Dentro do plan de actividades da Escola Galega de Administración Pública para 1999 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse unhas xornadas de estudio sobre a contratación pública no dereito comunitario, convocatoria que se desenvolverá conforme as seguintes bases:
1. Obxectivos.
Transmitirlles ós funcionarios que interveñen nos procedementos de contratación pública, profesionais e estudiosos en xeral, os coñecementos necesarios sobre o contorno supranacional no que se encadra a normativa de aplicación, para permitirlles deste xeito comprende-los condicionantes da mens legis e do limitado campo de acción do que dispoñen os lexisladores estatal e autonómico, así como as obrigas contraídas ó respecto.
2. Contido.
Trataranse estes temas:
-Evolución da contratación pública en España e as súas adaptacións trala adhesión ás comunidades europeas.
-Doutrina do Tribunal de Xustiza de Luxemburgo sobre contratación pública.
-As directivas sobre contratación pública e a súa trasposición ó dereito español.
-Normativa comunitaria sobre coordinación dos procedementos de adxudicación de contratos públicos de subministración e de obras.
-O sistema de recursos na normativa comunitaria de contratación pública.
-Normas internacionais sobre contratación pública e aplicación do dereito comunitario.
3. Destinatarios.
Persoal ó servicio da Xunta de Galicia e da Administración local galega e interesados en xeral.
4. Desenvolvemento.
-Horario: mañá e tarde.
-Lugar e datas: as xornadas convocadas terán lugar no salón de actos da Escola Galega de Administración Pública (rúa de Madrid, 2-4, polígono das Fontiñas, Santiago de Compostela) os días 28 e 29 de xuño de 1999.
5. Inscrición.
-Prazo: remata o xoves, día 24 de xuño de 1999.
-Tramitación de solicitudes: as solicitudes irán dirixidas ó director da Escola Galega de Administración Pública, polígono das Fontiñas, rúa de Madrid, 2-4, 15707 Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP, ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 37.
-Número de prazas: limitado á capacidade do local.
-Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.
Os peticionarios poderán obter confirmación da súa posible admisión, chamando, o día 25 de xuño, por teléfono, das 10 ás 14.45 horas, ós seguintes números 981 54 62 39 ou 981 54 60 40.
6. Modificacións.
A EGAP reserva para si a facultade de interpretar e de resolve-las incidencias que puidesen xurdir no desenvolvemento das xornadas, así como a de cancelalas, se o escaso número de solicitudes non xustificase a súa realización.
7. Certificación de asistencia.
Entregaráselles, ó remate destas xornadas, a aquelas persoas inscritas que concorresen asiduamente a elas, cando a súa asistencia sexa igual ou superior ó 85% das horas lectivas programadas, e expresarase, neste documento, a natureza da actividade e as datas da súa realización.
Santiago de Compostela, 28 de maio de 1999.
Domingo Bello Janeiro
Director da Escola Galega de Administración
Pública
