Este rectorado, en uso das atribucións conferidas polo artigo 18 da Lei de reforma universitaria en relación co artigo 3.2 e) da mesma norma, así como nos estatutos desta universidade, resolve convocar probas selectivas para cubrir 1 praza de técnico especialista de microelectrónica do grupo III, vacante no seu cadro de persoal laboral, con suxeición ás seguintes

Bases da convocatoria

1. Normas xerais.

1.1. Convócanse probas selectivas para cubrir con persoal laboral fixo 1 praza de técnico especialista de microelectrónica do grupo III, do convenio colectivo do persoal laboral das universidades públicas de Galicia (DOG do 18 de outubro de 1996), polo sistema de promoción interna e polo sistema de acceso libre.

1.2. Os procesos de selección de promoción interna e libre realizaranse separadamente, e será en primeiro lugar o de promoción interna. De non cubrirse a vacante por promoción interna, ofertarase para ser cuberta por acceso libre.

1.3.Os/as aspirantes só poderán participar nun dos dous sistemas de acceso.

1.4. O procedemento de selección dos aspirantes será o de concurso-oposición, do que as probas e valoracións se axustarán ó que se especifica no anexo I desta convocatoria.

1.5. A adxudicación da praza ó aspirante que supere o proceso selectivo efectuarase de acordo coa puntuación total obtida sumando ámbalas dúas fases.

1.6. O programa que rexerá na fase de oposición especifícase no anexo II.

2. Requisitos dos aspirantes.

2.1. Para seren admitidos á realización das probas selectivas, os aspirantes deberán reuni-los seguintes requisitos na data de remate do prazo de presentación de solicitudes e mantelos ata o momento de formalización do contrato:

a) Ser español ou nacional de calquera estado membro da Unión Europea.

b) Ter cumpridos dezaoito anos de idade.

c) Estar en posesión do título de bacharelato superior, FP2 ou equivalente.

d) Non padecer enfermidade nin estar afectado por limitación física ou psíquica que sexa incompatible co desempeño das correspondentes funcións.

e) Non ter sido separado de servicio de calquera das administracións públicas en virtude de expediente disciplinario, nin estar inhabilitado por sentencia firme para o exercicio da función pública.

2.2. Os aspirantes que concorran ás probas pola quenda de promoción interna deberán reunir, ademais, os seguintes requisitos:

a) Te-la condición de persoal laboral fixo de calquera das universidades públicas da Comunidade Autónoma de Galicia.

b) Pertencer a distinta categoría que a das prazas convocadas na presente convocatoria.

c) Ter permanecido un mínimo de 6 meses na súa categoría profesional.

d) Poderán quedar exentos/as do requisitos da titulación esixido para quenda libre, agás que na relación de postos de traballo a titulación sexa esixida preceptivamente.

3. Solicitudes.

3.1. Quen desexe tomar parte nestas probas selectivas deberá solicitalo ó rector da Universidade de Santiago de Compostela en instancia segundo o modelo que figura como anexo IV a esta convocatoria, no prazo de vinte días naturais contados a partir do seguinte ó da publicación desta convocatoria no Diario Oficial de Galicia.

Os/as aspirantes deberán facer constar na súa solicitude o sistema polo que se inscriben, libre ou de promoción interna, segundo corresponda.

3.2. A instancia irá acompañada de fotocopia do DNI.

3.3. Os documentos xustificativos dos méritos que hai que valorar na fase de concurso serán achegados no prazo improrrogable de 10 días contados a partir do seguinte ó da publicación das cualificacións do último exercicio da fase específica, polos aspirantes que o superaran da seguinte forma:

3.3.1. Certificación acreditativa dos servicios prestados, expedida pola unidade de persoal da Universidade Pública de Galicia onde prestaron os ditos servicios referidos á data de remate do prazo de presentación de solicitudes.

3.3.2. Fotocopia dos diplomas dos cursos de formación e cualificación profesional.

3.3.3. A experiencia profesional acreditarase mediante certificación da correspondente xerencia ou unidade de persoal da Administración onde prestasen servicios.

3.3.4. A certificación acreditativa dos extremos indicados na base 3.3.1., 3.3.2. (certificaranse os cursos que consten no expediente) e 3.3.3., expedirase de oficio para os aspirantes que presten ou prestasen os seus servicios na Universidade de Santiago de Compostela, e engadirase á solicitude do aspirante.

