Dentro do plan de actividades da Escola Galega de Administración Pública para 1999 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse unhas Xornadas de estudio sobre o sistema de arbitraxe no dereito administrativo, convocatoria que se desenvolverá conforme as seguintes bases:
Obxectivos.
As xornadas pretenden achegarlles ós asistentes unha primeira aproximación ó réxime xurídico dun tipo de actividade administrativa sumamente novo e, ó tempo, de crecente relevancia, tanto práctica como teórica, a saber: a arbitraxe administrativa. Neste sentido, esta figura é obxecto de atención tanto desde a perspectiva da teoría xeral do dereito administrativo (é dicir, desde a óptica da teoría das formas de actuación da Administración), como desde o ángulo da parte especial daquel. Os relatorios programados abarcan, así pois, unha perspectiva tanto xeral como sectorial.
Contido.
Trataranse estes temas:
-A actividade arbitral da Administración. Tendencias e perspectivas.
-Procedementos de conciliación, mediación e arbitraxe como alternativa á vía administrativa de recurso.
-A arbitraxe administrativa no dereito da competencia.
-A arbitraxe administrativa no dereito das telecomunicacións.
-A arbitraxe administrativa en materia de consumo.
-Os límites da función arbitral da Administración.
-A arbitraxe entre a Administración e os particulares, como procedemento substitutorio do contencioso-administrativo.
Destinatarios.
Persoal ó servicio da Xunta de Galicia e da Administración local galega e interesados en xeral.
Desenvolvemento.
-Horario: mañá e tarde.
-Lugar e datas: as xornadas convocadas desenvolveranse no salón de actos da Escola Galega de
Administración Pública (rúa de Madrid 2-4, polígono das Fontiñas, en Santiago de Compostela) os días 13 e 14 de outubro de 1999.
Inscrición.
-Prazo: remata o venres, día 8 de outubro de 1999.
-Tramitación de solicitudes: as solicitudes irán dirixidas ó director da Escola Galega de Administración Pública, polígono das Fontiñas, rúa de Madrid, 2-4-15707 Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP, ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 37.
-Número de prazas: limitado á capacidade do local.
-Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.
Os peticionarios poderán obter confirmación da súa posible admisión chamando, o día 11 de outubro, por teléfono, dás 10 ás 14.45 horas, ós seguintes números: 981 54 62 39 ou 981 54 60 40.
Modificacións.
A EGAP reserva para si a facultade de interpretar e de resolve-las incidencias que puidesen xurdir no desenvolvemento das xornadas, así como a de cancelalas, se o escaso número de solicitudes non xustificase a súa realización.
Certificación de asistencia.
Entregaráselles, ó remate destas xornadas, a aquelas persoas inscritas que concorresen asiduamente a elas, cando a súa asistencia sexa igual ou superior ó 85% das horas lectivas programadas e expresarase, neste documento, a natureza da actividade e as datas da súa realización.
Santiago de Compostela, 20 de setembro de 1999.
Domingo Bello Janeiro
Director da Escola Galega de Administración
Pública