O Decreto 107/1999, do 8 de abril (DOG nº 84, do 4 de maio) estableceu a composición e funcións da Comisión Superior para o Estudio do Desenvolvemento do Dereito Civil Galego, que é un órgano consultivo da Xunta de Galicia encadrado na Consellería de Xustiza, Interior e Relacións Laborais.
Co obxecto de que poidan participar tódalas institucións que acheguen os seus coñecementos contrastados para a recuperación do específico dereito civil galego procede incorporar un novo membro ó Pleno da Comisión en representación da Academia Galega de Xurisprudencia e Lexislación.
Na súa virtude, por proposta do conselleiro de Xustiza, Interior e Relacións Laborais e logo de deliberación do Consello da Xunta de Galicia na súa reunión do día dezasete de xuño de mil novecentos noventa e nove,
DISPOÑO:
Artigo único.-Modifícase o artigo 4º.2 c) do Decreto 107/1999, do 8 de abril, que queda redactado como segue:
«Un representante de cada unha das seguintes institucións, elixidos de entre os seus membros:
-Consello da Cultura Galega.
-Consello da Avogacía de Galicia.
-Colexio Oficial de Rexistradores da Propiedade e Mercantís.
-Colexio Notarial de Galicia.
-Academia Galega de Xurisprudencia e Lexislación».
Disposición derradeira
Este decreto entrará en vigor o día seguinte ó da súa publicación no Diario Oficial de Galicia.
Santiago de Compostela, dezasete de xuño de mil novecentos noventa e nove.
Manuel Fraga Iribarne
Presidente
Jesús Carlos Palmou Lorenzo
Conselleiro de Xustiza, Interior e Relacións Laborais