3.3.5. En calquera momento a universidade poderá requirir dos/as candidatos/as os orixinais ou copias debidamente compulsadas dos documentos que se correspondan coas simples presentadas.

3.4. A presentación de solicitudes e da documentación indicada nos parágrafos anteriores farase nos rexistros xerais da universidade situados no Rectorado da Universidade de Santiago (Colexio de San Xerome,

Praza do Obradoiro s/n), no edificio da Biblioteca Intercentros de Lugo (Avda. Bernardino Pardo Ouro s/n, Polígono de Fingoi, Lugo), ou nas restantes formas previstas no artigo 38 da Lei de réxime xurídico das administracións públicas e do procedemento administrativo común.

3.5. Os dereitos de exame serán de 3.000 pesetas, que se ingresarán na conta de Caixa Galicia Oposicións número: 2091-0388-90-3110000646. Para realiza-lo ingreso deberá utilizarse por triplicado o modelo de solicitude que figura como anexo IV.

En ningún caso a presentación e pagamento na entidade bancaria suporá a substitución do trámite de presentación, en tempo e forma, da solicitude.

3.5.1. Unicamente procederá a devolución dos dereitos de exame ós/ás aspirantes que sexan excluídos definitivamente destas probas selectivas e para tal efecto o reintegro realizarase de oficio, para o que terán que facer consta-los datos bancarios que para tal efecto figura na solicitude. De non figuraren estes datos, entenderase que renuncian á devolución dos dereitos de exame.

3.6. Os aspirantes con minusvalidez deberán indicalo na súa instancia e solicita-las posibles adaptacións de tempo e medios para a realización dos exercicios nos que a adaptación sexa necesaria.

4. Admisión de aspirantes.

4.1. Rematado o prazo de admisión de solicitudes o rector da Universidade de Santiago de Compostela dictará resolución, no prazo dun mes, pola que se aproba a lista provisional de admitidos e excluídos, na que consten as causas da exclusión e o prazo para reparalas. Esta resolución publicarase no taboleiro de anuncios do rectorado.

Para repara-los defectos que motivaran a exclusión ou omisión das devanditas relacións, os aspirantes disporán dun prazo de dez días contados a partir do seguinte ó da publicación da devandita resolución. Os aspirantes que, dentro do prazo sinalado, non reparasen a exclusión ou omisión serán definitivamente excluídos da realización das probas.

A resolución que aprobe a lista definitiva de admitidos e excluídos esgotará a vía administrativa.

5. Tribunal.

5.1. O tribunal cualificador destas probas é o que figura como anexo III a esta convocatoria e terá a categoría terceira das recollidas no Real decreto 236/1988, de 4 de marzo (BOE do 19 de marzo), modificada pola Resolución do 22 de marzo de 1993 da Subsecretaría de Economía e Facenda e para as Administracións Públicas, pola que se revisan os importes das indemnizacións establecidas (BOE do 26-3-93), e no Decreto 299/1990, do 24 de maio (DOG do 1 de xuño), modificado polo Decreto 21/1994, do 4 de febreiro (DOG do 14 de febreiro).

O procedemento de actuación do tribunal axustarase en todo momento ó disposto na Lei 30/1992, do 26 de novembro, de réxime xurídico das administracións públicas e do procedemento administrativo común.

5.2. Os membros do tribunal deberán absterse de intervir notificándollo ó rector da universidade, cando concorran neles as circunstancias previstas nos artigos 28 e 29 da Lei de réxime xurídico das administracións públicas e do procedemento administrativo común, ou se realizasen tarefas de preparación de aspirantes a probas selectivas nos cinco anos anteriores á publicación desta convocatoria.

O presidente poderá solicitar dos membros do tribunal declaración expresa de non se encontraren incursos nas circunstancias previstas nos devanditos artigos.

Así mesmo os/as aspirantes poderán recusa-los membros do tribunal cando concorran as circunstancias antes citadas.

5.3. A partir da súa constitución o tribunal, para actuar validamente, requirirá a presencia da maioría absoluta dos seus membros, titulares ou suplentes.

5.4. Dentro da fase de oposición o tribunal resolverá tódalas dúbidas que puidesen xurdir na aplicación destas normas así como o que se deberá facer nos casos non previstos.

