A Lei orgánica 6/1999, do 6 de abril, transferiu, de acordo co previsto no artigo 150.2º da Constitución, diversas competencias de titularidade estatal á Comunidade Autónoma galega, coa finalidade de que esta complete as competencias que pode exercer, equiparándoa a outras comunidades autónomas.
En aplicación do previsto no artigo 8 da citada lei orgánica, por medio do Real decreto 1748/1999, do 19 de novembro, traspasáronselle á Comunidade Autónoma de Galicia as funcións e servicios da Administración xeral do Estado en materia de mediadores de seguros.
Resulta, pois, conveniente asumir de forma expresa tales funcións e servicios, que se relacionan no antedito real decreto, nos termos e condicións acordados pola Comisión Mixta de Transferencias prevista na disposición transitoria cuarta do Estatuto de autonomía para Galicia, e asignárllelos ós órganos correspondentes da Comunidade Autónoma de Galicia.
En virtude do exposto, e en exercicio da potestade de autoorganización prevista no artigo 39 do Estatuto de autonomía, por proposta do conselleiro da Presidencia e Administración Pública logo de deliberación do Consello da Xunta de Galicia na súa reunión do día dezaseis de decembro de mil novecentos noventa e nove,
DISPOÑO:
Artigo 1º
Asúmense as funcións e servicios traspasados á Comunidade Autónoma de Galicia en virtude do Real decreto 1748/1999, do 19 de novembro, en materia de mediadores de seguros, así como os medios orzamentarios a eles adscritos, nos termos e condicións sinalados no acordo adoptado pola Comisión Mixta de Transferencias na súa reunión do 8 de outubro de 1999, publicado como anexo do citado real decreto.
Artigo 2º
As funcións e servicios asumidos de conformidade co disposto no artigo anterior, así como os créditos orzamentarios a eles adscritos, asígnanselle á Consellería de Economía e Facenda.
Disposicións derradeiras
Primeira.-O conselleiro de Economía e Facenda dictará as disposicións que sexan necesarias para o desenvolvemento e execución deste decreto.
Segunda.-Este decreto entrará en vigor o día seguinte ó da súa publicación no Diario Oficial de Galicia.
Santiago de Compostela, dezaseis de decembro de mil novecentos noventa e nove.
Manuel Fraga Iribarne
Presidente
Jaime Pita Varela
Conselleiro da Presidencia e Administración Pública
