A necesidade de regula-la certificación técnico-sanitaria acreditativa das características técnicas, equipamento sanitario e dotación de persoal con que cada vehículo concreto debe contar con carácter previo á obtención da autorización de transporte sanitario outorgado pola consellería competente nesta materia, e a consideración polo Real decreto 63/1995, do 20 de xaneiro, do transporte sanitario como prestación complementaria a cargo do Sistema Nacional de Saúde cando concorran as circunstancias e requisitos que este establece, motivaron a elaboración e publicación do Decreto 42/1998, do 15 de xaneiro, polo que se regula o transporte sanitario (DOG nº 29, do 12 de febreiro).
A promulgación en data posterior (BOE nº 101, do 28 de abril de 1998) do Real decreto 619/1998, do 17 de abril, polo que se establecen as características técnicas, o equipamento sanitario e a dotación de persoal dos vehículos de transporte sanitario por estradas, o seu carácter de norma básica, salvo as excepcións sinaladas no seu articulado, e a existencia de determinadas diverxencias con respecto ó Decreto 42/1998, do 15 de xaneiro, motiva e fundamenta a necesidade de dictar unha nova norma que incorpore as previsións estatais básicas previstas no dito real decreto á normativa autonómica.
Consecuentemente, cómpre revisar determinados aspectos da norma autonómica; neste sentido, procede derroga-la disposición transitoria primeira e modifica-la terceira do Decreto 42/1998, para efectos da súa acomodación ás previsións e ó período de adaptación fixado pola disposición transitoria única do Real decreto 619/1998, do 17 de abril. Así mesmo, débense engadir novas características técnico-sanitarias ás sinaladas nos puntos 3º e 4º do anexo 1A do Decreto 42/1998.
Na súa virtude, por iniciativa dos conselleiros de Política Territorial, Obras Públicas e Vivenda; Industria e Comercio e de Sanidade e Servicios Sociais, oído o Consello Consultivo de Galicia, por proposta do conselleiro da Presidencia e Administración Pública e logo de deliberación do Consello da Xunta de Galicia na súa reunión do día sete de maio de mil novecentos noventa e nove,
DISPOÑO:
Artigo único.
Primeiro.-A disposición transitoria segunda do Decreto 42/1998, do 15 de xaneiro, pasa a ser co
seu actual contido a disposición transitoria primeira deste.
Segundo.-Modifícase a disposición transitoria terceira do Decreto 42/1998 que pasa a ser a disposición transitoria segunda, co seguinte contido:
«Segunda.-As empresas ou institucións titulares de autorización de transporte sanitario quedan suxeitas ó disposto na disposición transitoria única do Real decreto 619/1998, do 17 de abril.
A Administración sanitaria poderá establecer nos seus pregos de contratación cláusulas de melloras de puntuación para os vehículos que cumpran coas ditas características antes do prazo establecido por esta disposición para a súa implantación obrigatoria».
Terceiro.- Modifícase o anexo 1A nos seguintes termos:
1º Substitúese o actual encabezamento do anexo 1A polo seguinte, «Condicións xerais para tódolos vehículos de transporte sanitario».
2º Inmediatamente antes de «1º Características técnico-sanitarias das ambulancias básicas (Tipo I)», engádese o seguinte encabezamento, «Características técnico-sanitarias dos equipamentos comúns».
Cuarto.-Engádense os seguintes requisitos ós puntos 3º e 4º do anexo 1A:
«3º Características técnico-sanitarias das ambulancias asistenciais (tipo III).
Persoal requirido:
Médico e ATS/DUE, ambos con capacidade demostrable en transporte asistido, técnicas de reanimación e técnicas de soporte vital avanzado».
«4º Características técnico-sanitarias dos vehículos de servicios sanitarios ( tipo IV).
Equipamento sanitario.
Dispositivo de aspiración de segregacións».
Disposición derrogatoria
Queda derrogada a disposición transitoria primeira do Decreto 42/1998, do 15 de xaneiro, polo que se regula o transporte sanitario.
Disposición derradeira
Este decreto entrará en vigor o día seguinte ó da súa publicación no Diario Oficial de Galicia.
Santiago de Compostela, sete de maio de mil novecentos noventa e nove.
Manuel Fraga Iribarne
Presidente
Jaime Pita Varela
Conselleiro da Presidencia e Administración Pública