5.5. O tribunal poderá dispo-la incorporación ós seus traballos de asesores especialistas para as probas correspondentes dos exercicios que estime pertinentes, limitándose os ditos asesores a prestaren a súa colaboración nas súas especialidades técnicas. A designación destes asesores deberá comunicárselle ó rector da universidade. O nomeamento dos asesores farase público, e seranlles de aplicación as causas de abstención e recusación igual que ós membros do tribunal.

5.6. O tribunal cualificador adoptará as medidas precisas naqueles casos nos que resulte necesario, de forma que os aspirantes con minusvalidez gocen de similares condicións para a realización dos exercicios que o resto dos participantes. Neste sentido, estableceranse para as persoas con minusvalidez que o soliciten na forma prevista na base 3.6 as adaptacións posibles en tempo e medios para a súa realización.

5.7. O tribunal adoptará as medidas oportunas para garantir que os exercicios escritos sexan corrixidos sen que se coñeza a identidade dos/as aspirantes. O tribunal excluirá aqueles/as opositores que consignen o seu nome nas follas de exame, trazos, marcas ou signos que permitan coñece-la súa identidade.

5.8. En ningún caso o tribunal poderá declarar que superou as probas selectivas un número superior de aspirantes que o das prazas convocadas. Calquera proposta de aprobados que contraveña o establecido será nula de pleno dereito.

5.9. Para os efectos de comunicación e demais incidencias, o tribunal terá a súa sede no rectorado da Universidade de Santiago de Compostela.

5.10. O tribunal, de conformidade co previsto no artigo 22.2º do convenio colectivo, poderá preve-la constitución de listas de espera, segundo a orde de puntuación acadada nas probas, cos aspirantes que non as superaron, coa finalidade de atender, mediante

contratacións temporais as vacantes e necesidades que poidan producirse ata a realización da próxima convocatoria.

6. Desenvolvemento dos exercicios.

6.1. A orde de actuación dos opositores iniciarase alfabeticamente polo primeiro da letra G, de conformidade co establecido na Resolución do 23 de febreiro de 1999 da Dirección Xeral da Función Pública.

6.2. En calquera momento os aspirantes poderán ser requiridos polo tribunal para que acrediten a súa identidade.

6.3. Os aspirantes serán convocados para cada exercicio nun só chamamento, e serán excluídos das probas aqueles que non comparezan, agás nos casos de forza maior, debidamente xustificados, e libremente apreciados polo tribunal.

6.4. O día, hora e lugar de realización do primeiro exercicio faranse públicos na resolución que aprobe a relación definitiva de aspirantes admitidos e excluídos.

6.5. A publicación dos sucesivos anuncios de celebración dos demais exercicios efectuarase nos locais onde se realizara o primeiro deles así como no rectorado da universidade, ou por calquera outro medio que se coide conveniente para asegura-la súa máxima divulgación, cunha antelación de polo menos vintecatro horas á sinalada para a súa iniciación.

6.6 En calquera momento do proceso selectivo, se o tribunal tivese coñecemento de que algún dos/as aspirantes carece dos requisitos esixidos pola presente convocatoria, logo da audiencia ó interesado, deberá propoñe-la súa exclusión ó rector da Universidade de Santiago de Compostela, comunicándolle tamén as inexactitudes e falsidades formuladas polo/a aspirante na súa solicitude para os efectos procedentes.

7. Lista de aprobados.

7.1. Concluído cada un dos exercicios da fase de oposición, o tribunal cualificador fará pública a relación dos aspirantes seleccionados en cada un deles, con indicación da puntuación obtida.

7.2. A lista coa valoración de méritos da fase de concurso farase pública unha vez celebrado o derradeiro exercicio da fase de oposición.

7.3. A cualificación final do concurso-oposición virá determinada pola suma aritmética das puntuacións correspondentes á fase de oposición máis a obtida na fase de concurso de méritos, na forma establecida no anexo I. En caso de empate, daráselle preferencia á maior puntuación obtida na fase de oposición. De persisti-lo empate dirimirase a prol do candidato que obtivese a maior puntuación na fase de coñecementos específicos. O tribunal fará pública, para cada sistema de acceso, a lista dos aspirantes que, segundo a orde da puntuación total acadada por cada un deles, fosen seleccionados, e que en ningún caso poderá conter un número de candidatos superior ó das prazas convocadas. A devandita relación, que será elevada polo tribunal ó rector da universidade xunto coa proposta de contratación a favor dos aspirantes que figuren nela, será publicada no taboleiro de anuncios do rectorado.

