Por Orde do 31 de xullo de 1998 (DOG do 19 de agosto), e a corrección de erros publicada no

DOG do 27 de outubro, aprobáronse os concertos educativos cos centros docentes privados de educación primaria, educación secundaria obrigatoria, educación especial e formación profesional de primeiro e segundo grao. A mencionada orde foi modificada polas ordes do 2 de febreiro de 1999 (DOG do 25) e do 24 de marzo de 1999 (DOG do 12 de abril).

Tendo en conta o artigo 46.1º do Real decreto 2377/1985, do 18 de decembro (BOE do 27), polo que se aproba o Regulamento de normas básicas sobre concertos educativos e que nos centros privados concertados, que impartiron ciclos formativos de grao medio de duración de 1.300 ou 1.400 horas no curso escolar 1998-1999, o seu alumnado deberá realiza-la correspondente formación en centros de traballo no período de setembro a novembro de 1999, segundo se especifica no anexo IV da Lei 49/1998, do 30 de decembro (BOE do 31), de orzamentos xerais do Estado para 1999.

Esta consellería, por proposta da Dirección Xeral de Centros e Inspección Educativa,

DISPÓN:

Primeiro.-Aproba-la modificación do concerto dos centros privados, que no curso escolar 1998-1999 impartiron ciclos formativos de grao medio de duración de 1.300 ou 1.400 horas, para a realización da formación en centros de traballo nos meses de setembro a novembro de 1999, segundo os datos que figuran no anexo e na contía que se determina no anexo IV da mencionada Lei 49/1998.

Segundo.-A adenda ou documento administrativo de formalización do concerto educativo será asinado polo titular da Consellería de Educación e Ordenación Universitaria e polo titular do centro privado ou persoa con representación debidamente acreditada. Se o titular do centro privado non subscribise a adenda ou documento de formalización na data que se lle notifique, entenderase decaído no seu dereito.

Terceiro.-Contra esta disposición, que esgota a vía administrativa, os interesados poderán interpoñer recurso potestativo de reposición perante o conselleiro de Educación e Ordenación Universitaria, no prazo dun mes, a partir do día seguinte ó da súa publicación no Diario Oficial de Galicia, segundo o disposto nos artigos 116 e 117 da Lei 4/1999 (BOE do 14 de xaneiro), de modificación da Lei 30/1992, do réxime xurídico das administracións públicas e do procedemento administrativo común, ou ben directamente o recurso contencioso-administrativo, no prazo de dous meses, perante o Tribunal Superior de Xustiza de Galicia.

Santiago de Compostela, 15 de novembro de 1999.

Celso Currás Fernández

Conselleiro de Educación e Ordenación

Universitaria

ANEXO

CICLOS FORMATIVOS DE GRAO MEDIO

(FORMACIÓN EN CENTROS DE TRABALLO)