Pola orde conxunta da Consellería da Presidencia e Administración Pública e da Consellería de Agricultura, Gandería e Política Agroalimentaria do 22 de abril de 1999 (Diario Oficial de Galicia, do 13 de maio) convocáronse, entre outras accións, bolsas de predoutoramento en temas agrarios.
Na citada orde fixouse o importe destas bolsas en 110.000 ptas. brutas mensuais e considerouse a posibilidade de incrementa-la dotación das bolsas a partir do 1 de xaneiro do ano 2000 co fin de consegui-la total homologación coas bolsas de formación de persoal investigador convocadas polo Ministerio de Educación e Cultura.
Considerando que a Secretaría de Estado de Educación, Universidades, Investigación e Desenvolvemento, por Resolución do 2 de setembro de 1999 (BOE do 15 de setembro), estableceu a contía das bolsas de FPI para o ano 2000 (primeira e segunda anualidade) en 115.000 ptas./mes.
DISPÓN:
Artigo 1º
Acórdase fixa-la contía mensual das bolsas de predoutoramento concedidas por resolución da Secretaría Xeral de Investigación e Desenvolvemento e da Dirección Xeral de Desenvolvemento Rural do 23 de agosto de 1999 (Diario Oficial de Galicia, do 27 de setembro) en 115.000 ptas. brutas mensuais desde o 1 de xaneiro do ano 2000 ata a súa data de finalización.
Este incremento financiarase con cargo á aplicación orzamentaria 04.07.432A.480.0 do orzamento de gastos da Secretaría Xeral de Investigación e Desenvolvemento para o ano 1999.
Artigo 2º
Esta disposición pon fin á vía administrativa segundo o disposto no artigo 109 c) da Lei 30/1992, modificada pola Lei 4/1999, de réxime xurídico das administracións públicas e do procedemento administrativo común.
Santiago de Compostela, 29 de novembro de 1999.
Jaime Pita Varela
Conselleiro da Presidencia e Administración
Pública
Cástor Gago Álvarez
Conselleiro de Agricultura, Gandería e Política
Agroalimentaria