A Orde do 22 de abril de 1997 (DOG do 19 de maio) pola que se establece a proba libre para a obtención do título de graduado en educación secundaria para persoas maiores de 18 anos establece, no seu artigo 41, que a Consellería de Educación e Ordenación Universitaria convocará anualmente a citada proba e, no seu artigo 31, que a Dirección Xeral de Ordenación Educativa e Formación Profesional autorizará os centros nos que se realice a proba libre por proposta da delegación provincial correspondente.
En consecuencia, e en relación coa convocatoria da proba libre para a obtención do título de graduado
en educación secundaria para maiores de 18 anos, no curso 1998/1999, esta dirección xeral
RESOLVE:
I. Condicións dos aspirantes.
1. Poderán inscribirse para a realización da proba libre para a obtención do título de graduado en educación secundaria aquelas persoas que teñan cumpridos 18 anos no momento da realización das probas e non estean cursando ensinanzas de educación secundaria obrigatoria.
2. Para a realización da proba os aspirantes acreditarán a súa identidade co DNI, pasaporte ou calquera outro documento recoñecido en dereito.
II. Contidos da proba.
1. As materias constitutivas da proba están agrupadas nas seguintes áreas:
-Lingua castelá e literatura.
-Lingua galega e literatura.
-Lingua estranxeira (francés ou inglés).
-Ciencias da natureza.
-Ciencias sociais, xeografía e historia.
-Matemáticas.
-Tecnoloxía.
2. Os protocolos de exame serán remitidos ás delegacións provinciais da Consellería de Educación e Ordenación Universitaria pola Dirección Xeral de Ordenación Educativa e Formación Profesional. Unha vez recibidos, en presencia do delegado provincial e do xefe do Servicio Provincial de Inspección ou funcionarios nos que deleguen, segundo os tribunais que actúen na provincia, procederase ó lacrado dos distintos paquetes que conteñen os protocolos que lles serán entregados, no seu momento, ós presidentes dos tribunais constituídos.
3. As delegacións provinciais adoptarán tódalas medidas necesarias para que, en ningún caso, poida ser coñecido o contido da proba antes da súa aplicación.
III. Centros nos que se realizará a proba.
1. Provincia da Coruña:
-IES «Elviña». A Coruña.
-IES «Sofía Casanova». Ferrol.
-IES «Rosalía de Castro». Santiago de Compostela.
2. Provincia de Lugo:
-IES «Nº 1». Lugo.
3. Provincia de Ourense:
-IES «Ramón Otero Pedrayo». Ourense.
4. Provincia de Pontevedra:
-IES «Do Castro». Vigo.
-IES «Valle-Inclán». Pontevedra.
IV. Matrícula.
1. Para a solicitude de matrícula utilizarase o modelo que figura no anexo I e efectuarase na secretaría do centro onde se vaia realiza-la proba.
2. Os prazos de matrícula serán:
-Proba de xuño: do 10 ó 20 de maio, ámbolos dous inclusive.
-Proba de setembro: do 1 ó 3 de setembro, ámbolos dous inclusive.
3. Cada delegación provincial, a través dos medios de comunicación social, dará coñecemento público dos prazos de matrícula e as datas de exame dispostos nesta resolución.
4. O día seguinte ó do peche da matrícula de cada convocatoria, os directores dos centros onde se vai realiza-la proba libre deberán comunicarlles por fax ás respectivas delegacións provinciais e á Dirección Xeral de Ordenación Educativa e Formación Profesional o número de aspirantes que solicitan a realización da proba.
V. Datas e normas de realización.
1. As probas celebraranse en sesións de mañá e tarde os días 10 de xuño e o 10 de setembro para as respectivas convocatorias.
2. A sesión da mañá terá dúas partes; na primeira: das 9.30 h ás 11.30 h, realizaranse as probas de matemáticas e ciencias da natureza; na segunda: das 12 h ás 14 h, realizaranse as probas de tecnoloxía e ciencias sociais, xeografía e historia.
Na sesión da tarde, das 16 h ás 19 h, realizaranse as probas de lingua galega e literatura, lingua castelá e literatura e lingua estranxeira.
VI. Puntuación e cualificación da proba.
1. A avaliación desta proba libre correspóndelle ó equipo de profesores que compoña o tribunal. Estes profesores actuarán de maneira colexiada na adopción da decisión de propoñer ou non o aspirante para a expedición do título de graduado en educación secundaria.
2. O equipo de profesores ó que se refire o punto anterior poderá propoñer, para a expedición do título de graduado en educación secundaria, aqueles aspirantes que, sendo avaliados negativamente nalgunha das áreas que configuran a proba libre, acadasen, en termos globais, os obxectivos establecidos para a etapa.
Entenderanse acadados os obxectivos cando, a xuízo do tribunal, o aspirante amose un grao de adquisición das capacidades que lle permita continua-los seus estudios posteriores, podendo o tribunal, cando o considere oportuno, convoca-lo aspirante a unha
entrevista que sirva para clarificar posibles dúbidas sobre a súa valoración final.
3. Aqueles aspirantes para os que o tribunal determine que non procede a proposta de expedición do título de graduado en educación secundaria por non teren acadados os obxectivos xerais desta etapa nun grao suficiente, poderán conservar para sucesivas convocatorias as valoracións positivas obtidas nos termos de suficiente, ben, notable e sobresaliente nas distintas áreas. Tales valoracións deberán, nas sucesivas convocatorias, ser tidas en conta polo tribunal na adopción da decisión de propoñer ou non o aspirante para a expedición do título de graduado en educación secundaria.
VII. Tribunais.
1. Os tribunais estarán constituídos por un inspector ou polo director do centro no que se realice a proba, como presidente/a, e seis vocais, profesores preferentemente de educación de adultos, todos eles funcionarios en activo dos corpos da función pública docente, designados polo delegado provincial, correspondéndolle un especialista a cada unha das áreas que compoñen a proba libre.
2. Á vista dos alumnos matriculados, as delegacións provinciais establecerán os tribunais que sexan precisos, e estes adoptarán as medidas que se consideren oportunas no caso de que se presenten alumnos con necesidades educativas especiais que o soliciten.
3. As actas de avaliación da proba axustaranse ó modelo que se xunta no anexo II.
4. Para os efectos de tramitación de expedición do título de graduado en educación secundaria, os candidatos serán propostos por cada centro no que se realizou a proba, figurando a denominación do centro no título correspondente.
5. Logo de realizada a proba, os presidentes dos tribunais cubrirán a ficha estatística que se xunta como anexo III e remitiranlla ó xefe do Servicio Provincial de Inspección. As devanditas fichas, co visto e prace do inspector xefe, enviaranse á Dirección Xeral de Ordenación Educativa e Formación Profesional antes do próximo 30 de xuño para a convocatoria de xuño e antes do 30 de setembro para a convocatoria de setembro.
Santiago de Compostela, 16 de abril de 1999.
José Luis Mira Lema
Director xeral de Ordenación Educativa
e Formación Profesional
Delegados Provinciais da Consellería de Educación e Ordenación Universitaria. A Coruña, Lugo, Ourense e Pontevedra.
