En cumprimento do establecido na Lei de Galicia 10/1996, do 5 de novembro, de actuación de entes e empresas nas que ten participación maioritaria a Xunta de Galicia, en materia de persoal e contratación, e, de conformidade co acordo adoptado polo Padroado da Fundación para o Desenvolvemento da Comarca de Deza, convócanse probas de selección para cubrir, baixo a modalidade de contratación indefinida, unha praza de xerente para facerse cargo da xestión da dita fundación.
As condicións específicas do contrato de traballo, así como as funcións que vai realiza-lo xerente da fundación, estarán á disposición dos interesados na sede da Sociedade para o Desenvolvemento Comarcal de Galicia, sita na estrada Santiago-Noia km 3, A Barcia (Santiago de Compostela). Tel.: 981 54 26 08.
I. Requisitos xerais:
-Ter nacionalidade dun país membro da Unión Europea.
-Ser maior de 18 anos.
-Acreditar grao de licenciado ou equivalente.
-Acreditar, como mínimo, un ano de experiencia profesional en tarefas relacionadas co desenvolvemento local.
II. Coñecementos que se requiren:
a) Coñecementos específicos:
As regulacións e normativas legais que afectan o modelo de desenvolvemento comarcal.
Metodoloxías e planificación estratéxica do desenvolvemento comarcal.
Xestión e coñecemento de programas de desenvolvemento local e creación de emprego.
Xestión e administración de fundacións de interese galego e de institucións sen finalidade de lucro.
Estructura social e económica da comarca de Deza.
b) Coñecementos complementarios:
Acredita-lo coñecemento da lingua galega.
Posuír e acredita-lo coñecemento de informática con nivel de usuario.
III. Documentación que hai que presentar:
Fotocopia do DNI.
Currículum vitae xunto coa documentación orixinal ou fotocopia compulsada que acredite os coñecementos, a titulación requirida, os méritos e a experiencia profesional.
Solicitude dirixida ó presidente da fundación, segundo o anexo I.
IV. Lugar e prazo de presentación:
As solicitudes presentaranse nas dependencias da Sociedade Anónima para o Desenvolvemento Comarcal de Galicia, situada na estrada Santiago-Noia, km 3, A Barcia, 15896 Santiago de Compostela.
O prazo de presentación será de 20 días naturais contados a partir do día seguinte ó da publicación destas bases no Diario Oficial de Galicia.
V. Comisión de selección.
A comisión de selección estará formada polos seguintes membros:
Presidente: Andrés Precedo Ledo, presidente do padroado da fundación.
Secretario: José Crespo Iglesias, vicepresidente do padroado da fundación.
Vocais:
José Mª Soriano Villalba, xefe de Asuntos Económicos da SDC.
José Figueroa Dávila, xefe de Acción Comarcal da SDC.
Rosario Álvarez Cao, xefa de Planificación e Estudios da SDC.
VI. Proceso de selección:
1. Expirado o prazo de presentación de solicitudes, a comisión de selección publicará as listas previas de admitidos e excluídos, co motivo da exclusión, se é o caso. Establécese un prazo de cinco días hábiles para que, por petición do interesado, se poida reparar calquera erro que sexa emendable. Esgotado este prazo, publicaranse as listas definitivas de admitidos e excluídos e fixaranse o lugar e a data de celebración da proba de coñecementos. Os candidatos deberán asistir provistos do DNI. Estas listas publicaranse no taboleiro de anuncios da Sociedade para o Desenvolvemento Comarcal de Galicia.
2. As probas de selección consistirán en:
a) Proba escrita tipo test de coñecementos específicos sobre os contidos que se recollen no pun
to II a). A puntuación máxima que se poderá acadar nesta proba é de 10 puntos. Os candidatos que non acaden a puntuación de 5 puntos nesta proba quedarán automaticamente eliminados. Os cinco candidatos que obteñan maior puntuación e que ademais superen a proba escrita serán convocados á proba oral.
b) Proba oral sobre experiencia profesional en desenvolvemento territorial/local e sobre coñecementos con base na temática que se recolle nos puntos II.a e II.b destas bases. Os candidatos convocados deberán de responder, durante un máximo de 30 minutos, as preguntas que, sobre os citados contidos, lle sexan formuladas polos membros da comisión de selección. A puntuación máxima que se poderá acadar nesta proba é de 5 puntos.
Unha vez valoradas as probas anteriores, a comisión de selección publicará no taboleiro de anuncios da Sociedade para o Desenvolvemento Comarcal de Galicia os resultados definitivos, con indicación expresa do candidato seleccionado.
Santiago de Compostela, 16 de xuño de 1999.
Andrés Precedo Ledo
Presidente do Padroado da Fundación para o
Desenvolvemento da Comarca de Deza
ANEXO I
D./Dna..., con DNI..., en virtude da convocatoria da praza de xerente da Fundación para o Desenvolvemento da Comarca de Deza.
SOLICITA
Participar no proceso selectivo para cubrir unha praza de xerente convocada pola Fundación para o Desenvolvemento da Comarca de Deza mediante anuncio público desta fundación no DOG nº... con data.... Para tal fin xúntase documentación conforme o recollido nas bases da citada convocatoria.
En Santiago de Compostela, ... de... de 1999.
Asdo.: ...
Presidente do Padroado da Fundación para o Desenvolvemento da Comarca de Deza.