8. Presentación de documentos.

8.1. No prazo de 20 días naturais a partir do día seguinte a aquel no que se fixesen públicas as relacións definitivas de aprobados no rectorado da universidade, os/as aspirantes que figuren nelas deberán presentar no Servicio de Planificación e Programación de PAS (Casa da Balconada, Rúa Nova, 6 de Santiago de Compostela) a seguinte documentación:

a) Fotocopia do DNI ou pasaporte.

b) Fotocopia compulsada do título esixido.

c) Declaración xurada de non ter sido separado mediante expediente disciplinario de ningunha Administración pública e de non acharse inhabilitado para o exercicio das funcións públicas, nin realizar actividade ou actividades suxeitas a incompatibilidades.

Os nacionais doutros estados membros da Unión Europea deberán acreditar igualmente non estaren sometidos a sanción disciplinaria ou condena penal que impida no seu estado, o acceso á función pública.

d) Certificado médico acreditativo de non padecer enfermidade nin defecto físico que o imposibilite para o servicio.

e) Os aspirantes con minusvalidez con grao de discapacidade igual ou superior ó 33 % deberán acreditar tal condición, se obtivesen praza, mediante certificación dos órganos competentes da Consellería de Sanidade e Servicios Sociais e, se é o caso, da Administración correspondente.

8.2. Os que tivesen a condición de persoal laboral fixo de calquera universidade pública de Galicia estarán exentos de xustificar documentalmente as condicións e demais requisitos xa probados para acceder en ó seu anterior posto, debendo presentar certificación da universidade correspondente para acreditar tal condición, de non a teren presentado con anterioridade.

8.3. Ante a imposibilidade, debidamente xustificada, de presenta-los documentos expresados na base anterior, poderá acreditarse que se reúnen as condicións esixidas na convocatoria mediante calquera medio de proba admitido en dereito.

8.4. Quen dentro do prazo fixado, e salvo caso de forza maior, non presentase a documentación ou do seu exame se deducise que carece dalgún dos requisitos sinalados na base 2, non poderá ser nomeado como persoal laboral fixo e quedarán anuladas as súas actuacións, sen prexuízo da responsabilidade en que incorrese por falsidade na solicitude inicial.

9. Disposición derradeira.

Contra a presente resolución, que esgota a vía administrativa, poderá interpoñer recurso contencioso-administrativo perante a Sala do Contencioso-Administrativo do Tribunal Superior de Xustiza de Galicia no prazo de dous meses contados a partir do día seguinte ó da súa publicación, de conformidade cos artigos 46 e 10.1.a) da Lei da xurisdicción contencioso administrativa, aprobada por Lei 29/1998 de 13 de xullo.

Non obstante, os interesados poderán interpoñer recurso potestativo de reposición no prazo dun mes perante o órgano que o dictou. Neste caso non se poderá interpoñe-lo recurso contencioso-administrativo anteriormente indicado mentres non recaia resolución expresa ou presunta do recurso administrativo

de reposición, ó abeiro dos artigos 116 e ss. da Lei 30/1992, do 26 de novembro, de réxime xurídico das administracións públicas e do procedemento administrativo común, modificada pola Lei 4/1999, do 13 de xaneiro.

Santiago de Compostela, 20 de maio de 1999.

Darío Villanueva Prieto

Rector da Universidade de Santiago de Compostela

ANEXO I

Denominación da praza: técnico especialista de microelectrónica. Grupo III

Procedemento de selección.

O procedemento de selección será o de concurso-oposición.

O Concurso-oposición constará das fases que a continuación se indican:

1.1. Primeira fase, de carácter eliminatorio: (para sistemas de promoción interna e acceso libre). Constará de dous exercicios:

Primeiro exercicio: consistirá en contestar por escrito un cuestionario de preguntas tipo test, con tres respostas alternativas das que só unha será a correcta, proposto polo tribunal, baseado no contido da primeira parte do programa que se relaciona no anexo II.

O tempo máximo de duración deste exercicio será de 1 hora.

