade co disposto no artigo 116 da Lei 30/1992, do 26 de novembro, modificada por Lei 4/1999, de réxime xurídico das administracións públicas, e o
artigo 46.1º da Lei 29/1998, do 13 de xullo, da xurisdicción contencioso-administrativa.
Santiago de Compostela, 7 de decembro de 1999.
P.D. (Orde 17-12-1997,
DOG nº 246, do 22 de decembro)
Juan José Álvarez Pérez
Secretario xeral da Consellería de Pesca,
Marisqueo e Acuicultura