O Real decreto 2434/1982, do 24 de xullo, sobre traspaso de funcións e servicios do Estado á Comunidade Autónoma de Galicia en materia de cultura, especifica no seu anexo I.B.3.h que aquela asume as competencias de promoción e organización de actividades de animación sociocultural no ámbito artístico, artesanal, turístico e de aire libre, dirixidas ós sectores da xuventude, infancia, terceira idade e sectores marxinados.
Neste marco competencial, a Consellería de Familia e Promoción do Emprego, Muller e Xuventude desenvolve, a través da Dirección Xeral de Xuventude, o programa Fomento da actividade xuvenil, que ten entre os seus obxectivos básicos promociona-la actividade cultural e artística entre a nosa xuventude, e a Consellería de Industria e Comercio a través da súa Dirección Xeral de Comercio e Consumo, que ten entre outras funcións, a de colaborar no desenvolvemento do mundo da industria téxtil, así como na promoción de moda galega, e de acordo co Decreto 488/1997, do 26 de decembro, e o Decreto 99/1998, do 26 de marzo, polo que, respectivamente, se establece a estructura orgánica de cada unha das ditas consellerías.
Polo exposto, a Consellería de Familia e Promoción do Emprego, Muller e Xuventude, consciente da importancia que ten facilitar vías polas que poida manifestarse a actividade e inquedanza artística individual e colectiva da xuventude galega, convoca cada ano unha serie de certames, concursos e mostras que abranguen un amplo abano de manifestacións de carácter artístico e artesanal e que constitúen o programa Certames e Mostras Xuventude 99.
Por todo isto,
DISPOÑO:
Artigo 1º
A Consellería de Familia e Promoción do Emprego, Muller e Xuventude convoca a VIII Mostra Galega de Novos Creadores de Moda Xuventude 99, segundo as bases que se establecen no anexo I desta orde, onde se regulan os aspectos relativos á participación, condicións xerais que van rexer na respectiva convocatoria, inscricións, desenvolvemento, premios e xurado.
Artigo 2º
A mostra obxecto da presente convocatoria desenvolverase a través das delegacións provinciais da Consellería de Familia e Promoción do Emprego, Muller e Xuventude, coa colaboración das delegacións provinciais da Consellería de Industria e Comercio.
Artígo 3º
As actividades que leven consigo o desenvolvemento desta mostra serán custeadas con cargo ás aplicacións orzamentarias 14.05.355B.640.1 e 14.01.211A.640.0 dos orzamentos xerais da Comunidade Autónoma de Galicia para 1999.
Disposicións derradeiras
Primera.-Facúltase a directora xeral de Xuventude para dictar, no ámbito das súas competencias, as resolucións precisas para o desenvolvemento desta orde.
Segunda.-A presente orde entrará en vigor o día seguinte ó da súa publicación no Diario Oficial de Galicia.
Santiago de Compostela, 29 de abril de 1999.
Manuela López Besteiro
Conselleira de Familia e Promoción do Emprego,
Muller e Xuventude
ANEXO I
VIII Mostra Galega de Novos Creadores
de Moda Xuventude 99
I. Participantes.
Xoves deseñadores de moda galegos ou residentes en Galicia con idades comprendidas entre os 16 e os 30 anos, cumpridos durante o ano 1999, en grupo ou individualmente.
II. Condicións xerais.
1. As coleccións versarán sobre Primavera-Verán 2000.
2. As coleccións deben ser orixinais e non ter sido seleccionadas para a fase final noutros certames ou mostras.
3. Os participantes presentarán os seus deseños en láminas DIN A-3 (297 mmx420 mm), con deseño de fronte e de costas.
4. Poderanse presentar un máximo de tres coleccións, constando cada unha de 10 a 15 modelos, que levarán por detrás o nome da colección á que corresponde. Xuntaranse unha descrición dos materiais e complementos da colección.
5. Xunto coas obras deberá entregarse un sobre pechado co pseudónimo no seu exterior, e no interior o boletín de inscrición que se indica no anexo III debidamente cuberto, fotocopia do seu DNI por ámbalas dúas caras e currículo do/s autor/es.
6. En ningún caso nos deseños pertencentes á/s colección/s presentadas deberán figurar datos que identifiquen os deseñadores, para garanti-lo anonimato en todo momento.
III. Inscricións.
As solicitudes deberán formularse no impreso de solicitude que se indica no anexo II.
Os participantes deberán presenta-las solicitudes xunto cos sobres pechados no Servicio de Xuventude da Delegación Provincial da Consellería de Familia e Promoción do Emprego, Muller e Xuventude da provincia na que residan habitualmente, que pode ser en:
r/ Ronda da Muralla, s/n -27003 Lugo.
Avda. da Habana, 81-baixo 32004 Ourense.
r/ Durán Loriga, 9-1º 15003 A Coruña.
r/ Mª Berdiales 20-entreplanta 36203 Vigo.
r/ Benito Corbal 47-2º, 36001 Pontevedra.
Sen prexuízo do disposto no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.
O prazo de presentación de solicitudes será ata o día 2 de setembro de 1999.
IV. Desenvolvemento.
O xurado seleccionará 10 participantes cunha colección de cada un deles.
Os seleccionados confeccionarán catro modelos que serán elixidos polo xurado, para o pase que se vai realizar na cidade de Vigo, no Centro Cultural Caixa Vigo, o día 10 de novembro de 1999.
V. Premios.
Establécense os seguintes premios e axudas:
Para cada un dos dous primeiros clasificados, un premio de 250.000 pesetas e unha bolsa de 500.000 pesetas, para cubri-los gastos de formación e aloxamento con modistos galegos de renome internacional. As bolsas serán outorgadas pola Consellería de Industria e Comercio dentro do convenio para a promoción do téxtil galego.
Axudas: 100.000 ptas. por cada un dos 10 seleccionados como apoio á confección dos modelos.
Así mesmo farase entrega a cada un dos participantes na fase final dun diploma que acredite a súa participación nesta Mostra Galega de Novos Creadores de Moda.
Os premios obxecto desta convocatoria estarán suxeitos ás retencións correspondentes conforme a lexislación tributaria.
VI. Xurado.
O xurado será nomeado pola delegada provincial da Consellería de Familia e Promoción do Emprego, Muller e Xuventude e pola delegada provincial da Consellería de Industria e Comercio de Pontevedra respectivamente, e estará formado por persoas cualificadas do mundo da moda, recaendo a secretaría nun funcionario da Delegación Provincial da Consellería de Familia e Promoción do Emprego, Muller e Xuventude de Pontevedra.
Contra a decisión do xurado non caberá recurso.
VII. Destino e devolución das obras.
Os dossieres dos xoves premiados e seleccionados quedarán en posesión da Dirección Xeral de Xuventude durante o período das actividades que se desenvolvan con motivo da presente convocatoria, e posteriormente, co consentimento do/s autor/es.
A documentación dos participantes que non fose retirada por eles ou persoa autorizada no prazo dun mes a partir do día seguinte ó da recepción da notificación coa decisión do xurado, poderá ser destruída ou utilizada pola dita dirección xeral na forma que coide oportuna.
Queda implícita a autorización do/s autor/es das obras participantes á reproducción e publicación da imaxe ou contido delas por parte da consellería, por calquera medio que considere oportuno.