A puntuación desta primeira fase será de 0 a 30 puntos. Para aprobar será necesario obter un mínimo de 15 puntos.

Segundo exercicio: constará das probas prácticas que se indican a continuación:

a) Instrumentalización con módulos estándar NIM. Consistirá na construcción de un reloxo de 1 KHz TTL, empregando módulos estándar NIM e visualización da saída mediante un osciloscopio analóxico ou dixital.

b) Proba de microsoldura. Realización de seis soldaduras sobre un integrado, segundo o esquema que se xunte, mediante unha máquina de microsoldadura.

c) Deseño asistido por computador do diagrama eléctrico dun circuíto. Os aspirantes realizarán o deseño do circuíto esquematizado adxunto, mediante o programa ORCAD sobre PC.

O tempo máximo de duración de cada proba será de 15 minutos.

A puntuación do exercicio será de 0 a 30 puntos, sendo necesario para aprobar acadar un mínimo de 15 puntos.

1.2. Segunda fase:

Quenda de promoción interna.

Proba de coñecemento de lingua galega. Terá carácter selectivo e non eliminatorio. Constará de dúas probas:

Primeira: consistirá na traducción, sen diccionario, dun texto de castelán para o galego, elixido por sorteo de entre tres propostos polo tribunal.

Segunda: consistirá na traducción, sen diccionario, dun texto de galego para o castelán, elixido por sorteo de entre tres propostos polo tribunal.

O tempo máximo para a realización deste exercicio será de 1 hora.

A puntuación será de 0 a 10 puntos.

Quenda de acceso libre: terá carácter selectivo non eliminatorio, constará de dúas partes:

Primeira: consistirá en contestar por escrito un cuestionario de preguntas tipo test, con tres respostas alternativas das que só unha é correcta, propostas polo tribunal e correspondentes á segunda parte do programa.

A duración desta proba non será inferior a trinta minutos.

Valorarase de 0 a 10 puntos.

Segunda: constará de dúas probas:

Primeira: consistirá na traducción, sen diccionario, dun texto do castelán para o galego, elixido por sorteo de entre tres propostos polo tribunal.

Segunda: consistirá na traducción, sen diccionario, dun texto de galego para o castelán, elixido por sorteo de entre tres propostos polo tribunal.

O tempo máximo para a realización deste exercicio será de 1 hora. Terá carácter selectivo e non eliminatorio. A puntuación será de 0 a 10 puntos.

1.3. Terceira fase: concurso.

Quenda de promoción interna, máximo 30 puntos.

a) Antigüidade: máximo 10 puntos. A razón de 0,069 puntos por mes traballado.

b) Experiencia: máximo 15 puntos. Valorarase a razón de 0,21 puntos por mes traballado na mesma categoría en universidades públicas.

c) Cursos de formación e perfeccionamento, dispensados por centros ou organismos oficiais e que estean directamente relacionados co contido da praza. Máximo 5 puntos, a puntuar do seguinte xeito:

-Cursos de formación recibidos:

Cursos de aptitude: 0,02 puntos/hora de duración do curso.

Cursos de asistencia: 0,01 puntos/hora de duración do curso.

Curso de iniciación da lingua galega: 0,01 puntos/hora.

Curso de perfeccionamento lingua galega: 0,02 puntos/hora.

No caso de te-los cursos de iniciación e perfeccionamento de galego, só puntuará o de perfeccionamento.

-Cursos de formación impartidos: 0,03 puntos/hora de duración do curso.

Nos cursos nos que non figure o número de horas, a puntuación farase polo mínimo de 10 horas.

Quenda de acceso libre: máximo 15 puntos.

Valoraranse os seguintes conceptos:

a) Experiencia: máximo 11 puntos.

Na mesma categoría en las universidades públicas, 0,15 puntos por mes traballado.

Na mesma categoría noutras administracións públicas, 0,076 puntos por mes traballado.

Noutras categorías nas universidades públicas, 0,076 puntos por mes traballado.

b) Cursos: valoraranse igual que para promoción interna ata un máximo de 4 puntos.

ANEXO II

Denominación da praza: técnico especialista de microelectrónica. Grupo III

Programa

I Fase: coñecementos específicos:

1. Capacidade: condensadores. O condensador en corrente continua. Carga e descarga. Relacións entre C, Q, E. Capacidade en función de S e D. Enerxía almacenada nun condensador. Tensións de traballo e de proba.Conexión de condensadores. Carga e descarga a través dunha resistencia. Clases de condensadores. Código de cores para condensadores.

