Polo Real decreto 1838/1999, do 3 de decembro, amplíanse os medios adscritos ós servicios traspasados á Comunidade Autónoma de Galicia polo Real decreto 1763/1982, do 24 de xullo, en materia de educación.
Procede, en virtude do citado traspaso, asumir de forma expresa a devandita ampliación de medios, nos termos e as condicións especificadas no acordo da Comisión Mixta de Transferencias e asignárllela ós órganos correspondentes da Administración autonómica galega.
Na súa virtude, por proposta do conselleiro da Presidencia e Administración Pública e logo de deliberación do Consello da Xunta de Galicia na súa reunión do día sete de xaneiro de dous mil,
DISPOÑO:
Artigo 1º
Queda asumida a ampliación de medios efectuada en virtude do Real decreto 1838/1999, do 3 de decembro, dos adscritos ós servicios traspasados á Comunidade Autónoma de Galicia polo Real decreto 1763/1982, do 24 de xullo, en materia de educación, nos termos e as condicións especificados no acordo da Comisión Mixta de Transferencias publicado como anexo ó dito real decreto.
Artigo 2º
1. Asígnaselle á Consellería de Educación e Ordenación universitaria a ampliación de medios asumida de conformidade co disposto no artigo anterior.
2. Os órganos da Consellería de Educación e Ordenación Universitaria exercerán as atribucións que lles correspondan conforme as normas que regulan a súa estructura.
Disposicións derradeiras
Primeira.-Facúltase o conselleiro de Educación e Ordenación Universitaria para dictar cantas disposicións sexan necesarias para o desenvolvemento e a execución deste decreto e para adopta-las medidas precisas para a plena efectividade e executividade práctica da ampliación de medios traspasados.
Segunda.-Este decreto entrará en vigor o mesmo día da súa publicación no Diario Oficial de Galicia.
Santiago de Compostela, sete de xaneiro de dous mil.
Manuel Fraga Iribarne
Presidente
Jaime Pita Varela
Conselleiro da Presidencia e Administración Pública
