O Concello de Nogueira de Ramuín (Ourense), en sesión do día 18 de maio de 1999, aprobou o proxecto de CV 323 Ponte dos Gozos-Parada do Sil, obra nº 472/POL/1999 e na mesma sesión acordou solicitar da Xunta de Galicia a declaración de urxente ocupación dos bens e dereitos afectados pola expropiación forzosa ó abeiro do disposto no artigo 52 da Lei de expropiación forzosa.
Os bens nos que se concreta a declaración de urxente ocupación están determinados no expediente que se someteu a información pública.
A Dirección Xeral de Urbanismo da Consellería de Política Territorial, Obras Públicas e Vivenda emitiu informe favorable. O dito informe tivo entrada no rexistro xeral da Consellería de Xustiza, Interior e Relacións Laborais o día 16 de xullo de 1999.
Considérase necesaria a declaración de urxente ocupación dos bens e dereitos precisos para a realización das obras do proxecto técnico sinalado, porque este tramo (entre os pp.kk. 18+200 e 19+000) presenta perigosas curvas e está entre outros dous xa alargados con cargo a planos anteriores, que reúnen características xeométricas moito mellores cás do proxecto que nos ocupa. Este feito é causa de perigo e de accidentes para os vehículos e autobuses que percorren unha ruta tan emblemática e importante para a provincia como é a da Ribeira Sacra.
A competencia para a declaración da urxente ocupación correspóndelle ó Consello da Xunta de Galicia segundo o disposto nos artigos 27.2º e 28.2º do Estatuto de autonomía de Galicia.
Na súa virtude, por proposta do conselleiro de Xustiza, Interior e Relacións Laborais e logo de deliberación do Consello da Xunta de Galicia na súa reunión do día nove de setembro de mil novecentos noventa e nove,
DISPOÑO:
Artigo único.
De conformidade co disposto no artigo 52 da Lei de expropiación forzosa, declárase a urxente ocupación, polo Concello de Nogueira de Ramuín (Ourense) para efectos de expropiación forzosa, dos bens e dereitos concretados no expediente administrativo instruído para o efecto e necesarios para a execución
das obras do proxecto de CV 323 Ponte dos Gozos-Parada do Sil, obra nº 472/P.O.L./1999.
Santiago de Compostela, nove de setembro de mil novecentos noventa e nove.
Manuel Fraga Iribarne
Presidente
Jesús C. Palmou Lorenzo
Conselleiro de Xustiza, Interior e Relacións Laborais