2. Circuítos AC: capacidades dun circuíto ac. Serie e paralelo con R e C. Serie con R, L, C. Paralelo con L e C. Paralelo con R, L, C. Potencia en corrente alterna. Factor de potencia.

3. Transformadores: teoría do funcionamento. Relación entre tensións e espiras. Relación entre correntes e espiras. Tipos de transformadores. Efectos da corrente continua nos transformadores.

4. O transistor: características básicas do transistor. Tipos e símbolos. Teoría do funcionamento do transistor. O transistor como amplificador. Curvas características. Liña de carga. Límites de funcionamento.

5. Sistemas de alimentación: introducción. Compoñentes dun sistema de alimentación. Factor de rizado. Filtrado. Estabilización. Regulación. Reguladores integrados.

6. Amplificación: introducción. Clasificación dos amplificadores. Características da amplificación. Circuítos de polarización dun transistor. Configuracións básicas do transistor. Acoplamento entre etapas.

7. Circuítos integrados: circuítos integrados monolíticos. Circuítos integrados híbridos. Fixación de circuítos integrados. Envoltura dos circuítos integrados.

8. Amplificadores operacionais: o amplificador operacional básico. Características do amplificador operacional. Funcionamento básico. Circuítos lineais con operacionais. Circuítos non lineais con operacionais.

9. Aplicacións dos circuítos integrados: introducción. O regulador LM 317. Amplificador de BF TDA-20XX. Circuíto integrado 555.

10. Electrónica dixital: sistema binario e códigos de numeración. A álxebra de Boole. Operadores lóxicos. Simplificación de funcións. Deseño de circuítos combinacionais. Decodificadores. Codificadores. Multiplexores. Demultiplexores. Comparadores. Circuítos aritméticos e secuenciais. Biestables, básculas e flip-flop. Deseño de contadores con biestables. Contadores. Rexistros.

II Fase: coñecementos non específicos:

1. Dereitos fundamentais e liberdades públicas do título primeiro da Constitución española.

2. III convenio colectivo do persoal laboral das universidades públicas de Galicia.

3. Universidade de Santiago de Compostela (USC). Estatutos.

4. USC. Clases e réxime xurídico do persoal de administración e servicios.

5. Centros e servicios da USC. Denominación.

ANEXO III

Denominación da praza: técnico especialista de microelectrónica. Grupo III.

Tribunal titular:

Presidente: José Ramón Leis Fidalgo, vicerrector de Investigación e Terceiro Ciclo da Universidade de Santiago de Compostela.

Representantes da universidade:

-Máximo Plo Casasus, profesor titular do Departamento de Física de Partículas da Universidade de Santiago de Compostela.

-Bernardo Adeva Andany, catedrático de universidade do Departamento de Física de Partículas da Universidade de Santiago de Compostela.

Representantes do Comité de Empresa:

-Ezequiel Vázquez Fernández, grupo IV do cadro de persoal laboral da Universidade de Santiago de Compostela.

-Aurelio F. Barreiro González, grupo IV do cadro de persoal laboral da Universidade de Santiago de Compostela.

Secretaria: Mª Isabel Rial Otero, funcionaria de carreira da escala administrativa da Universidade de Santiago, que actuará con voz pero sen voto.

Tribunal suplente:

Presidente: Emilio Quiñoá Cabana, catedrático de universidade do Departamento de Química Orgánica da Universidade de Santiago de Compostela.

Representantes da universidade:

-Carlos Pajares Vales, catedrático de universidade do Departamento de Física de Partículas da Universidade de Santiago de Compostela.

-Alfonso Vázquez Ramallo, catedrático de universidade do Departamento de Física de Partículas da Universidade de Santiago de Compostela.

Representantes do Comité de Empresa:

-Manuela García Freire, grupo IV do cadro de persoal laboral da Universidade de Santiago de Compostela.

-Andrés Proupín Castiñeiras, grupo V do cadro de persoal laboral da Universidade de Santiago de Compostela.

Secretaria: Ana María Paz Torres, funcionaria de carreira da escala auxiliar da Universidade de Santiago de Compostela, que actuará con voz pero sen voto.