A Orde do 18 de xaneiro de 1999 (DOG do 25 de xaneiro), pola que se aproban as bases que rexerán as convocatorias de axudas e bolsas correspondentes á promoción xeral da investigación e se procede á súa convocatoria, prevé, no seu anexo V, a concesión de bolsas para a realización da tese de doutoramento (nova adxudicación, primeira e segunda prórroga).

En relación coas bolsas predoutorais de nova adxudicación, de acordo co establecido no punto 5 do anexo V da citada orde, desde o 25 de maio ó 4 de xuño de 1999, expuxéronse as listas de solicitudes admitidas e excluídas tendo en conta a documentación presentada, podendo durante ese mesmo período os interesados, formular reclamacións para emendar erros e falta de documentos.

Rematado ese prazo e estudiadas as reclamacións presentadas, as solicitudes admitidas foron avaliadas, xunto coas solicitudes de primeira e segunda prórroga de bolsas predoutorais, pola Comisión de Selección de Investigación, creada por Decreto 37/1998, do 30 de xaneiro (DOG do 6 de febreiro), orde da Consellería da Presidencia e Administración Pública do 21 de abril de 1998 (DOG do 12 de maio), e orde da Consellería da Presidencia e Administración Pública do 26 de abril de 1999 (DOG do 4 de maio).

En consecuencia, atendendo á proposta elaborada pola dita comisión, esta secretaría xeral

RESOLVE:

Primeiro.-Concedérlle-la primeira prórroga da bolsa para a realización da tese de doutoramento, durante o período outubro 1999-setembro 2000 (ambos inclusive) ás persoas que se relacionan no anexo I da presente resolución.

Segundo.-Concedérlle-la segunda prórroga da bolsa para a realización da tese de doutoramento, durante o período outubro 1999-marzo 2000 (ámbolos dous inclusive), ás persoas que se relacionan no anexo II da presente resolución.

Terceiro.-Concederlles novas bolsas para a realización da tese de doutoramento, durante o período outubro 1999-setembro 2000 (ámbolos dous inclusive), ás persoas que se relacionan no anexo III da presente resolución.

Cuarto.-A contía das bolsas será de 110.000 ptas./mes brutas. Sen embargo, esta cantidade poderá ser modificada por resolución da

Secretaría Xeral de Investigación e Desenvolvemento, dentro dos límites fixados na propia convocatoria, co fin de consegui-la total homologación destas bolsas coas de formación de persoal investigador que convoque o Ministerio de Educación e Cultura para o ano 2000.

Estas bolsas aboaranse con cargo á aplicación orzamentaria 04.07.432A.480.0 cofinanciada con recursos procedentes do programa operativo do Fondo Social Europeo.

Quinto.-No caso de producirse algunha renuncia ás bolsas ás que se refiren os puntos primeiro, segundo e terceiro da presente resolución, a Secretaría Xeral de Investigación e Desenvolvemento procederá, se é o caso, e tendo en conta o remanente de crédito, a adxudicárlle-la dita axuda a outros candidatos de acordo coa lista de suplentes elaborada pola Comisión de Selección de Investigación e que se inclúe no anexo IV da presente resolución. A asignación farase pola mesma orde na que se relacionan.

Así mesmo, no caso de existir remanente orzamentario (sempre dentro dos límites fixados na orde da convocatoria) a Secretaría Xeral de Investigación e Desenvolvemento, poderá adxudicárlle-la dita axuda a outros candidatos, de acordo coa mencionada lista de suplentes.

Sexto.-A inobservancia por parte dos beneficiarios de calquera das bases establecidas na orde de convocatoria do 18 de xaneiro de 1999, suporá a perda do dereito a percibi-la axuda correspondente.

Sétimo.-As solicitudes que non figuran relacionadas nos anexos II, III ou IV da presente resolución e que foron admitidas para participar nesta convocatoria, enténdese que quedan denegadas.

Oitavo.-Contra a presente resolución poderán os interesados interpoñer recurso de alzada ante o conselleiro da Presidencia e Administración Pública no prazo dun mes contado a partir da entrada en vigor da presente resolución, de acordo co disposto nos artigos 114 e seguintes da Lei 30/1992, de réxime xurídico das administracións públicas e do procedemento administrativo común, na súa vixente redacción dada pola Lei 4/1999, do 13 de xaneiro.

Disposición derradeira

A presente resolución entrará en vigor o día seguinte ó da súa publicación no Diario Oficial de Galicia.

Santiago de Compostela, 30 de xullo de 1999.

Miguel Angel Ríos Fernández

Secretario xeral de Investigación e Desenvolvemento

ANEXO I

Relación das primeiras prórrogas concedidas

ANEXO II

Relación das segundas prórrogas concedidas

ANEXO III

Relación das novas bolsas concedidas

ANEXO IV

Relación de suplentes