Dentro do Plan de actividades da Escola Galega de Administración Pública para 1999 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse, en colaboración coa Escola de Práctica Xurídica de Santiago de Compostela, unhas Xornadas internacionais sobre xustiza e reformas procesuais, convocatoria que se desenvolverá conforme as seguintes bases:
Primeira.-Obxectivos.
Con estas xornadas preténdese acadar unha dobre finalidade. Dunha banda, ofrecer un panorama detallado e promover un profundo debate sobre a situación actual da Administración de xustiza en España, nos países do noso contorno e en Latinoamérica, a través da óptica dos diferentes responsables políticos e dos operadores xurídicos. Doutra parte, mellora-los coñecementos dos asistentes sobre as reformas producidas nos últimos tempos, que se están levando a cabo no ordenamento procesual español. Neste sentido dedicarase unha especial atención á reforma do proceso civil, tarefa que ocupa actualmente as nosas cámaras e que desembocará na promulgación da nova Lei de axuizamento civil con pretensión de converterse en lei procesual común.
Segunda.-Contido.
Trataranse estes temas:
-A situación actual da xustiza en España.
-A xustiza en Europa e América.
-A nova Lei da xurisdicción contencioso-administrativa.
-A reforma do proceso laboral.
-A reforma do proceso penal.
-O proxecto da LAC.
Terceira.-Destinatarios.
Persoal ó servicio da Xunta de Galicia e da Administración local galega, xuíces, avogados, profesionais do dereito, alumnos de escolas de práctica xurídica, alumnos da universidade e interesados en xeral.
Cuarta.-Desenvolvemento.
-Horario: as sesións serán de mañá e tarde.
-Lugar e datas: as xornadas convocadas terán lugar no salón de actos da Escola Galega de Administración Pública (rúa de Madrid 2-4, polígono das Fontiñas, Santiago de Compostela) os días 22, 23 e 24 de novembro de 1999.
Quinta.-Inscrición.
-Prazo: remata o xoves, día 18 de novembro de 1999.
-Tramitación de solicitudes: as solicitudes irán dirixidas ó director da Escola Galega de Administración Pública, polígono das Fontiñas, rúa de Madrid, 2-4, 15707, Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemen
to administrativo común. Admitiranse tamén inscricións por telefax: 981 54 63 37.
-Número de prazas: limitado á capacidade do local.
-Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.
Os peticionarios poderán obter confirmación da súa posible admisión chamando, o día 19 de novembro, por teléfono, das 10 ás 14.45 horas, ós seguintes números da EGAP: 981 54 62 39 ou 981 54 60 40.
Sexta.-Modificacións.
A EGAP reserva para si a facultade de interpretar e resolve-las incidencias que puidesen xurdir no desenvolvemento das xornadas, así como a de cancelalas, se o escaso número de solicitudes non xustificase a súa realización.
Sétima.-Certificación de asistencia.
Entregaráselles, ó remate destas xornadas, a aquelas persoas inscritas que concorresen asiduamente a elas, cando a súa asistencia sexa igual ou superior ó 85% das horas lectivas programadas, e expresarase, neste documento, a natureza da actividade e as datas da súa realización.
Santiago de Compostela, 26 de outubro de 1999.
Domingo Bello Janeiro
Director da Escola Galega de Administración Pública